Zôo 1 - Yálá laawoo hɛɓɛɈobə nwɔ mɔ̨nɔ̨ɠaa 1 Nu ta ə wɔlɔ kɛ Usə lɔi hu, a hulɔnu ta, diɛ kɛ mą: Ɉobə. Ə kɛ a nui dúwɔ́ pələ lɛlɛɛ, nwɔ mɛ̨nį haŋąą; yɛ ɲɔw Yálá ɓa, ɛlɛɛ, yɛ mąą kwɛa mɛ̨nį ɲɔ̨n ma. 2 Ɉulɔnui ti lon ɉinąą di kɛ mɛ̨ihveelɛ, non nɛ̨ąą di ɓo haaɓa. 3 Ɓɛlaa waa mɛ̨ihveelɛ ə kɛ ɉulɔnui ti yəi, da ɲɔ̨nwɔmɛ̨ɛ̨ waa haaɓa, ə lɛɛ, nįŋɛ̨ heei hveelɛ hveelɛ nwun nɔɔli, hoohvaalən ɉaa nwun nɔɔli, koló kɛ nu kpulu kɛnɛ̨ ə ɓo ɲəi. Ɉulɔnui ti ə kɛ a nu kɛnɛ̨ dɛɛ hvóló kulɔi pələ nuą kəlee diɛ. 4 Nonnii hinąą di kɛi tɛɛ di kee ni pɔɔli a ɲɛli, diɛ hɛli pu, ə lɛɛ, diɛ di mąąhalani haaɓai təli ɉɛli kɔ̨nɔ̨n ma. 5 Da kpɛɛ kɛa a ɉɛli laa hvilɛn ŋąą, di nąn ə kɛi di təli yɛ di mąąhəɠə haláá kulɔ. A muhəɠə kɛ yələwala pɔ, haláá yii da gəlee, yɛ gulɔ di tɛitɛi di mąą mɛ̨nį ɓa. Mąąhɔlɔɓo, ə kɛi kɛ diɛ gwəi pələ «Nónnii daa kiɛ ləi nɛ̨ŋɛ̨n ɉəɠə di tɛɠi pələ, diɛ Yálá nwąnąlɔ.» Bələ ɓə Ɉobə ə kɛi gɛ la a yələ kəlee. Yálá-taa mɛ̨nį 6 Yələ ta, malakaɠaa di kɛi li Yai-Laa lííla, ɓilihi yaa kpɛli ə lɛɛ di lɔwai, di pa. 7 Yai-Laa yɛ ɓilihi ɓa: «Ə́ həɠə mį pələ?» Yili ə nwoo pulu pənə yɛ mą: «Ŋą́ həɠə gɔ́wɔ hu hiɛi lɔi mɛ̨i, gɛ́ nąą mąątinɛ̨n.» 8 Yai-Laa ə mo mą, yɛ mą: «Ə́ nwɔ́ tímun Ɉobə kaa? Ɲɔ̨nwɔ̨mąn və lɔi mɛ̨i. Gaa a nui dúwɔ́ pələ lɛlɛɛ, ə lɛɛ, nwɔ mɛ̨nį haŋąą, yɛ ɲɔw Yálá ɓa, yɛ mąąkwɛa mɛ̨nį ɲɔ̨n ma.» 9 Kɛlaa, ɓilihi ə Yai-Laa woo pulu pənə, yɛ mą: «Ɉobə a ɲɔw mɔ̨ɔ̨ Yálá ɓa kpɛli-kpɛli? 10 Kɛlɛi yáá ə́ nįnįn bɛlɛ mɛ̨i, yaa mąn da nwɔ pɛ́lɛ́i, ə lɛɛ, da ɲəi hɛnŋąą kəlee. Yáá lúwɔ́ too ɲəi hɛnŋąą kəlee ɓa: nwɔ taatɛlɛɛ kpului hu kɛnɛ̨ nɔi nąą kəlee. 