1 Jǒn 1 - Bokyi Bible

Ejá nyí nyi e-kyâ Dyikpen

¹ Kyi-kim ne Ejá nyí nyi e-kyâ dyikpen nké be byimu byi-sáng ng byi-kye běn. Ejá nyí nang ké nkéré mú Osówo o/chi ejíí e/mû kô. Ejá e/bírî onet, ne bii/jwo byiraa emen. Bii/kúng achi eten to byi-ri ǎ. Be bii/ri ǎ, ne bii/yip abwô eten byi-ta ǎ to.

² Be byi/ri ǎ ké nkéré mú dyikpen ándyi dyi/byí kyíjí wááng. Ké bubwô ámbu, be byimu byi-raa ng kyi-kim ne ndyí, ne byimu byi-sét ng to kyi-kim ne dyikpen ńdyí ne banyá ńdyí dyi/mû ké kyikit ńkyí Osówo Bonchí o/mû, ne dyi-byí dyi-kâm bě.

³ Ńkyí be bii/ri ne bii/jwo nké be byimu byi-sét ng běn to, eringe nyí ben badacibi ne be ké bubwô-byiryíng bubónge ḿbú be byimu byi-ryí i ne Osówo Bonchí ne Jisos Karâs to mú Wǎn emen.

⁴ Be byimu byi-sáng ng běn ńkyín, eringe nyí bunyîn-dyityém eten buda bě esú ké dyityém.

Osówo o-chi i Kiinwángé

⁵ Nyín něen kyitwóm ńkyí be bii/jwo ké ocím-Wǎn emen ne byimu byi-sét ng běn byi/fu, Osówo o-chi i kiinwángé, ne kyifip kyi*fí ǎ ne banyá ké byiko*.

⁶ Â be byimu byi-raa ng kâng byi/fu, be byimu byi-ryí i bubwô-byiryíng bubónge ne nyǐ, ne byimu byi-kyú u ké kyifip, ányi kyi/byí, be byimu byi-sét ng kyisédéng cibicibi ké ejá eten ne ké édúú eten.

⁷ Nké â be byimu byi-kyú u ké kiinwángé wǎ eringe nyí nyǐ mu ké kiinwángé, éné be kâng byimu byi-ryí i bubwô bubónge ne barî, ne baróng ḿbé Jisos mú Wǎn emen mbe ba-shî ng kángkáng byibî eten byi-cé.

⁸ Â byi/fu, be byi*fí ne kyibî ké byiko* ányi be byimu byi-nîm m byiko eten, ne ntûntû o*fí bě ké dyityém*.

⁹ Nké â be byimu byi-sét ng Osówo byibî eten wááng, nyǐ o/chi o-tî ocím emen mú o/ryí, ne o-chi ńkyí kyi/kwárê. Nyǐ o/chi o-pwoo bě ké byibî eten, ne o-chi bě byi-cé ké kángkáng byibî-byěm eten ḿbyí byimu byi-chi i.

¹⁰ Â byi/fu, be byi*da/chi kyibî* ányi be byimu byi-kúng ng Osówo wǎ nsêt kyisédéng, ne ńkyí nyǐ o/sét bě to kyi*fí bě ké dyityém*.