Zɛnɛse 39 - Yálá laawoo hɛɓɛɈosɛfə ə kɛ Potifarə yəi bɛlɛ́n 1 Ismaɛlə nuą ŋɛ̨i Ɉosɛfə həɠə diɛ li la Eziptə lɔi hu, di nɔwɔtɔɔ Potifarə ɓa. Potifarə ɓə kɛ a Eziptə tɔɔmun nwɔ tɔɔ kwəli mąąkpɛ nuą nwun nąmu. 2 Yai-Laa ə kɛ Ɉosɛfə pɔ, yili ɓə gɛ, mɛ̨nįi lɔpee ə kɛi ɲee too ɉu, gəlee hu ə kɛi nɛ̨ɛ̨. Ɉosɛfə ə kɛ lɔ Potifarə yəi bɛlɛ́n. 3 Potifarə ə gaa yɛ, Yai-Laa kaa Ɉosɛfə pɔ, mɛ̨nįi a ɲee too ɉu, ɉu a nɛ̨ɛ̨, 4 yili ə Potifarə kwəinɛ̨ɛ̨ kpɔ kɛnɛ̨, ə Ɉosɛfə kɛ kɛa a ɲəi bɛlɛ́n ɉɛnŋąą kəlee mɛ̨i kaamun. 5 Ə həɠə kɛa nąąlɔwai ɓa, Ɉosɛfə mąą mɛ̨nį ɓa, Yai-Laa ə Potifarə yəi bɛlɛ́n da ɲəi ɲɛa hɛnŋąą kəlee ŋąą nɛ̨ɛ̨. 6 Potifarə ə ɲəi bɛlɛ́n mɛ̨nį kəlee lɛɛ Ɉosɛfə yee kɔ́nma. Ɉosɛfə ɓə mɛ̨nį kəlee ə kɛ na bɛlɛ́n, hvo kɛli lɔ gbɔɔ-kpɔɔ kɔ̨nɔ̨n mɛ̨nį. Ɉosɛfə lɛlɛɛ kpɔ kɛ nąą kəlee. Potifarə nɛ̨ą ə wolo Ɉosɛfə ɓa, 7 Yələ ta, Ɉosɛfə nwɔ mɛ̨nį nąmu nɛ̨ą ɲɛ̨i ə kulɔ bɔ, yɛ mą: «'Pa gu láá.» 8 Ɉosɛfə yɛ mą: «Vá pɛli mą! Nwɔ́ mɛ̨nį nąmu aa gilitɔɔ mą́ą́, aa ɲəi hɛnŋąą kəlee lɛɛ ɲéé kɔ́nma. 9 Ɲəi bɛlɛ́n ɓɛ, ɲą́ą́ ɓə mɛ̨nį kəlee kaa ná, hvo tɔ́n dɔɔ li mą́ą́ mɛ̨nį ta hu, hvo kɛli lɔ yɛ́ ɓə vá lɛɠɛ yɛ́, mąąhɔlɔɓo, nɛ̨ą ɓaa a yɛ́. Ŋą́ həɠə pələ kɛ ləi, gɛ́ li mɛ̨nį ɲɔ̨n gɛi, gɛ́ nɛ̨ŋɛ̨n ɉəɠə Yálá ɓa?» 10 Bələi mąn Ɉosɛfə ə mo la tii, yələ kəlee, nɛ̨ɛ̨nui ə kɛ lɔ Ɉosɛfə pulu, kɛlaa, Ɉosɛfə hvo hvaa nwoo ɓa. 11 Yələ ta, Ɉosɛfə ə lɔ bɛlɛ́n, yɛ kolóɠaa kɛ, nu takpɛli hvo kɛ nąą bɛlɛ́n. 12 Potifarə nɛ̨ą ə niikpələ kpɔ ə wolo Ɉosɛfə ɓa, ə ɉon a ɉəɠə, yɛ mą: «Hvó kɛli yá hvaa mą gu láá háákələi.» Ɉosɛfə ə ɲee kulɔ ɉəɠə hu, ə nɛɛ ɲəi, ə tɛɛ a gilɛ, ə kulɔ bɛlɛ́n. 13 Yii kɛa nɛ̨ɛ̨nui ə gaa yɛ, yili aa mąą həɠə lɛɛ ɲəi aa pu, 14 ə tómą yɛ kɛa bɛlɛ́n nuą təli, yɛ kɛ mą: «'Ka pa-oo! Ka pa-oo! 'Ka pa ka ɓɛ kaa! Hebreu hulɔnon ŋɛ̨i ɉílɛ ə paa la ɓɛ, aa kpɔlu ná, yɛ kwa yaa ku láá, kɛlaa, yii kɛa ŋį́ kɛi tomą, 15 aa mąn mąą həɠə lɛɛ puu ni gwɛ́lɛ, aa pu aa kulɔ bɛlɛ́n.» 16 Ə Ɉosɛfə nwɔ həɠəi laaikɛ, ə lɛɛ ɉu, ɉilɛ ə pa. 17 Ɉilɛ paa kɛa, ə tɔɔ nwoo ɓa ə ɉukulɔ mą, yɛ mą: «Hebreu luwɔ hilɛi ŋɛ̨i ə́ paa la ɓɛ, ya ka pa woloi mą́ą́, yɛ kwa yaa ku láá. 18 Kɛlaa, yii kɛa ŋį́ tómą kɛnɛ̨, gɛ́ nuą təli, ə mąą həɠə lɛɛ gwɛ́lɛ, ə tɛɛ a gilɛ.» 19 Ɓɛlɔwai Potifarə nɛ̨ą ə nwoo hukulɔi tii kɛ la mą yɛ hvilɛn Ɉosɛfə ɓa, nii ə kələn gbɔ gwəi kɛnɛ̨. 20 Ə mo di Ɉosɛfə hon, di doo gaho ŋą, ɓɛi tɔɔmun nwɔ gaho nąmįnąi di kɛ laa. Ɉosɛfə kaa gaho pɛlɛ́ mu 21 Bələi mąn Ɉosɛfə ə kɛ la laa gaho pɛlɛ́ mu, Yai-Laa ə kɛ lɔ bɔ, ə ɲɛ̨i lɛlɛɛ hee mą, Ɉosɛfə wɛli ə too gaho pɛlɛ́ mɛ̨i kaamun ma. 22 Yili ə Ɉosɛfə kɛ a gaho nąmįną kəlee mɛ̨i kaamun. Koló mɛ̨nį a kɛ laa, Ɉosɛfə ɓə kɛi nuą tɔɔ, mɛ̨nį kəlee yɛ ɓo na. 23 Mɛ̨nįɠaai kpɔ kɛ a gaho pɛlɛ́ nwun nąmu kɛ kóló, ə gəlee lɛɛ Ɉosɛfə yəi, mąąhɔlɔɓo, Yai-Laa ə kɛ Ɉosɛfə pɔ, yɛ nwɔ mɛ̨nį kəlee hu nɛ̨ɛ̨. |