11 Kɛlaa, ɉɛnŋąą tii ɲəi, hvaa lɔ mąą di kala, a tɛ̨ą kpɔ-kpɔɔ, gɛ́ diɛ: Gaa pai ə́ nɛ̨ŋɛ̨n naai ə́ ɲɛ̨i kwəleen ma.» 12 Gɛɛ ti, Yai-Laa yɛ ɓilihi ɓa: «Yá pɛli yili kɛi, yá pɛli ɲəi hɛnŋąą kəlee həɠəi. Kɛlaa, hvo lɛɠɛ gbinį ɓa.» Gɛɛ ti ɓilihi ə həɠə laa yɛ li. Ɉobə nwɔ mɔ̨nɔ̨ dɔlɔɔɠaa 13 Yələ ta, Ɉobə lonnii hinąą da nɛ̨ąą di kɛi kɔ̨nɔ̨n mįi, diɛ di kpələ di liɛ nu pɔlɔ pɔɔli, 14 kɛla ta ə pa Ɉobə pɔ yɛ mą: «Ə́ wɔ Nįŋɛ̨ɠaai di kɛi kɛɛ hin, ɉoohvaalən ɉaaɠaa di ɓo di kwɛlɛ diɛ di la mįi, 15 Saba nuą di pa di too di mɛ̨i di di həɠə, di ə́ wɔ tínuąi kəlee paa, ɲą́ą́ dɔ̨nɔ̨ lɔ ɓə kulɔ gɛ́ pa nwɛlɛɛ ɓoi yɛ́.» 16 Ə lɛɛ lɔ nwoo hukulɔi, da kpɛli ə pa, yɛ diɛ: «Yələ gbąnąą aa too mɛlaaɠaa diɛ, aa di paa, da di mɛ̨i kaa nuą kəlee, aa di kəlee di kələn; ɲą́ą́ dɔ̨nɔ̨ lɔ ɓə kulɔ ɉu, gɛ́ pa nwɛlɛɛ ɓoi.» 17 Yili ə lɛɛ lɔ nwɔ̨nɔ̨ nwoo hukulɔi, da kpɛli ə pa, yɛ diɛ: «Kalde nuą kpulu heei haaɓa, di wolo ə́ wɔ ɲɔ̨nwɔmɛ̨ɛ̨ɠaai diɛ, di ə́ wɔ tínuąi paa, di ɲɔ̨nwɔmɛ̨ɛ̨ɠaa həɠə; Ɲą́ą́ dɔ̨nɔ̨ lɔ ɓə kulɔ ɉu, gɛ́ pa nwɛlɛɛ ɓoi.» 18 Yili ə lɛɛ lɔ nwɔ̨nɔ̨ nwoo hukulɔi, da kpɛli ə pa, yɛ diɛ: «Ə́ lon ɉinąą da ə́ lon nɛ̨ąą di lɛɛ lɔ kɔ̨nɔ̨n mįi, diɛ di kpələ, di liɛ nu pɔlɔ yəi bɛlɛ́n, 19 hvaŋą kɛnɛ̨ ta ə həɠə nɔi pun ɉu pələ, ə hee bɛlɛ ɓa nąą kəlee; ə pu di mɛ̨i, gəlee di haa; Ɲą́ą́ dɔ̨nɔ̨ lɔ ɓə kulɔ, gɛ́ pa nwɛlɛɛ ɓoi.» 20 Nąąlɔwai, Ɉobə ə nɛɛmą ə muhəɠə ə tɔɔ, ə nwɔ biliɉui huɓɛla, di nwun gbəlaan mo, ə too nɔi ɓa, ə kwɛli hvilɛn Yálá ɓa. 21 Yɛ diɛ: «Bələi lɔ néé ə gaa la a gbúwulu, bələ lɔ ɓə gáá pai pənəi la. Yai-Laa ɓə gɔ́. Yai-Laa ɓə pənə ə ɉəɠə. Mąąwiɛ ə kɛ Yai-Laa laa ɓa.» 22 Mɛ̨nįɠaai ti kəlee hu, Ɉobə hvo nɛ̨ŋɛ̨n ɉəɠə, hvo woo ɲɔ̨n mo Yálá laa mɛ̨i. |