Zasua 1 - Yálá laawoo hɛɓɛ

Ɉosue ə Moisə mąąhvaalin

¹ Yai-Laa nwɔ tímun Moisə haa pulu, nąąlɔwai, Yai-Laa yɛ Moisə pɔ mun Nun lon Ɉosue ɓa:

² «Nwɔ́ tímun Moisə aa haa; yili ɓa tii, ə́ muhəɠə ə́ tɔɔ nuą tɔwɔ ka diɛni ka Ɉurdɛn yái ŋɛ̨i teen. Nɔi ŋɛ̨i ŋį́ naakwɛlanmo Israɛlə lonnii diɛ, ka li ɉu.

³ Ɓɛi lɔpee ka kɔ́wɔ a hvilɛn nąą, ŋą́ dɛɛ ka pɔ, yɛ bələi ŋį́ mo la Moisə ɓa.

⁴ Ə́ həɠə kpɔ ɓɛ Liban nɔi pun ma, ə həli la Eufratə ɲá lee ɓa; Hɛtə nuą di wɔ lɔi kəlee ə həli la gboloyá kɛnɛ̨ ɓa voló tooi pələ, yili ɓə pai kɛi a ka wɔ lɔi.

⁵ Ə́ yíi hvóló kəlee hu, nui lɔpee ta hvo pai tɔɔi ə́ la. Bələi lɔ tii ŋį́ kɛ la Moisə pɔ, bələ lɔ ɓə gáá kɛi la ə́ pɔ. Vá gíli kulɔ ə́ hu, vá ə́ lɛɛ laa.

⁶ Ə́ liikpələ, ə́ ə́ huwalawala; mąąhɔlɔɓo, yɛ́ ɓə pai nɔi tii tɛɛi nuąi ŋɛ̨i pɔ a di kwɛlin, yɛ bələi ŋį́ gwɛ́la la di nąnni diɛ, gɛ́ diɛ: ‹Ŋą́ dɛɛ ka pɔ.›

⁷ Yii mąąnɛ̨ɛ̨ ə́ gɛ, ya ɓaa ə́ ə́ liikpələ, ə́ ə́ huwalawala, dɔ́n ŋɛ̨i ŋį́ mą́ą́ pamą nwɔ́ tímun Moisə ɓa, ə́ túwɔ́ pələ ə pɛli dɔ́n tii ɓa. Hvó həɠə mɛ̨i hvó li ɓɛ pələ da ɓɛ pələ, yili ɓə a gɛ, ə́ kɛ mɛ̨nį kəlee hu ə nɛ̨ɛ̨ ɓɛi ə kaa lii laa.

⁸ 'Gɛ pələ kwɛli mą, dɔ́n ɉɛɓɛ́i ŋɛ̨i, hvó kpəla moɔ ɓa, yɛ́ ə́ kiliŋąhiɛ mą a hvóló da kpinį. Ya ɓə a gɛ ə́ pɛli túwɔ́i yɛ dɔ́n tii hvaa woo. Yili pɔ pələ ɓə, ə́ yee kɔ̨nwɔ̨n ɉu a ɓɛlɛ́ la, ə́ yee yɛ tɛɛ ə́ kɛ mɛ̨nįɠaa diɛ.

⁹ Kɛlaa ŋą́ą́ mą́ą́ pamą la yɛ́-ee! Ə́ liikpələ, ə́ ə́ huwalawala, 'ə́ mąą hvo kpɛlin, 'hvó ɲɔw; mąąhɔlɔɓo Yai-Laa ə́ wɔ Yálá kaa pai kɛi ə́ pɔ ɓɛi lɔpee yá li laa.»

Ɉosue da nuą di di kɛ pələ pɛli ɲá teen mɛ̨nį ɓa

¹⁰ Nąąlɔwai, Ɉosue ə mo ɲɛ̨itɔwɔ nuą diɛ, yɛ diɛ:

¹¹ «Ka tɛɛ daa nąą kəlee, kaa nuą diɛ: ‹Ka kɔnɔ̨nŋaa pɛli, mąąhɔlɔɓo hvóló haaɓa yeemu, gu kaa pai Ɉurdɛn yái ŋɛ̨i tee ɉii, nɔi ŋɛ̨i Yai-Laa ka wɔ Yálá ə dɛɛ ka pɔ ka nąą hɔlɔɓo a ka wɔɔ.›»

¹² Yili pulu, Rubɛn nu huwu, Gadə nu huwu, da Manase nu huwu bələ tɔ̨nɔ̨, Ɉosue yɛ diɛ:

¹³ «Diɓoi ŋɛ̨i Yai-Laa nwɔ tímun Moisə ə dɛɛ ka pɔ, ka ka kili lɛɛ ɉu; ɓɛlɔwai ə kɛ la kaa: Yai-Laa ka wɔ Yálá a hvįįtɔɔ tɛɛ ka pɔ, a nɔi ŋɛ̨i tɛɛ ka pɔ.

¹⁴ Ka nɛ̨ąni ka lonnii da ka wɔ taatɛlɛɛɠaai, di kaa lɛɛi nɔi, ɓɛi Moisə ə nąą tɛɛ ka pɔ, Ɉurdɛn pulu pələ. Yili ɓa kaa ŋɛ̨i a ɉinąą, kaai kpɔ a kulaa walawalaɠaa, ka ka hąą yili, ka tɛɛ ka kaayɔwɔɠaa tɔwɔ, ka kpɔn mąą tɛɛ di pɔ,

¹⁵ ə lɛɛ ɉu, Yai-Laa ə hvįįtɔɔ tɛɛ di pɔ, yɛ kaa, di di wɔ lɔi hɔlɔɓo diɛ kpɛli. Nɔi ŋɛ̨i Yai-Laa ka wɔ Yálá ə dɛɛ ka pɔ ɉu. Yili pulu, ka pənə ka pa, ka hee ka wɔ lɔi hu, ɓɛi Yai-Laa nwɔ tímun Moisə ə nąą tɛɛ ka pɔ a ka wɔɔ Ɉurdɛn yá pulu voló həɠəi pələ.»

¹⁶ Di kəlee diɛ Ɉosue ɓa: «Yiiɠaai kpɔ ə́ mo kuɔ, ku yee kaa gəlee mu, ku kaa gɛi; ɓɛi lɔpee ya ku tɔɔ la, kwa li laa.

¹⁷ Pələi lɔ ku kɛ la Moisə woo ŋą, mɛ̨nį kəlee hu, bələ lɔ ɓə ku kaa gɛi la a yɛ́. A tɛ̨ą, Yai-Laa ə́ wɔ Yálai kaa pai kɛi ə́ pɔ, yɛ bələi ə kɛ la Moisə pɔ.

¹⁸ Nui lɔpee pai kulɔi ə́ woo mu, ə gwɛli tee yɛ́, yii ya ku tí la, a wala gɛ, mąą nu a haa. Yii lɔ ə́ kaa gɛi, ə́ liikpələ, ə́ ə́ huwalawala.»