Zôo 9 - Yálá laawoo hɛɓɛ

Ɉobə woo ɉaaɓanąą

¹ Nąąlɔwai, Ɉobə ə nwoo ɲąąpənə, yɛ mą:

² Gílí kaa ɉu gɛ́, bələ ɓə gaa la, Nu kan a pɛli tələnmoi ləi yɛ tɛɛ Yálá ɓa?

³ Nu a kɛ bɔ ka yaa ka kiti kɛ́, ya pələ waa tɔ̨nɔ̨ ɓo, hva kpɛli dɔ̨nɔ̨ pulu pənə.

⁴ Nwɔ mɛ̨nį kɔ́lɔn ŋąą kɛnɛ̨i, da nwɔ huwalawala laa, gbɛɛ ɓə a pɛli tɔɔi na, yii hva mąą nu hutɔɔ?

⁵ Yaai a yeeɠaa həɠə di tɔɔi di tɛɠii, yɛ di kulɔ di pihɛi a líiholi.

⁶ Yɛ lɔi kpɛlin naai, Dɔɔmuɠaa diɛ kpɛlin.

⁷ A hvaa mą hvóló hva muhəɠə, yɛ gɔlɔn ɉii kɛ pɛmɛ̨lɛ̨n gɔwɠaa diɛ.

⁸ Yaa tɔ́nɔ̨ ɓə yələkɔlɔn bɛli, yɛ hiɛ gboloyá mɛ̨i.

⁹ Ya ɓə pɛmɛ̨lɛ̨n-gɔwɠaa, volo ɓəlai pələ nwɛiɠaai da volo tooi pələ nwɛiɠaai.

¹⁰ Ya ɓə hɛn gbɛa-gbɛaɠaa pɛli, yii nu kili hva gbaɠala kaa, nwɔ kpalo mɛ̨nįɠaai a gɛ, nu hva pɛli gəlee kwɛdɛn ɉii.

¹¹ A tɛɛ gwɛ́lɛ, kɛlaa vá gaa, a li vá nwɔ̨nɔ̨ gbaɠala kaa.

¹² A hɛn ɉon, gbɛɛ ɓə a gulɔ ɲəi? Gbɛɛ ɓə a kɛ mą: Lə ɓə ŋɛ̨i ə́ kaa gɛi?

¹³ Yálá a níiholi nu hva pɛli gbəlai bələi. Gboloyá hu huwɔ kpɛa kpɛa kəlee da pɛlɛ gɔwɔ mu.

¹⁴ Ɲą́ą́ ɓə li mɔ̨ɔ̨ pa tɔɔi na? Ŋą́ pɛli woo ta hɔlɔɓoi kɛ gɛ́ tɔɔ na?

¹⁵ Ə mą kɛ kɛ də́limoɔi, dɔ́ɔ́ mɛ̨nį na nwun mąą lə? Gíti te mun mə gáá nɛ̨ɛ̨mąą hvəi ma.

¹⁶ Ə mą kɛ kɛ ŋą́ą́ dəli, yɛ nwóó pulu pənə, vá pɛli kɛ gbaɠala kaai, gɛ́ kɛ a nwəli tɔɔ nwóó ɓa.

¹⁷ Yaai a pɛli ə ɉú ɓuwɔ a tulɔ hvaŋą. Yá mą́ą́ palaɠaa hu kɛnɛ̨ nwun və mą.

¹⁸ Hva kpɛli nɛ́ɛ́ laa, və́ nɔ̨́ɔ̨ yala tanɔ̨n, kɛlaa, a náá hvɛɛ a mɛ̨nį ɲąąnwąnąą,

¹⁹ ŋį́ pɛli mɔ̨ɔ̨ huwalawala laa kulɔi la? Gaa a Huwalawala Nąmu. Ŋą́ tələnmolaa hu hvɛli, gbɛɛ ɓə a dɛɛ bɔ́?

²⁰ Ŋą́ kɛ diɛ gáá a tɛ̨ą Nąmu, nááləi hva tɔɔ búlu. Ŋą́ kɛ diɛ ɉɔ́n və ɉu, a ɉɔ́n nɛ.

²¹ Ɉɔ́n və ɉu ɓəi? Vá pɛli gbaɠala kaai. Nwɔ́ yɛnɛ̨ɛ̨ wɛli kpɛɛ mą́ą́ ka ti.

²² Mɛ̨nį tɔ̨nɔ̨ lɔ ɓə gáá moi, gɛ́ diɛ: A tələnmomun ɉon nɔ yɛ hɔn mąą mun.

²³ Ɓɛlɔwai mɛ̨nį ɲɔ̨n gɛnɛ̨ɛ a kulɔ la, yɛ tələnmo nuą paa, Yálá a yɛlɛ kulɔ di hu, di wɔ mąąwɛli mɛ̨nįɠaai hu.

²⁴ Da lɔi tɛŋɛn gwɛlɛ ɓowo mun ma, Yálá a nɔi ti hu kiti tee nuą kili mɛ̨i pɛlɛ. A wala kɛ a yaa, gbɛɛ ɓə a pɛli yili kɛi?

²⁵ Ɲíí hvólóɠaa kaa tɛɛi, ə tɛɛ gilɛ həɠə mun nwəlɛɛ ɓa. Daa tɛɛ, di hvo mɛ̨nį ɲąąnɛ̨ɛ̨ kaa li.

²⁶ Diɛ gilɛ həɠə yɛ kələn da bɛli a hveen gbaɠa. Yɛ kuwɔ a kɛi li woloi gɔ̨nɔ̨n ma.

²⁷ Ŋą́ kɛ ŋį́ lɛ̨ą nwɔ́ liihɛlɛnŋąą diɛ, ə gɛ yɛlɛ ɲɛ̨i ə tɛ ɲɛ̨́i,

²⁸ nwɔ́ laanɔ̨nwɔ̨ɠaai di hva gɛ. Gíli kaa ɉu, gɛ́ hvo pai gúlɔi ɉu;

²⁹ Hvo kɛ li ŋį́ hvaa ɉɔ́n ma. Ŋą́ gbɔ́ɔ́ hviikpɛɛ kpɛli kpɛli lə mɛ̨nį ɓa?

³⁰ Ŋą́ ma kpɔ nwáá a haa hvinɛ, Ŋą́ ɲə́i waa a kpolonwana,

³¹ Yá bíli lɔ tulun ŋą. Mą́ą́ həɠəɠaa diɛ lənə mą́ą́.

³² Mąąhɔlɔɓo, hvo a nu yɛ ɲą́ą́, Vá pɛli hea tooi na, ɛlɛɛ, kwa yaa kuɔ pɛli lii kiti haɠa ɓa.

³³ Ku lɔwai tɔɔ mun a kɛ kɛ laa, ə pɛli gúlɔ ɲəi kɛi,

³⁴ Yili ə li Yálá nwɔ hvaɠai mąą kwɛa mą́ą́, ɛlɛɛ, nwɔ liiholii hvəli kɛa mą́ą́ ɲɔw.

³⁵ Ŋą́ li kɛ pələ ɓoi mą, vá ɲɔw. Kɛlaa, yii yili hvo laa, ɲą́ą́ dɔ̨nɔ̨ lɔ ɓə dɔ́ɔ́.

Lean sinn:

Ceanglaichean taic

Sanasan