Zôo 10 - Yálá laawoo hɛɓɛ

Yálá hvo nu pɛli li nwun na pili mɛ̨nį ɓa

¹ Yɛnɛ̨ɛ̨ a ɓaɠi lii tɛ a ɲą́ą́, Və́ pai náá pilɛi nwóólaa mɛ̨nį ɓa. Gáá lɔ pai kɛi hvaai lii kələn gwəi hu.

² Gáá pai kɛi Yálá ɓa: Hvo ɉón yɛ ŋį́ ɉɔ́n gɛ. Hɔn ŋį́ gɛ, nɛ mą́ą́.

³ Ə́ kwəinɛ̨ɛ̨ mɛ̨nį ɓaa yɛ́ níí kələn gwə́i? Yɛ́ wɛli kpɛɛ mąą laa kulɔ a ə́ yee kɛ koló; Yɛ́ nu ɲɔ̨nwɔ̨ɔ̨ɠaa kɛ koló dɔlɔ kɛ mą?

⁴ A kɛ ti nu ɲɛ̨ikɔw ɓə yɛ́? Yɛ́ kɛɛ kaa yɛ bələi nu kan a kɛɛ kaa la?

⁵ Ə́ wɔ yɛnɛ̨ɛ̨ hu kpuaa mɔ̨ɔ̨ yɛ nu kan nwɛi? Ə́ wɔ kwɛlanŋąą di ɓo yɛ nu kanŋaa?

⁶ Ə́ kaa ɉɔ́n gwɛlii mą́ą́ lə mɛ̨nį ɓa? Yɛ́ nɛ̨ŋɛ̨n gwɛli mą́ą́.

⁷ Yɛ́ kpinįi gbaɠala kaa yɛ́, ɉɔ́n və mą́ą́, ə lɛɛ nu ta hva pɛli gúlɔi ə́ yee ŋą.

⁸ Ə́ yee ɓə bɛ́li, Ya ɓə gɛ́ɛ́naa kəlee hee gee la, ya ɓə yɛ́ ə́ nwún na pili.

⁹ Gbaɠala kaa yɛ́, yɛ́ ɓə bɛ́li a ləɠi pɔlɔ. Ya ka ə́ kaa bɔ ə́ pənə ə́ nɔ́ pɔlɔ hu.

¹⁰ Yɛ́ ɓə gúlɔ yɛ da kɛi ɲįnįya kulɔ, yɛ́ gɛ yɛ ɲii, yɛ kpɔną.

¹¹ Ə́ núwu da gɔ́lɔ di tɛ mą́ą́. Yili pulu, ə́ gɔ́w da ną́na di kɛ ɉú.

¹² Ɛlɛɛ, ə́ nɔ̨́ɔ̨ too ɉú a mɛ̨inɛ̨ɛ̨. Ə́ wɔ yee hee mu laa aa ɲee kɛ nɔ́w ɓa.

¹³ Kɛlaa, yii ə́ kɛi ə́ kiliŋąhiɛ mą, ya ka: Ŋą́ gɔlɔn gɛ́, mɛ̨nį ta ə kɛ ə́ kwəi, yɛ hvilɛn na mą́ą́,

¹⁴ ə gɛ ŋį́ mɛ̨nį ɲɔ̨n da wolo kɛ kpɔlɔ, ə́ ɉón na, ə lɛɛ, hvo ə́ kili kulɔ li ɉɔ́n lɔpee ta hu.

¹⁵ A nɛ̨ɛ̨ mą́ą́ ŋį́ ɉɔ́n gɛ, yili nwɛi gbɔ́ɔ́ mɛ̨nį li. Hɔn ə mą wala kɛ mą́ą́, va nwún muhəɠə, ŋą́ą́ pilɛ nwumɛ̨ hu, laanɔ̨nwɔ̨ aa gɛ́lɛ yɛ lɔɔ.

¹⁶ Ŋą́ múhəɠə, yá hvilɛn búlu yɛ yala, yɛ́ ɉón bələ kwɛli a pələ tamąą.

¹⁷ Yɛ́ ninɛ̨ɠaa pili ɉu, Yɛ́ ə́ wɔ líiholi ta pɛlɛ lɔ mą mą́ą́ mɛ̨nį ɓa. Yɛ́ ə́ wɔ kɔlaɠai hu kɛnɛ̨ lɔ mą́ą́ mɛ̨nį ɓa.

¹⁸ Ə́ gúlɔ kɛa néé kwəi lə mɛ̨nį ɓa? Ŋą́ li pa tɛɛi ɲɛ̨ikɔw ta hva kpɛli gáá.

¹⁹ Ə li kɛ yɛ ŋą́ wala pa yɛnɛ̨ɛ̨, Ŋą́ kulɔ lɔ kɛ néé kwəi, gɛ li kámą hu.

²⁰ Akɛ nwɔ́ yɛnɛ̨ɛ̨ hu kwɛai, ə kpɛɛ kɛa, tee kɛa mą́ą́ ŋį́ pɛli pə́lə́ tawolo kɛi tiikpə.

²¹ Gáá kɛa pai lii yali bulu hva kɛ ɉu. Kɛɛnąą kpinɛ̨ɛ̨ nuą pɔ taai.

²² Ɓɛi nąą yələwala kaa a ɉu kpinɛ̨ɛ̨, ɓɛi haa a nąą kpinį a yələ kəlee. Nąą yələ ɓɔɔ ə ɓo a kpinį hu tɛɠiɛ.

Lean sinn:

Ceanglaichean taic

Sanasan