Zôo 39 - Yálá laawoo hɛɓɛ

¹ Ɓɛlɔwai kpə́lə́mąn a kɛ gaai la, ə́ nąąlɔwai kɔ́lɔn? Ə́ lomą nwɔ kwəi nwąną kɛi lɔwai kɔ́lɔn?

² Da koo həɠə, ɲąnin ɲɛli ɓə a gɛ diɛ? Ə́ di mąą hvólóon ɉii lɔwai kɔ́lɔn?

³ A pɛlɛ yɛ gaa, yili pulu, gwəi nwąną kɔ́lɔ ə haa mą.

⁴ Di lonnii da hvaŋą hɔlɔɓo, diɛ kpɛa kpɛa a huwalawala, da li kɛa, di hva pənə di hvo pa di pɔ.

⁵ Gbɛɛ ɓə a Dɔlɔɔ lɛɛ gbɔwɔ ɓa lɔwɔi? Gbɛɛ ɓə a volóon yɛ nɛɛ laa yɛ li gbɔwɔ ɓa.

⁶ Yaai ŋį́ gɛi kulɔ gbalə lɔi hu, lɔi hɛn da hva lɛlɛ ɉu ya ɓə a bɔ taai.

⁷ Taa kpɛa kpɛa hu woo a kɛi tɔɔ wɔ, a kɛ yɛ́lɛ́i diɛ. Yaai hvaa wotolo hiɛ mun nwoo mɛ̨n bulu.

⁸ Gɛi ɓaa yee ɓa, ɓɛi a kɛ hiɛi laa. Yɛ kala bɔn nɛlɛɛ kwɛli laa.

⁹ Lan gaa mɔ̨ɔ̨ pai tíɓo kɛi yɛ́? Gaa mɔ̨ɔ̨ pai kɛi yii ə́ yəi gala hu?

¹⁰ Ə́ kaa mɔ̨ɔ̨ pai ə́ wɔ kɛɛhi kalii kpulɔn ɉii ma? Ya ɓə mɔ̨ɔ̨ pai kɛi ə́ wɔ kɛɛi kpɛŋɛn ɉii?

¹¹ Ə́ kaa mɔ̨ɔ̨ pai ə́ kilitɔɔi nwɔ huwalawala ɓa, yɛ́ ə́ kɛ koló kəlee lɛɛ ma?

¹² Ə́ kaa pai ə́ nii laa mɛ̨i ə́ wɔ hɔlɔɓo hɛn mɛ̨nį hu? Yɛ́ ə́ wɔ kɔ̨nɔ̨n gələi laa hvaa.

¹³ Hɔ̨nwɔ̨nɔ̨gɔlɔn a koon ɉu haŋą a ɲąnɛ̨ɛ̨, kɛlaa hva pɛli koon ɉi la yɛ yá-nwɛ̨ni?

¹⁴ Hɔ̨nwɔ̨nɔ̨gɔlɔn a ɲąnįn bu lɔi ɓa, ə nɛɛ laa, muluun gbala ɓə a vulɔ.

¹⁵ Hva giliŋąhiɛ yɛ kɛ diɛ nu ta a pɛli ə tɛ mɛ̨i, lɔwɔ huwɔ ta a pɛli ə nwolo.

¹⁶ Ɲɛ̨i walawalaa nonnii diɛ, yɛ da wala kɛ a nonnii, hva niihɛlɛn a di mąą mɛ̨nį, a lɛ̨ą diɛ.

¹⁷ Yáá gaa ti, Yálá hvo kili tɛɛ li bɔ, ɛlɛɛ hvo kiliŋąhiɛ too li mą.

¹⁸ Kɛlaa, a muhəɠə a tɔɔ yɛ li, a tɛɠɛɓo hoo da mɛ̨i mun di hu, gilɛ mɛ̨nį hu.

¹⁹ A kɛ ti, yɛ́ ɓə ya kɛ hoo nwɔ huwalawala tɛɛi bɔ? Ə lɛɛ, yɛ gɔn mąą ləɠa kɛ mą?

²⁰ Gbɛɛ ɓə a gɛ hoo yɛ laŋin yɛ ponin? A tomą, yɛ nuą lii kulɔ diɛ.

²¹ Yɛ gilɛ həɠə ya ɓoloon bɔ a huwalawala, yɛ li kɔ́ laakwiɛn ɉii.

²² Yɛ yɛlɛ kulɔ ɲɔw hu, hvo kpɛlilin mo kɔ́lɔn. Ə ma ɓɔwa kwɛa kaa, hva yali bulu.

²³ Tonwa taɠa tin a kɛ tɔɔi bulu, kpala da ɓɔwa kwɛa kələn ŋąą diɛ ɉɔɔ.

²⁴ Hva kɛa pɛli nii kpələi, yɛ gilɛ həɠə, a kɔ́ tulu woo mɛ̨n, hva kɛa pɛli gbɔwɔ hon ɉii.

²⁵ A kɔ́ tulu woo mɛ̨n, yɛ tomą dulu woo tɛi tɛi kəlee ɓa. Yɛ kɔ́ kun mɛ̨n kwɛa la, yɛ kulaaɠaa tomą woo mɛ̨n, da kɔ́ mɛ̨i woo.

²⁶ Yɛ́ ɓɛ mɔ̨ɔ̨ kili tɛɛ kpaan golo pɔ? A kɛi goon nəɠa mąą hvalin, yɛ ɲɛɛ ɉɛɠɛɛ pələ?

²⁷ Yɛ́ ɓə mɔ̨ɔ̨ yá kuwɔ tí a muhəɠə mɛ̨nį, ə lɛɛ yɛ daa tɔɔ wulu ton na?

²⁸ Kwɛni kɛnɛ̨ mɛ̨i ɓə a yii laa, kwɛni mɛ̨i kwɛaɠaa mɛ̨i ɓə a kɛ laa, ɓɛi nu hva həli laa.

²⁹ Naa ɓə a kɛ laa, yɛ gɔ̨nɔ̨n mąą hɛn, yɛ kwɛa la kaa.

³⁰ Nonnii kpələ ya ɓaa ɲąmą, ɓɛi powa a pu laa, naa ɓə gaa laa.