Zĩi 1 - Yálá laawoo hɛɓɛ

Túwɔ́-woo

¹ Ɲą́ą́ Ɉakə, Yálá ŋą tímun da Ną́mu Jesus Kristə, gáá ɉɛɓɛ́i ŋɛ̨i tɛɛi Israɛlə nu huwu pow kɔw hveelɛi ɓa, diɛi, di taɠa-taɠaa yɛnɛ̨ɛ̨ nąą kəlee; gáá ká túwɔ́ ɓoi.

Mąąhəɠə laa hɔlɔɓoɔ hukɔɔn mɛ̨nį hu

² Ną́n nonnii, hu kɔ́ɔn mɛ̨nįɠaa da həli kaa, 'ká ká kwəinɛ̨ɛ̨ gəlee hu;

³ 'Ká kili ə pu kani ɉu, káá, hukɔɔn mɛ̨nįɠaai a həli ká wɔ laa na laa ɓa, a kɛ a ɉuwalawala hɛn.

⁴ Kɛlaa, ká tɔɔ a ká nwąnąi, ká wɔ liikpələlaa ə too pono ŋą, ə gɛ ka mąą mɛ̨nį laa ə kulɔ kpɔ a neelee, ká hvo hvɛɠɛ a hɛn nɔpee ta.

Laa na hvɛli woo

⁵ Akɛ, ká ta a hvɛɠɛ a mɛ̨nį kɔlɔn gilii, ə vɛli Yálá ɓa, nwɛi, a dɛɛ nu kəlee pɔ a gwəinɛ̨ɛ̨, hva haŋąn mą, a tɛɛ mąą nu pɔ.

⁶ Kɛlaa, mąą nu ə vɛli a laa na laa, ɲinɛ̨n-ɲinɛ̨n və kɛ ɉu; mąąhɔlɔɓo, nui a ɲinɛ̨n-ɲinɛ̨n gɛ pələ kaa yɛ, laakpala yii hvaŋą a ɲɛ̨i pənə ɓɛ pələi lɔpee gaa bɔ.

⁷ Nu taaləi ti, hvo giliŋąhiɛ yɛ kɛ, gaa pai hɛn da hɔlɔɓoi gu Nąmu ɲəi;

⁸ ɛlɛɛ, hvo laa li gɛ-mɛ̨nį lɔpee ta la, yili pulu, tɔɔ kpąą laa hvo ɲəi.

Yeehowolomun da hɛn gɔw nąmu

⁹ Kristalon wɔ yɛnɛ̨ɛ̨ pɛliɛ mą, mąą mɛ̨nį nwąną mɛ̨nį ə kɛ a nwɔɔ ɲɛ̨i pono;

¹⁰ ɛlɛɛ, kristalon a hɛn gɔw nąmu, yaa kpɛlimąn, da mąąyɛɛ, yili ə kɛ a nwɔɔ ɲɛ̨i pono, mąąhɔlɔɓo, hɛn nąmu laa a tɛɛ yɛ bələi wulu powa a kulɔ la ɲəi.

¹¹ Hvo gaai, hvóló a kulɔ a nwəleen gɛnɛ̨, a gala kpala, bowa ə kulɔ ɲəi, nwɔ nɛlɛ laa ə kulɔ ɲəi. Bələ kpɔlɔɔ ɓə hɛn gɔw nąmu a kulɔ la, nwɔ hɛn gɔw lɔwai.

Yɛnɛ̨ɛ̨ kɛɛ hukɔ́ɔn mɛ̨nį hu

¹² Nwun na nɛ̨ɛ̨mun maa, nui a tɔɔ a nwalawalaa hukɔ́ɔn mɛ̨nį hu, mąąhɔlɔɓo, nui daa mąąkpɛɛ tii, a wala too, a yɛnɛ̨ɛ̨ hva kpɛɛ hɔlɔɓo a nwun ma ɓɔlɔ, yai, naakwɛlanmoɔi Yálá wɛli la kɛ nuą diɛ.

¹³ Nui lɔpee, ɲąąhɛn mɛ̨nį a həli mą, hvo kɛ diɛ: «Yálá ɓə ɲą́ą́hɛn.» Mąąhɔlɔɓo, mɛ̨ni ɲɔ̨n gɛ kili hva too Yálá ɓa, ɛlɛɛ, hva pɛli nu ɲąąhɛŋi.

