1 Jǒn 3 - Bokyi Bible

Bwǎn ḿbé Osówo

¹ Kpúrî n̂g ba-ri eringe nyí be byimu byi-jê ng Osówo Bonchí eten. Kyijé emen kyi/jê kanong kanong ńkyí kyi/chi nyǐ mu o-kó ng bě bwǎn emen, ne be ntûntû byimu bwǎn emen. Ké bubwô ámbu nké ejíí e*fí e-nyît ng bě*. Nyǐ e*da/nyît ne Osówo*.

² Bacín-dyityém ejí, be kántîk byi-chi i bwǎn-Osówo. Nké kyi*da/tông ne wááng dyizong-banet ḿbé be byi/chi byi-firi*. Nké byimu byi-nyît ng byi/fu, ké nkéré mú Karâs oo/bê, be byi/chi byi-firi wǎ nyǐ, ké ebóng, be byi/chi byi-ri dyikpen emen kángkáng.

³ Nang yeě nké mu ne okabe mún ké Karâs, onet ámu o-tî ng dyityém emen kpárám wǎ eringe nyí dyityém ńdyí Karâs ndyi kpárám.

⁴ Nang yeě nké mu o-chi i byibî, onet ámu mu o-bên n byije ḿbyí Osówo, ké nǎ, kyibî, ányi kyije ebên.

⁵ Ben bamu ba-nyît ng ba/fu, Karâs o/bê, eringe nyí nyǐ odakúng byibî ḿbyí banet, ne Karâs o*fí ne kyibî*.

⁶ Ké bubwô ámbu kâng, nang yeě nké mu o-kyú u ne Karâs, onet ámu oo*chi to byibî o-ca kashú*. Nké nang yeě mú mu o-chi i byibî o-câ kashú, onet ámu o*da/ri ne Karâs* nang onyît to o*da ǎ enyît ne*.

⁷ Bwǎn ejí, *da n̂g emîng onet nang obónge o-nîm běn*. Nang yeě nké mu o-chi i ńkyí nkyi kanong ké bushú ḿbú Osówo, onet ámu mu kanong to ké bushú ḿbú Osówo wǎ eringe nyí Karâs mu kanong ké bushú ḿbú Osówo.

⁸ Nang yeě nké mu o-chi i byibî o-câ kashú, onet ámu o/já Otu-Byibî-Barím, ké ebóng, Otu-Byibî-Barím o/kpet byibî echi kyi-fím ké nkéré mú Osówo o/chi ejíí. Wǎn-Osówo o/bê ké ochíchí-bubwô ḿbún o/fu, nyǐ o-bâ ng ebên bǎmkpóngé ḿbé Otu-Byibî-Barím.

⁹ Nang yeě mú mu wǎn mú Osówo, onet ámu oo*chi to byibî o-ca kashú* ké ebóng, ochíchí-édúú nyí Osówo nyi ǎ ké byiko. Ne ké bubwô ḿbú Osówo to mu Bonchí emen, nyǐ oo*man to echi byibî o-ca kashú*.

¹⁰ Ńkyí kyidatông kyi/fu, bwǎn ḿbé Osówo ne bwǎn ḿbé Otu-Byibî-Barím ba/yángê nkyi něen, nang yeě mú o*fí o-chi i ńkyí nkyi kanong ké bushú ḿbú Osówo* mú nang wǎn-boné emen o*fí o-jê ng ǎ* onet ámu, *chí wǎn mú Osówo*.

Kû n̂g ejê Barî

¹¹ Kyitwóm ńkyí ben ba/jwo kyi-fím ké kiimkpet kyikû nkyi něen, be byi-man byi-kûjê barî.

¹² Be bii*man byi-kyú wǎ onet mú o/mû o-bángê e Kîin*. Nyǐ o/já Otu-Byibî-Barím, ne o/ju wǎn-boné emen nyǐ oyén. Ebóng kyi/chi ne Kîin o-ju wǎn-boné emen. Nyǐ o/ju ǎ, ké ebóng, byěm ḿbyí wǎn-boné emen o/mû o-chi i byi/mû kanong ké bushú Osówo, nké ḿbyí nyǐ o/mû o-chi i byi/mû byi*fí kanong*.

¹³ Ké bubwô ámbu kâng, ǎ bwǎn-bané ejí, kyi*dachi kyi-kyú běn wǎ chwǒm-akat* â ben bamu ba-sa ng banet ḿbé ké ejíí kafâ*.

¹⁴ Be byimu byi-nyît ng byi/fu, be bii/mîng bukyû ekpú, byi-kú byi-kpen n kántîk. Be byimu byi-nyît ng kánkyí, ké ebóng, bwǎn-bané eten mbe ba-jê ng bě. Nang yeě nké wǎn-boné emen o*fí o-jê ng ǎ* onet ámu o/tôong ké bukyû.

¹⁵ Nang yeě nké wǎn-boné mu o-sa ng ǎ kafâ, onet ámu o-chi i nju banet. Ben bamu ba-nyît ng ba/fu, nju banet o*fí ne dyikpen ńdyí ne banyá ké byiko*.

¹⁶ Karâs oo/tông bě eringe kyijé nkyi ké dyikpen emen ńdyí o/kye ké dyishí eten. Be to kâng byi-man byi-kye akpen eten ké dyishí-bwǎn-bané eten.

¹⁷ Â onet mu nfang-onet, ne mu o-ri ng wǎn-boné o*fí ne chwǒm* nké o/bwa o*fí o-ri ng wǎn-boné ámu bafip* nyǐ o-cen n nǎ ne o-sét o/fu, dyityém emen ndyi ne kyijé ńkyí Osówo.

¹⁸ Bwǎn ejí, kyijé eten kyi*dachi kyi-kyú ké ejá éja* ne ké byiraa eraa*. Kyi-man kyi-kyú kyijé ńkyí ntûntû ńkyí byidatông ké édúú.

Dyityém ecíp ké Bushú ḿbú Osówo

¹⁹ Ńkyín kâng nké byi/chi byi-nyît byi/fu, be byi/já Osówo mú ntûntû. Ké dyizong ńdyín to nké byidabwom ké bushú ḿbú Osówo bushî boo*kyú*

²⁰ atyém eten a/sét bě a/fu, be byi/chi kyibî, ké nǎ, be byimu byi-nyît ng byi/fu, Osówo o/rêe o-shwôm atyém eten, ne nyǐ to mu o-nyît ng kángkáng byěm.

²¹ Ké dyizong ándyi kâng, ǎ bacín-dyityém ejí, â atyém eten a*da bě ebîn be byi-man n ecíp dyityém ké bushú ḿbú Osówo.

²² Be byimu byi-koo ng nang ebóng chwǒm ne nyǐ ńkyí be byi/bí ǎ, ké ebóng, be byimu byi-tî ng byije emen, ne byimu byi-chi i ńkyí nkyi kyi-nyîn n ǎ.

²³ Chwǒm ńkyí Osówo mu o-kyâ kyije o/fu, be byichi nkyi něen, o/fu, be byikûbángê ne atyém eten ké dyizîn ńdyí Wǎn emen Jisos Karâs, ne byikûjê to barî wǎ eringe nyí Karâs o/mû o/kye bě kyije.

²⁴ Nang yeě nké mu o-chi i ńkyí Osówo mu o-sét ng, onet ámu o-kyú u ne Osówo, ne Osówo to o-kyú u ne nyǐ. Bukwóp ḿbún nké byimu byi-nyît ng byi/fu, Osówo mu o-kyú u ne be. Be byimu byi-nyît ng kánkyí ké bubwô-Busun emen ḿbú nyǐ oo/kye bě.