Nehemi 10 - Yálá laawoo hɛɓɛ

Nuą di di woo kwɛlɛ Yálá ɓa diɛ da tii mą

¹ Mɛ̨nįɠaai tii mąą mɛ̨nį ɓa, ku kaa ku kwɛlai a nwalawala ku bu hɛɓɛ́ hu, nu kɛnɛ̨ ə ɲee pɔɔ too ɉu. Ku ɲɛ̨itɔwɔ nuą, Levi huwuhu nuą da ku wɔ haláá laa həli nuą, di laa kaa ɉu.

² Nuąi di yeepɔɔ too ɉɛɓɛ́i tii hu, diɛ ka: Nehemi, nɔi ɲąąwooɓomun, Hakalia lon, Sidkiya,

³ Seraya, Azaria, Yirmeya,

⁴ Pasehurə, Amaria, Malkiya,

⁵ Hatusə, Sevania, Malukə,

⁶ Harimə, Meremotə, Ovadia,

⁷ Daniɛlə, Ginetɔn, Barukə,

⁸ Mesulamə, Aviya, Miyaminə,

⁹ Maazia, Bilgai, Semaya: ɉaláá laa həli nuą ka tii.

¹⁰ Levi huwuhu nuą ka: Yesua, Azania lon, Binui yai kɛ a Henadadə lon da Kadmiɛlə,

¹¹ da nąn nonnii: Sevania, Hodiya, Kelita, Pelaya, Hanan,

¹² Mika, Rehɔvə, Hasavia,

¹³ Ɉakurə, Serevia, Sevania,

¹⁴ Hodiya, Bani, Beninu.

¹⁵ Nɔi kalanɉonŋąą laa ka: Pareɔsə, Pahatə-Moabə, Elamə, Ɉatu, Bani,

¹⁶ Buni, Azgadə, Bevai,

¹⁷ Adoniya, Bigwai, Adin,

¹⁸ Aterə, Hizkiya, Azurə,

¹⁹ Hodiya, Hasumə, Besai,

²⁰ Harifə, Anatotə, Nevai,

²¹ Magpiasə, Mesulamə, Hezirə,

²² Mesezaveɛlə, Sadɔkə, Yadua,

²³ Pelatia, Hanan, Anaya,

²⁴ Hosea, Hanania, Hasuvə,

²⁵ Ha-Lohɛsə, Pileha, Sovekə,

²⁶ Rehumə, Hasavna, Maaseya;

²⁷ Ahiya, Hanan, Anan,

²⁸ Malukə, Harimə, Baana.

²⁹ Nɔi lonnii gbəliɠaai tii, ɉaláá laahəli nuą, Levi huwuhu nuą, bɛlɛ́ laaləi nuą, nwələ too nuą, da ɉaláá koló kɛ nuą, da nuąi kpɔ daa həɠə lɔi takpɛliɠaa hu nuą pulu, diɛ hvilɛn Yálá nwɔ tɔ́n nwooi pulu, di nɛ̨ąni, di lon ɉinąą da di lonnii nɛ̨ąą, nuąi kpɔ kɛ da pɛli mɛ̨nį kpaɠala kaai,

³⁰ di tɔɔ di kaayɔwɔɠaai a nu kpɛa kpɛaɠaa di pulu, ə lɛɛ, di mįnɛ̨ həɠə diɛ di kwɛla, diɛ di kaa pai hiɛi a Yálá nwɔ tɔ́n nwooi, yai ə dɛɛ nwɔ tímun Moisə yee ŋą. Yai-Laa gu wɔ Yálá nwɔ tɔ́n nwooɠaa, nwɔ tíɓoɠaa diɛ pɛli di yee kɛi da nwɔ yɛnɛ̨ɛ̨ hon bələ ɓa, diɛ di pɔ túwɔ́ ɓo.

³¹ Yii gaa tii ku hvo kɛa pai ku lonnii nɛ̨ą tɛɛi nɔi hu nuą pɔ, ə lɛɛ, ku hvo pai di lonnii nɛ̨ąą həɠəi a ku lon ɉinąą di nɛ̨ąni.

³² Nɔi nuą di pa a lɔwɔ tiɛ̨ da hɛn ɉuwui lɔpee, di lɔwɔ́tɔɔ mɛ̨nį ɓa a túwɔ lɔwɔ yələ, da ɉɛli yələɠaa, ku hva hɛn da ya di yəi. Ə lɛɛ, gwɛlan mɛ̨ihveelɛ yələ, kwa kwələ huwu lɔpee gələ lɛɛ nuą diɛ a kpɛli.

³³ Yii hvilɛn na kuɔ kpinį kuɔ, ku kaa pai wali kwələ tɛitɛi kulɔi kwɛlan dɛitɛi ɓa, guɔ Yálái nwɔ pɛ́lɛ́i mąą mɛ̨nį ɓa.

³⁴ Yálá kɔ́ lɛɠɛ mɛ̨nį ɉaláá mąąnɛ̨ɛ̨ ə kulɔ a yələ kəlee mąą mɛ̨nį. Haláá hɛn yii da gəlee kələn vįitɔɔ yələɠaa, ɲąnin nįnɛ̨ mɛ̨nįɠaa, ɉɛli yələɠaa, ɉɛnŋąąi da lúwɔ́ too diɛ, Israɛlə nwɔ nɛ̨ŋɛ̨n mąą hvaalɛɛ halááɠaa, da guɔ Yálái yəi bɛlɛ́n gɔ́lɔ́ huwui lɔpee mąą mɛ̨nį ɓa.

³⁵ Kuɔ mąn, ɉaláá kulɔ nuą mąn, Levi huwuhu nuą, da nɔi nuą, yii hvilɛn na gwɛi mɛ̨nį ɓa, yaai mąąnɛ̨ɛ̨ di paa la a mɛ̨inɛ̨ɛ̨ guɔ Yálá yəi bɛlɛ́n, ku yeepulu kaa kɛ. Pɛlɛ́ tɛitɛi da nwɔ kuu, kwɛlan gəlee da nwɔ, diɛ pɛli bɛ̨ɛ̨ la dɔ́n ɉɛɓɛ́ hu.

³⁶ Kwa ku wɔ hihɛnŋąą nįnɛ̨ kulɔ, ku wɔ tíiɠaai, ku wɔ ɓawuluɠaa kwa gəlee nįnɛ̨ kulɔ Yai-Laa ɓa.

³⁷ Ə mą kɛ ku lon ɉinąą dɔlɔɔɠaa, da ku wɔ taatɛlɛɛɠaa lonnii ɉilɛ tɔlɔɔɠaa, gbɛa-kpɛa mąn da bɛlɛɛ pɛlɛɛ mąn, mąąnɛ̨ɛ̨ ku pa a diɛ ku wɔ Yálái yəi bɛlɛ́n, ɉaláá laa həli nuąi tii ku wɔ Yálái yəi bɛlɛ́n, di pɔ yɛ pələi dɔ́n ɉɛɓɛ́ ə mo la.

³⁸ Ku wɔ lɛɠɛ hunwɔ nɛlɛɛ mun, ku wɔ wulu ɓaɠaa, ku wɔ lɔɔ nįnɛ̨, da wulɔ, kwa pa a ɉɛnŋąąi tii ɉaláá laa həli nuą pɔ, ku wɔ Yálái yəi bɛlɛ́n. Ku wɔ lɔiɠaa kwa tíi kