1 Jǒn 2 - Bokyi Bible

Karâs Ntîm Bonchí Arông ké Bubwô Eten

¹ Bwǎn ejí, me mu n-sáng ng běn ńkyín, eringe nyí ben baa*ba/chi ba-chi byibî*. Nké â nang onet obónge o/chi kyibî, be byimu ne Jisos Karâs nchi kanong ké bushú ḿbú Osówo, mú mu o-tîm m Bonchí emen arông ké bubwô eten.

² Ne Osówo mu o-pwoo ng byibî eten ké bubwô ḿbú Karâs oyén. *Chí byibî ḿbyí eten nké nke* nké ne ḿbyí kángkáng banet to.

³ Â byimu byi-chi i ńkyí Osówo o/fu, be byichi, ńkyín nkyi kyi-tông ng bě kyi/fu, be byimu byi-nyît ng Osówo.

⁴ Â onet nang obónge mu o-raa ng o/fu, me mu n-nyît ng Osówo, nké o*fí o-chi i ńkyí Osówo o/fu, ochi* onet ámu o-chi i nsêt kyisédéng, ne o*fí ne ntûntû ké dyityém*.

⁵ Nké nang yeě nké mu o-chi i ńkyí Osówo mu o-sét ng, onet ámu mu o-tông ng o/fu, Osówo oo/chi kyijé emen kyi-kwárê kerededet. Ké bukwóp ḿbún nké byidaman byi-ri ké ntûntû byi/fu, be byimu byi-kyú u ne Osówo.

⁶ Nang yeě nké mu o-sét ng o/fu, nyǐ mu o-kyú u ne Osówo, onet ámu o-man o-kyú wǎ eringe nyí Jisos Karâs o/kyú.

Kyije ńkyí Kyifyîfî

⁷ Bacín-dyityém ejí, kyije ńkyín ńkyí me mu n-sáng ng n-kye běn něen kyi*da/yángê ne kyije ńkyí Osówo o/kye běn kpákpá* ńkyí ben ba/koo kyi-fím ké nkéré mú ba/pem běn Bǎmpém ḿbé Banong*. Kyije ńkyí Osówo o/kye běn kpákpá, ányi kyitwóm ńkyí ben baa/jwo.

⁸ Nang ké nkyi éné, ńkyí me mu n-sáng ng n-kye běn něen nkyi kyije ńkyí kyifyîfî ké bukwóp bukíri, ne ntûntû mú mu ké nkyí ba-ri ng kámú ké édúú nyí Karâs ne ké nyí enen to. Ké ebóng, kyifip kyi-kú kyi-rím m kyi-câ, ne ochíchí-kiinwángé kyi-kú kyi-káng ng byikit kyi-câ.

⁹ Nang yeě nké mu o-sét ng o/fu, nyǐ mu ké kiinwángé, ne wǎn-boné emen o/tôong o-sa ng ǎ kafâ, onet ámu mu ké kyifip nang kántîk.

¹⁰ Nang yeě nké wǎn-boné emen mu o-jê ng ǎ, onet ámu o-kyú u ké kiinwángé, ne ké bubwô ámbu kâng, chwǒm nang kyibónge kyi*fí ǎ ké byiko* ńkyí kyi/chi kyi-chi onet okíri o-chi kyibî*.

¹¹ Nké nang yeě mú wǎn-boné emen mu o-sa ng ǎ kafâ, onet ámu mu ké kyifip. Nyǐ mu o-cen n ké nkyí, ne o*fí o-nyît ng kyicê ńkyí nyǐ mu o-wâa ng* ké ebóng, kyifip kii/chi ǎ o*fí to o-rángê e*.

¹² Bwǎn ejí, me mu n-sáng ng n-kye běn, ké nǎ, Osówo mu o-pwoo ng byibî enen ké bubwô-dyizîn ńdyí Karâs.

¹³ Banchí ejí, me mu n-sáng ng běn, ké nǎ, ben bamu ba-nyît ng ǎ nyǐ mú o/mû ké nkéré mú Osówo o/chi ejíí. Ásé ne byisat, me mu n-sáng ng běn, ké nǎ, ben baa/kpógê Otu-Byibî-Barím.

¹⁴ Ḿbé bwǎsíng, me mu n-sáng ng běn, ké nǎ, ben bamu ba-nyît ng Osówo Bonchí. Banchí ejí, me mu n-sáng ng běn, ké nǎ, ben bamu ba-nyît ng ǎ nyǐ mú o/mû ké nkéré mú Osówo o/chi ejíí. Ásé ne byisat, me mu n-sáng ng běn, ké nǎ, ben bamu ne atyém kíngkíng. Byiraa ḿbyí Osówo mbyi běn ké atyém ne ben baa/kpógê Otu-Byibî-Barím.

¹⁵ Ejíí e*da běn ekûjê* nang chwǒm kyirá to ńkyí kyi/já ejíí kyi*da běn ekûjê*. Â ejíí nyi e-jê ng běn, ányi ben ba*fí ne kyijé ńkyí Osówo Bonchí ké byiko*.

