Zôo 11 - Yálá laawoo hɛɓɛ

Sofarə hvaa woo dɔlɔɔ

¹ Naama mun Sofarə ə mo, yɛ diɛ:

² Pələ ɓo pələ a kɛ ŋɛ̨i tamą, di hva mɔ̨ɔ̨ pɛli bulu pənəi? Təą a pɛli tɛɛi nu pɔ naaləi mɛ̨nį ɓa?

³ Ə́ wɔ pələ tamąą ɓo pələ a pɛli ə kwɛlɛ nuą laa kpului? Ə́ hvaa woo a pɛli gɛi di hva nwumɛ̨ tɛ yɛ́?

⁴ Yáá ə́ lii kpələ yɛ́ kɛ diɛ: «Nwooɠaai gáá moi, lɛɛ hvo ɉu, yɛ́ kɛ diɛ ɉɔ́n və mą́ą́ ə́ ɲɛ̨i ɓa.»

⁵ Akɛ Yálá a pɛli kɛ mɛ̨nį ta ɓoi yili hu, Ə pɛli naa ɓoi, yɛ́ ə́ woo pulu pənə.

⁶ A pɛli kɛ mɛ̨nį kɔ́lɔn mun gwəi kili lɛi yɛ́; yii gbaɠala kaa laa walaai a nu kili. Nąąlɔwai, yá gbaɠala kaa, yɛ́ diɛ Yálá a kɛ lɛ̨ąi ə́ hɔn daɠaa diɛ.

⁷ Gaa ə́ kwəi ə́ Yálá kwəi kili kɛnɛ̨ pələ kɔ́lɔn, yɛ́ kɛ ə́ Huwalawala Kəlee Nąmu, nwɔ kiliŋąhiɛɠaa kɔ́lɔn?

⁸ Mąą kwɛa pələ kaa yɛ yələkɔlɔn, ə́ kaa pai gɛi ləi? Gbon ɉu kwɛai dɛɛ ɲąmuątaa ɓa, ya pɛli gɔlɔn bələ kɛi ləi?

⁹ Ɲąą kɛnɛ̨i dɛɛ lɔi ɓa, ɲąą kɛnɛ̨ dɛɛ gboloyá ɓa.

¹⁰ Yálá a ɲee pɛlɛ nu ta ɓa, a mąą nu təli kiti haɠa ɓa, gbɛɛ ɓə a pɛli tɔɔi na?

¹¹ Mąąhɔlɔɓo, nwɛi ə lɛɛ nuą kɔ́lɔn, hva lamun giliŋąhiɛi, yɛ mɛ̨nį nwɔ̨n gɔlɔn.

¹² Mąąhɔlɔɓo, nu hvii a kpɛɛ kɛnɛ̨, hva tɛ̨ą kɔ́lɔn, ə lɛɛ, nu kaai lɔwai, a kɛ lɔ yɛ hoohvaalən non.

¹³ Ə́ wɛi, yá pa kɛa ə́ kpɔɔ hɔlɔɓoi, yɛ́ ə yee lɛ bɔ pələ,

¹⁴ mɛ̨nį ɲɔ̨n a kɛ ə́ yee ŋą, bili kwɛa la. Ɛlɛɛ mɛ̨nį ɲɔ̨n və kɛa kɛ ə́ yəi bɛlɛ́n.

¹⁵ A kɛ ti, ya ə́ nwun muhəɠə a ɲɛ̨i pɔ̨nɔ̨; ə́ mąą a kɛ a ɉəɠɛɛ, ɲɔw hva kɛa kɛ ə́ hu.

¹⁶ Mąąhɔlɔɓo, ə́ wɔ mɔ̨nɔ̨ɠaai naa kili hva kɛa too ə́ ŋį́. Gili a too lɔ kɛa ə́ ŋą yɛ ya a pu.

¹⁷ Ə́ wɔ yɛnɛ̨ɛ̨ kaa pai kɛi yɛ hvóló tɔɔ nwun ma. Ə́ wɔ kpinį ə ɓo yɛ yələ ɓoɔ nįnɛ̨.

¹⁸ Yá kilitɔɔi hɔlɔɓo nąąlɔwai tii hu, Yɛnɛ̨ɛ̨ ə ma kpɔlu, ya yii liilaa hu.

¹⁹ Yá kɛi ə́ hvįįtɔɔ, nu ta hva ə́ hviikpɛɛ. Ə lɛɛ, nu tamąą kaa pai kɛi ə́ ɲɛ̨i kələi.

²⁰ Nu ɲɔ̨nwɔ̨ɔ̨ɠaa di wɛi, di ɲɛ̨i kaa pai paai. Di hva di mąąkilɛi hɔlɔɓo. Yii lɔ da di kilitɔɔ mą, ya ɓaa di haa mɛ̨nį.