Zôo 28 - Yálá laawoo hɛɓɛ

Kili mɛ̨nį mąątɛ̨nɛ̨ɛ̨

¹ Wali kulɔi kaa mą, hɛni waai ə ɓo mą,

² Kwɛli nwɛi da gulɔ lɔi mu, diɛ ɓala kwɛli kulɔ kwɛni hu.

³ Da kpinį kpɛla bələi, diɛ kɛɛnąą kpinɛ̨ɛ̨ hu pɔ̨nɔ̨, diɛ dɔlɔ kulɔ, diɛ həli la gbɛlai diɛ kwɛni wolo hu kpɛ kpɔ, diɛ həli la gbon ɉu.

⁴ Ɓɛi nuą di hvo laa, da kwɛni wolo ɓo laa ɉu, ɓɛi nuą di hvo kɛi tɛɛ laa. Diɛ hɛlɛn ɓɛi nuą di hvo lɛɠɛ li laa.

⁵ Kɔ̨nɔ̨n a lɛlɛ lɔi mɛ̨i pələ, Kɛlaa mu pələ ə ɓo yɛ nwɔ̨n a nąą kələn.

⁶ Da Kúwɔ́-kwɛni hɔlɔɓo nwɔ kwɛniɠaai hu, diɛ hɛni hɔlɔɓo bɔlɔ hu.

⁷ Kuwɔ hvo bələɠaai tii kɔ́lɔn, kpaan ɲɛ̨i hvo ta tɔɔ li ɉu.

⁸ Huwɔ ɲɔ̨nwɔ̨ɔ̨ɠaa di hvo ta tɛɛ li la, ə mą kɛ yala hvo ta hiɛ li ɉu.

⁹ Nu a pɛli pɛlɛi kwɛni tɛɠi ɓa a kɔ́, yɛ pɛli yeeɠaa kulɔi a di hamu.

¹⁰ A kwɛniɠaa wolo ɓo ɉu, ɛlɛɛ, nu ɲɛ̨i yɛ tɔɔ hɛn mąą mɛ̨nį nwąnąąɠaa diɛ,

¹¹ Daa ya kpɛa kpɛa nwun gulɔiɠaa kpala, ɛlɛɛ hɛn kpɔ noɔ, da pa a diɛ pɔ̨nɔ̨ŋą.

¹² Kɛlaa, kili mɛ̨nį nwɛi, mįnɛ̨ ɓə a hɔlɔɓo laa? Mįnɛ̨ ɓə mɛ̨nį kɔ́lɔn ŋąą kaa laa.

¹³ Nu hvo ɉɔ̨nwɔ̨ kɔ́lɔn yɛnɛ̨ɛ̨ ɓɛ, hva hɔlɔɓo yɛnɛ̨ɛ̨ nuą di wɔ lɔi hu.

¹⁴ Lɔi kpon ɉeei a kɛ diɛ: «Hvo ɓɛ bɔ́ɔ́li.» Gboloyá yɛ diɛ: «Hvo ɓɛ bɔ́ɔ́li.»

¹⁵ Di hva pɛli mąąhvalin ɉii a hɛni kpuwulu, hva pɛli yai a wali.

¹⁶ Ofirə hɛni lɛlɛ yee hvo həli li bɔ, ə mą nwɔ̨nɔ̨ kɛ onisə kwɛni da kúwɔ́-kwɛni.

¹⁷ Hɛni da pɛnɛ̨n di hva pɛli kɔ́ɔn ɉi mą, hɛni hɛnɲąŋą hva kpɛli ɉɔ̨nwɔ̨ kulɔ.

¹⁸ Hanwon da ɲɛą kɔ́w di kwɛlɛɛi, kɛlaa di kwələ yee hvo lɛɠɛ gwɛlɛ, ɛlɛɛ, kili mɛ̨nį kwɛliɛ hviɛla ɓoɔi kúwɔ́-kwɛni kwɛliɛ ɓa.

¹⁹ Nubi kúwɔ́-kwɛni ɓahiɓoɔ, hva kpɛli kɔ́ɔn ɉi mą, hɛni hu waa hva kpɛli pɛli lɛɠɛi gwɛlɛ.

²⁰ Akɛti kan, kili mɛ̨nį a həɠə mį? Mįnɛ̨ ɓə mɛ̨nį kɔ́lɔn ŋąą a həɠə laa?

²¹ Aa now nu kanŋaa diɛ, ə mą kɛ yələi nwɛ̨niɠaa.

²² Haa da ɲąmuątaa, da kɛ diɛ: «A tɛ̨ą, naa aa too ku wəlii.»

²³ Yálá ɓə ɉəɠəi pələ kɔ́lɔn, nwɛi, ɓɛi gaa laa, ə nąą kɔ́lɔn.

²⁴ Ɓɛlɔwai ə kɛi ɲɛ̨i pili la lɔi kpɛlai, yɛ yələkɔlɔn mu hɛnŋąą kəlee mɛ̨i kaa.

²⁵ Ɓɛlɔwai ə kɛi hvaŋą wiɛ yee kɔ́ɔn na, yɛ yaɠaa kpɛlai kɛ diɛ,

²⁶ ɓɛlɔwai ə tulɔ ɲɛ̨n naa la, yɛ yələgbąnąą tɛɛ pələɠaa kulɔ,

²⁷ nąąlɔwai ɓə ə kili mɛ̨nį kaa la, nwɛli ə too mą; ə gɔwɔ hvilɛn.

²⁸ Yili pulu, ə mo nu kanŋaa diɛ, yɛ diɛ: «Nu a ɲɔw Nąmu Yálá ɓa, yili kaa a kilimąą mɛ̨nį! Nu a mąą kwɛa mɛ̨nį ɲɔ̨n ma, yili kaa a mɛ̨nį kɔ́lɔn ŋąą!»