¹⁶ Kángkáng byěm ḿbyí byi/já ejíí, byěm ḿbyí kyibî-dyityém-onet ndyi dyi-ryuu ng, ḿbyí banet mbe ba-ri ng ne mbe ba-ryuu ng, ne kángkáng byěm ḿbyí ké ejíí ḿbyí banet mbe ba-tông ng byiko ké mbyí, kyi*fí nang kyibónge ńkyí nkyi kyi-fím m ne Osówo Bonchí*. Mbyí kángkáng mbyi byi-fím m ké ejíí.

¹⁷ Ejíí ne kángkáng byěm ḿbyí mbyi ké nyǐ, ḿbyí banet mbe ba-ryuu ng mbyi byi-rím m byi-câ. Nké onet mú mu o-chi i ńkyí Osówo mu o-ryuu ng, onet ámu o-kpen n ne banyá.

Onet-Bushwôn mú Karâs

¹⁸ Bwǎn ejí, nkuli kyikû-nkéré oo/fárâng. Ben ba/mû baa/sét běn ba/fu, Onet-Bushwôn mú Karâs o/chi o-bâ. Kántîk, banet-bushwôn ḿbé Karâs chwóó baa/byí. Ké bubwô ámbu kâng, byi-kú byi-nyît ng byi/fu, nkuli kyikû-nkéré oo/fárâng.

¹⁹ Banet ḿbén ké ntûntû, atyém ebe a/mû a*fí wǎ nyí eten* nkyí nké kyi/chi ne ba-mîng bě. Â atyém ebe a/mû wǎ nyí eten, mbé ba/mû ba/chi ba-waa ne be. Nké mbé ba/dim, eringe nyí kyidaman etông wááng kyi/fu, onet nang obónge ké burwám ebe o*fí mú dyityém emen ké ntûntû ndyi wǎ ńdyí eten*.

²⁰ Nké ben baa/koo Busun-Osówo ḿbú Karâs o/kye běn, ne ben kángkáng ké bubwô ámbu ba-kú ba-nyît ng ntûntû.

²¹ Me mu n-sáng ng běn kâng, *chí ké bubwô ḿbú ben ba*fí ba-nyît ng ntûntû*. Nké mu n-sáng ng běn, ké ebóng, ben bamu ba-nyît ng kámú, ne bamu ba-nyît ng to ba/fu, kyisédéng kyi*fí nang kyibónge ńkyí nkyi kyi-fím m ké ntûntû ne banyá*.

²² Yeě kâng mu nsêt kyisédéng. Nsêt kyisédéng o-chi i onet mú mu o-raa ng o/fu, Jisos oo*chi Karâs*. Onet mú mu o-né ng Osówo Bonchí ne Wǎn-Osówo nké mu Onet-Bushwôn mú Karâs.

²³ Ké nǎ, nang yeě mú mu o-né ng Wǎn-Osówo, onet ámu mu o-né ng to Osówo Bonchí. Nang yeě nké mu o-koo ng Wǎn-Osówo, onet ámu mu o-koo ng to Osówo Bonchí.

²⁴ Mîng kâng kyitwóm ńkyí ben ba/jwo kyi-fím ké kiimkpet kyikû kyi-waa běn ké atyém. Ben kángkáng nkéré kâng ba/chi ba-kyú ne Wǎn-Osówo ne Osówo Bonchí kyikit kyibónge, â ben bamu ba-tî ng ńkyí ben ba/jwo kyi-fím ké kiimkpet kyikû.

²⁵ Dyikpen ńdyí ne banyá nké ndyi chwǒm ńkyí Karâs oyén o/ryí ocím o/fu, nyǐ o-kyâ bě.

²⁶ Me mu n-sáng ng běn ńkyín kyi-kim ne banet ḿbé mbe ba-kan n ba/fu, mbé ba-nîm m běn.

²⁷ Nké kyi-kim ne ben, Karâs oo/kye běn Busun-Osówo. Ben baa*ryuu onet nang obónge mú oda běn ekûtángê* â Busun-Osówo mbu běn ké byiko*. Ké nǎ, Busun-Osówo mbu bu-tángê e běn kángkáng byěm, ne ńkyí mbu bu-tángê e nkyi ntûntû, *chí kyisédéng*. Kû n̂g echi byěm ḿbyí Busun-Osówo mbu bu-tángê e kâng, ba-kûkyú ne Karâs.

²⁸ Kántîk kâng, ǎ bwǎn ejí, kû n̂g ewaa ne nyǐ, eringe nyí byidasú ne atyém ecíp ké nkéré mú Karâs oo/bê, ne bii*ryuu byi/fu, byi-chêe ng ǎ byi-rem ké éshwân* ké Dyicí ńdyí nyǐ mu o-bâ*.

²⁹ Ben bamu ba-nyît ng ba/fu, Karâs mu o-chi i kanong ké bushú ḿbú Osówo. Ben ba-man ba-nyît kâng ba/fu, nang yeě nké mu o-chi i kanong ké bushú ḿbú Osówo, onet ámu o-chi i wǎn mú Osówo.