Ebele 1 - Ɛbhɛŋ ɛ na Bes

Zɛɛb nalii ɛ́ tɔ nuub mɔn'ɛ

¹ Eghɛŋ namwa, Zɛɛb naalii nɛ bɛbhaab'enaka esok nɛ esok. Nyɛ naalii nɛ nɔɔ membi nɛ membi mɛ elii djas tɔ enuub bɛngoolel ɛ mɛkpa ɛ Zɛɛb,

² mos, é mɛlu mɛ mɛsik mena dika mos'aak, nyɛ kalii nɛ nena ɛ́ tɔ nuub mɔn'ɛ. Ye ɛ́ nyɛy ɛ́ di, mot aalik nɛ esa djas ɔ, dum nɛ nɛ ɛ Zɛɛb nakus gwoo nɛ bɔs.

³ Ye ɛ́ mɔn tak ɛ́ di mɛkas mɛ duma ɛ Zɛɛb. Ye ɛ́ nyɛy ɛ́ di elyaal dáa Zɛɛb di ɛ. Nyɛ ɛ́ di epyet esonok djas nɛ ghwyil mɛkpa mɛ nuub'ɛ. Bhis nyɛ nasilal ɛdis ɛ bot edhuu e mesyem mɔɔ ɛ, nyɛ naazɛnɔɔ nyel di-si pɛ tɔ gwoo, pɛ mbɔ eghɛŋ ɛ Zɛɛb, na ghaa mɛbwala.

⁴ Zɛɛb naasa náá, mɔn'ɛ di kɔ elo efofop. Etɛɛ náá, nyɛ naadjɛ nyɛ boo din ɛ mɛbwala dhaa yii efofop.

Mɔn ɛ Zɛɛb ɛ́ kɔ elo efofop

⁵ Ye ɛ́ tsɛɛtsɛ náá, Zɛɛb dinaa ààpaake nɛ dhiiti fofop'ɛ ngɔt náá: «Wɔy ɛ́ mɔn'am, kana dwoo pan mos'ak, mɛ eebya wɔ.» Tin, nyɛ ààpakoke-keak nɛ dhiiti fofop náá: «Mɛ waaboodi nɛ nɛ sɛɛg, nyɛ aadi nɛ nam ɛ́ mɔn.»

⁶ Tin, é sok Zɛɛb nadhis mɔn mɛgwyak mɛ kɔ bɔs ɛ, nyɛ nabɛ ɛ́, nyɛ naake náá: «Efofop ɛ Zɛɛb djas goka ɛ́ nɛ ɛduwal ɛ nyɛ!»

⁷ Dum nɛ efofop, ye nabɛ ɛ́ Zɛɛb naake náá: «Nyɛ naasa náá, efofop bɛ di tyee epup. Tin, nyɛ naasa náá, bot ɛ mɛsa mɛ di tyee ngel du.»

⁸ Tin, dum nɛ mɔn, nyɛ naake náá: «Zɛɛb, boo mɛkoozi mɔ ɛ́ kɔm-kɔm sii nɛ kɔm. Deenek, ye ɛ́ é ɛkɛ tɔ esosoob ɛ wɔ di edjɛɛd ɛyoŋ ɛ lɔ.

⁹ Wɔ kwyɛl ɛ́ epiki, da wɔ ɛ́ bhina ɛbiyo, dum nɛ tɛp tak ɛ, Zɛɛb Sɛɛg, Zɛɛb'ɔ natɔ́ wɔ étɛp wɔ di mot-mɛsa mɛ. Nyɛ naso wɔ mul mɛ ebotan kɔ lo ɛ́ étɛp tak, tɔ sama bɔn ɛ nyoog djas, ye ɛ́ wɔy ɛ́ nyɛ nasɛ́ɛ.»

¹⁰ Zɛɛb naabake náá: «É mɛken tɔɔ, ye ɛ́ wɔy Ghɛŋ ɛ nakus bɔs, dɔɔ nɛ wɔy ɛ́ nasa gwoo nɛ mɛmbɔ mɔ ɛmet.

¹¹ Esonok binek djas aadi ɛ́ nɛ ɛsik, ye ɛ́ kabɛ wɔy ɔ, wɔy aadi ɛ́ kɔm-kɔm. Gwoo nɛ bɔs ɛ́ waapulel dáa ekaad.

¹² Wɔ waabwaada bɛ dáa bɛ di ebwaada kaad ɛ, deenek, wɔ waakaswoola bɛ ɛ́ dáa bot di eswoola ekaad e nyel ɛ. Yɛ kabɛ wɔy ɔ, wɔy ààswoola, tsik'ɔ tok nɛ ɛsik.»

¹³ Zɛɛb nabɛ ààke nɛ dhiiti fofop'ɛ ngɔt náá: «Dia si pɛ kyee mbɔ eghɛŋ bam, kɛkum dwoo mɛ aasa náá, bot ɛ mɛbhuka di dáa poba wɔ di ekɛl mɛbɔ mɔ kɔ tak ɛ.»

¹⁴ Efofop ɛ́ bɛzɛ? Bɛ tok esisim di esa mɛsa mɛ Zɛɛb ɔ? Zɛɛb lwom bɛ ɛ́, étɛp bɛ neegheekwyee-kwyee bot aabela tsik na kɔm-kɔm ɔ.