Zôo 23 - Yálá laawoo hɛɓɛ

Ɉobə hvaa woo mɛ̨ihaaɓa naa

¹ Ɉobə ə pənə yɛ diɛ:

² Nwóó lawoo kaa kpɔ kələi a kwɛli tee woo. Mɛ̨nįi aa naa mą́ą́, aa laŋin nwún mɛ̨i.

³ Ee kə! Ɓɛi gaa laa, ŋį́ kɛ kɛ a naa kɔ́lɔn ŋąą-o! Ŋą́ li pa həli nwɔ tɔɔ kpəlin ɓa.

⁴ Ŋą́ gwəi woo ɓo mą, mɛ̨nį tamąą a kulɔ kɛ ná, ŋį́ ɉəli ma.

⁵ Bələi kɛ a nwóó pulu pənə la, ŋą pɛli kɛ gbaɠala kaai ɲəi. Mɛ̨nįi kɛ yɛ ə mo mą́ą́ ŋį́ gbaɠala kaa kɛ.

⁶ Ə li mɔ̨ɔ̨ pa tɔɔi ná a nwɔ huwalawala? Kɛlaa, kpaa! Nwɛi, a pɛli kpɛli kɛ nwəli tɔɔi nwóó ɓa.

⁷ A gɔlɔn gɛ yɛ, da nu haŋąą ta ka ŋɛ̨i mɛ̨nį ɓoi. Yaa ti a gíti tee mun, ə li pa nwún mąąɓoi a yələ kəlee.

⁸ Kɛlaa, ŋą́ li voló həɠəi pələ, vá gaa, ŋą́ yɛɛ voló tooi pələ hva kɛ laa.

⁹ Gaa kiɛ koló ta ɓa ɲələi pələ? Və́ gaa li. Aa now kiɛ ɉɛɠɛɛ pələ? Və́ gɛi kɔ́lɔn!

¹⁰ Ya pa, ə dɛ́ɛ́ pələ kɔ́lɔn. A ɉúkɔɔn, ŋą́ kulɔ ɉu a mąąhɛɠɛɛ yɛ hɛni.

¹¹ Gɔ́wɔ́ hvilɛn ŋąą gbaaləɠaa hu. Gánąn ŋąąi nwɔ pələi ɓa, vá həɠə mɛ̨i.

¹² Gɔ́wɔ́ hvo ta həɠə li nwɔ tɔ́nŋąąi mɛ̨i. Wooɠaai da kulɔ na ŋą́ gəlee lɛɛ gíli pɔ.

¹³ Mɛ̨nįi a giliŋąhiɛ mą, gbɛɛ ɓə a ɉəɠə mą? A mɛ̨nį kəlee kɛ lɔ a niiɓa.

¹⁴ Yili ɓa tii, gɛɛ lɔ pai nwəli tɔɔi nwóó ɓa ɓəi?

¹⁵ Yili ɓə gɛi, ŋį́ tɔɔ ɲɛ̨i ɓa ɉú yɛ pu mą́ą́. A tɛ̨ą, ŋį́ kɛ lɔ gíliŋąhiɛi Yálá ɓa, nwɔ́ ɲɔw ta yɛ pɛlɛ ma.

¹⁶ Yálá aa nwɔ́ huwalawala hu kala. Huwalawala Kəlee Nąmu aa ɉú pu mą́ą́.

¹⁷ Və́ kɛ náá pilɛ li, bələi mąn kpinį ə pɛlɛ la; Kɛlaa yaamun, hvo mą́ą́kɔ̨nwɔ̨ li kpinį yəi.