¹⁴ Nu tɛitɛi nwɔ ɲąąhɛn mɛ̨nį a kulɔ, nwɔ ɲɛ̨i kulɔ bɔ hu, yɛ ɲąąnɛ̨nɛ̨n, yɛ ɲɛ̨ikwɛli.

¹⁵ Ɲɛ̨i kulɔbɔ a koo həɠə, ə naayɛɛ a nɛ̨ŋɛ̨n, nɛ̨ŋɛ̨n a pɔlɔ, ə naayɛɛ a haa.

¹⁶ Ną́n nonnii, 'ká hvo ká kpɔwɔ ɓɔwo, nwɛ́likɛmąą nuą.

¹⁷ Mɛ̨inɛ̨ɛ̨ kəlee, da nukpɔɔlaa hɛn nɛlɛɛɠaa kəlee, da həɠə yələi pələ, kɛɛpono Nąn bɔ, yai, gɛ pələ mąą hva hvalin, nįnįn nɔpee hvo nąą ta.

¹⁸ Yaa kpinįi niiɓa hu ɓə, ə gu kaa la a lon, tɛ̨ą woo háálai, əgɛ, gu kɛ a ŋą pɛli hɛn dɔlɔɔɠaa.

'Ká mɛ̨nį mɛ̨n, 'ká bɔ mɛ̨nį kɛ

¹⁹ Nąn nonnii nwɛ́likɛmąą nuą, ká káá a kilimąą nuą. 'Ká ká mąą hulɔ, mɛ̨nį mɛ̨n mɛ̨nį ɓa ɉa, kɛlaa, 'ká hvo humo a hvaa ɉa, 'ká hvo ká lííholi ɉa,

²⁰ gbala ə too, nu ŋą lííholi hva Yálá ŋą tələnmolaa pɔ mɛ̨nį kɛ.

²¹ Yili ɓa tii, 'ká ká yee kulɔ mąąliɓi mɛ̨nįɠaa hu, da lííholi mɛ̨nįɠaa, Nwoo ŋɛ̨i ɉinŋąą ká hui, yai a pɛli ə ká ɓaloi, 'ká ká yee hee mu a lii nɛ̨ɛ̨ gwəilaa.

²² Kɛlaa, 'ká kɛ a Yálá laa woo pɔ yíiɓo nuą, ɛlɛɛ, 'ká hvo kɛ a nuąi da di wəli tɔɔ, diɛ di kpɔwɔ ɓowo.

²³ Gbala ə tɔɔ, nui a nwəli tɔɔ Yálá laa woo ɓa, ɛlɛɛ, hva bɔ mɛ̨nį kɛ, gaa lɔ yɛ, nui a gbɔwɔ kaa pɛnɛ̨n ɉu,

²⁴ a kpɛɛ a gbɔwɔ kaa tii, a lii, aa mąn lɛ̨ą bələi ɲɛ̨ilai ə kɛ la, mą.

²⁵ Kɛlaa yaamun, nui a ɲɛ̨i hee dɔn gbɔ-kpɔɔ hu, yai a nu lɛɛ gbɔwɔ ɓa, hva ɲɛ̨i hee lɔ ɉu, ɉee wɛli ɓa, mąą nu a bɔ mɛ̨nį kɛi, a nwun na nɛ̨ɛ̨ hɔlɔɓo bɔ yíiɓoɔ hu.

²⁶ Kɛlaa, nu ta a gbɔwɔ kɛ a Yálá kɔ́lɔn mun, a wala nɛ̨n dɔɔ vaa woo tɔwɔ, akɛtii gaa gbɔwɔ ɓowoi, hvo Yálá kɔ́lɔn.

²⁷ Yálá kɔ́lɔn bələi mąąhəɠɛɛ, ɉaŋąa gu Ną́n Yálá ɲɛ̨i ɓa, ya ɓaa: Nu yɛ kpɔnmąą tɛɛ təlilɛaa da galaninŋaa pɔ di wɔ mɔ̨nɔ̨ hu; yɛ gbɔwɔ huhon yɛnɛ̨ɛ̨ hu, hvo pa kɔhɔɓo.