Rutə 1 - Yálá laawoo hɛɓɛMɛ̨nį nwąnąąi laa Elimelɛkə yəi bɛlɛ́n nuą diɛ 1 Ɓɛlɔwai gulaaɠaa di kɛi tɔɔ la Israɛlə lonnii ɲɛ̨i tɔwɔ, nąąlɔwai, pulu kɛnɛ̨ ə too Israɛlə lɔi hu. Ɉuda taa logolo ta ə kɛ laa diɛ kɛ mą: Bɛtleɛmə, hulɔnu ta ə həɠə daai tii hu, yaa, nɛ̨ą da non ɉinąą hveelɛ; di li Moabə lɔi hu, ɓɛi hihɛn a lɛlɛ laa, di hee ɲɛɛ kɔ́wɔ ta hu. 2 Ɉulɔnui tii laa ɓaa kɛ a Elimelɛkə, nɛ̨ą laa ɓaa a Naomi di lon ɉinąą hveelɛi tii laa ɓaa kɛ a: Malɔn da Kiliɔn; di kɛ a Ɛfrata huwu, Bɛtleɛmə daai Ɉuda lɔi hu. Ɓɛlɔwai di kɛ la Moabə lɔi hu, 3 Naomi ɉilɛ Elimelɛkə ə haa, Naomi da non ɉinąą hveelɛi di lɛɛ. 4 Non ɉinąą hveelɛi tii di Moabə lɔi hu, nɛ̨ąą hveelɛ həɠə a di nɛ̨ąni, dɔ̨nɔ̨ nwɛi laa ɓaa kɛ a Orpa, dɔ̨nɔ̨ yaan nwɛi laa ɓaa a Rutə. Da diɛni di kwɛlan bow kɛ di kee ɓa, 5 Malɔn da Kiliɔn diɛ kpɛli di haa. Naomi ə hvɛɠɛ a ɉilɛ da non ɉinąą hveelɛi, yaa tɔ̨nɔ̨ ə lɛɛ. Rutə ə lɛɛ Naomi pɔ di li Bɛtleɛmə 6 Nąąlɔwai, Naomi da non nɛ̨ąni hveelɛi tii di həɠə Moabə lɔi hu diɛ li, mąąhɔlɔɓo, Naomi ə lɛɛ Moabə lɔi hu ə mɛ̨n diɛ mą: Yai-Laa aa ɲɛ̨i lɛlɛɛ hee nwɔ lɔi nuą diɛ, aa kɔ̨nɔ̨n dɛɛ di pɔ. 7 Naomi ə həɠə ɓɛi ə kɛ laa, da non nɛ̨ąni diɛ li Ɉuda lɔi hu. 8 Naomi ə mo non nɛ̨ąni hveelɛi tii diɛ yɛ diɛ: «Nu kəlee ə pənə ə li nee pɔ. Yai-Laa ə mɛ̨nį lɛlɛɛ kɛ kaa, yɛ bələi ka gɛ la a ɲą́ą́ da yiiɠaa daa haai. 9 Yai-Laa, ə hvaa mą ka hinąą lɛlɛɛ hɔlɔɓo, ka heei ə lɛlɛ ka mɛ̨inɛ̨ɛ̨ hɔlɔɓo di yəi bɛlɛ́n.» Naomi ə naa pɛlɛ di laa ɓa, nɛ̨ą tii di bumą a wɔlɔ, di wɔlɔ kpɔ a mɔlɔ, 10 diɛ Naomi ɓa: «Kpaa! Ku kaa lɛɛi ə pulu gwəli ə́ wɔ nuą pɔ.» 11 Naomi yɛ diɛ: «Nónnii, ka pənə ka li, lə mɛ̨nį ɓa ka káá bɔ gwa kaa ni gwəli! Və́ kɛa pai pənəi və́ lon ɉinąą takpɛli hɔlɔɓo yiiɠaai, da pɛli di kɛ a ka hilɛni. 