Zôo 4 - Yálá laawoo hɛɓɛ

Elifazə woo dɔlɔɔ

¹ Elifazə yii həɠə Téman, nwoo ka, yɛ diɛ:

² Ɉobə, vá pɛli kɛ hvaai ə́ pɔ, mąąhɔlɔɓo, ə́ laanɔ̨nwɔ̨ ɓoɔi. Kɛlaa yaan, vá pɛli náá pilɛi.

³ Yɛ́i yáá kili tɛɛ nu kpulu tamąą pɔ, nuąi di yee kɔ̨nwɔ̨n ɉu haa, yɛ́ di hvaŋąlɔ;

⁴ nuąi kɛ lan bələ mɛ̨i, ə́ hvaa woo yɛ di hvilɛn pələ ɓa. Yiiɠaai di kɔ́wɔ ə kɛi kpɛlin di mu, yɛ́ hvaŋąlɔ tɛɛ di pɔ;

⁵ Yii kɛa mɛ̨nįi ti ta aa laa yɛ́, yɛ́ mun ə́ hvii ə kpɛɛ! Yɛ́ ka kɛa, ə́ hu aa pu yɛ́!

⁶ Akɛti, ə́ wɔ ɲɔw Yálá ɓa laa dɔ̨nɔ̨ ə kɛ lɔ ma, ɓɛlɔwai ə́ kɛ la ə́ nɛɛ hu? Yɛ bələi ə́ túwɔ́ pələ ə kɛ la a kɔ́ɔn mąą lɛlɛɛi, yili hva pɛli kɛ ə́ kili tooi ə́ yəi ɓaa?

⁷ Ə́ kiliŋąhiɛ tai! Yáá ta tələnmomun gaa, da nuąi hɔn və diɛ, kpalo yɛ ɓɛla diɛ?

⁸ Ŋą́ą́ gaa, gɛ́ diɛ: nu ya hulu mɛ̨nį hin, da laanɔ̨nwɔ̨, ya ma kulɔ.

⁹ Yá gɛ ti, yáá Yálá nwɔ lii ɲąnwąną laai kwɛli. Ɉunwɛi hvaŋą a li a diɛ.

¹⁰ Di huluun nwoo tii a kɛ di hu yɛ Yala, diɛ kpəɠi yɛ Kwɛli, Yálá kaa pai di kɔ́lɔ haai diɛ. Ə Yala lonnii ɲin mɛ̨i yali.

¹¹ Kwɛli a hvɛɠɛ a gɔ̨nɔ̨n, Yala lonnii da taɠa taɠa.

¹² Woo ta ə həli mą́ą́ loo hu, woo ta ə pa gíli pɔ, nwə́li ə ɲii-ɲii woo mɛ̨n.

¹³ Ɓɛlɔwai nu nwɔ kiliŋąhiɛ a ɉu pu la mą, a hį́i tamąą kaa yii nwun və mą. Ɓɛlɔwai yii kɛnɛ̨ a nuą hon na,

¹⁴ kwəi pili mąą mɛ̨nįɠaa di həli mą́ą́, yɛ gɔ́w kəlee nwąną ɉú.

¹⁵ Hvaŋą ta ə pu ɲɛ̨́i, yɛ mįnįgban bu mą́ą́.

¹⁶ Nu ta ə kɛ tɔɔni dɔ́wɔ, kɛlaa, və́ kɛi gɔlɔn. Hɛn da mąąnįnįn ə kɛ ɲɛ̨́i laai, nąą mɛ̨i haa kpɔ tin, yili pulu, ŋį́ woo ta mɛ̨n, yɛ kɛ mą́ą́:

¹⁷ Haa mun a pɛli mɔ̨ɔ̨ tələnmoi ə tɛɛ Yálá ɓa? Nu mąą a pɛli mɔ̨ɔ̨ həɠəi ə tɛɛ bɛli mun ma?

¹⁸ Yálá hvo laa li nwɔ tínuąi la, akɛ, a kɛ hɔn gaai nwɔ malakaɠaai diɛ.

¹⁹ A kɛ tii ləɠi pɔlɔ pɛlɛ mu nuą da kɛ ləi, diɛi da luwun, diɛ pənə a pɔlɔ? Diɛ di kiin naa nɛ̨ɛ̨ yɛ kolo.

²⁰ Ə həɠə yələwala ɓa ə həli yələ wuliiɓa, da di kiin. Nu ta hva kɛa giliŋąhiɛ diɛ, di nwun na kaa pai pilii kpɔ tɛ̨ɛ̨tɛ̨ɛ̨.

²¹ Daa hɔlɔ mun di wɔ kələi nɔ̨nwɔ̨ kulɔ mu, Daa haa, mɛ̨nį kɔ́lɔn gili tɛɠii.