12 Nónnii, ka pənə ka li, mąąhɔlɔɓo, bɔ́lɔɔi kɛa, vá pɛli pənəi və́ hee hulɔnu takpɛli nwuɔ̨, ‹ə mą kɛ gáá bɔ ŋį́ hee hulɔnu nwuɔ̨ a nįnɛ̨, gbinį tɔ̨nɔ̨i ŋɛ̨i yee mu, kwa yaa ku lɔ pɛlɛ́n, ku lon ɉinąą hɔlɔɓo›, 13 ka pɛli ka lənə hilɛ takpɛli həɠə mɛ̨nį ɓa, ka hee ka di mąąkpɔn di kɛnɛ̨? Kpaa! Nónnii! Mąąhɔlɔɓo, mɛ̨nįi aa laa mą́ą́, nwąnąąi dɛɛ ka wɛi ɓa, ɲą́ą́ ka tii Yai-Laa aa gɛ́lɛ.» 14 Nɛ̨ą tii di pənə di bumą a wɔlɔ, di wɔlɔ kpɔ a mɔlɔ; Orpa ə naa pɛlɛ ɉilɛ lee laa ɓa, ə yələ wala too mą. Rutə nwɛi, ə kanąn ɉilɛ lee ɓa. 15 Nąąlɔwai, Naomi ə mo Rutə ɓa yɛ mą: «Ə́ ɓɛlan ga tii aa pənə yɛ li, nwɔ nuą pɔ da di wɔ haliɠaai; 'hvilɛn bulu ka yáá ka li.» 16 Rutə yɛ Naomi ɓa: «'Hvó gbɛ́ ə́ pulu. Ɓɛi yá lɔ laa, nąą ɓə gáá lɔi laa; ɓɛi yá hee laa, nąą ɓə ŋą́ hee laa. Ə́ wɔ́ nuą da kɛ a nwɔ́ nuą. Ə́ wɔ Yálá ə́ kɛ a nwɔ́ Yálá. 17 Ɓɛi yá haa laa, nąą ɓə ŋą́ haa la di nóó laa. Akɛ haa a wala gu ɓɛlaɓo, ŋą́ həɠə ə́ pulu, Yai-Laa hvo mɛ̨́i kaa, akɛ ŋą́ həɠə ə́ pulu, ŋą́ həɠə gbə́lə yá ɲɛ̨i tɔwɔ.» 18 Yii kɛa Naomi ə gaa yɛ Rutə aa nwąnąąi pu ɉu, hvo kɛa hvaa bɔ. 19 Di nu hveelɛi di lɛɛ di kee pɔ diɛ li Bɛtleɛmə daai. Daai nuą kəlee kwəi ə pili diɛ di mąą mɛ̨nį ɓa, nɛ̨ą kəlee diɛ mą: «Ə́í! A kɛ tii Naomi li?» 20 Kɛlaa, Naomi ə mo diɛ yɛ diɛ: «'Ká hvo kɛa də́li a Naomi laa; 'ká kɛ mą́ą́ Mara, mąąhɔlɔɓo, Huwalawala Kəlee Nąmu Yálá aa mɛ̨nį ɲąąnwąnąą laa mą́ą́. 21 Gɛ́ɛ́ həɠəi ɓɛ gə́ li, ɲéé laahvɛɛ kɛ, kɛlaa, Yai-Laa aa pənə aa pa a ɲą́ą́ a ɲéé howolo. Ka hvo kɛa kɛ mą́ą́ Naomi, mąąhɔlɔɓo, Yai-Laa aa ɲɛ̨i ɲɔ̨nwɔ̨ɔ̨ hee mą́ą́, Huwalawala Kəlee Nąmu Yálá aa mɛ̨nį ɲąąnwąnąą laa mą́ą́.» 22 Bələ ɓə Naomi da non nɛ̨ą Rutə ŋɛ̨i kɛ a Moabə lɔi hu mun, di paa la Bɛtleɛmə daai a di wɔ kpai teei lɔwai kɔ́wɔ tɔɔi. |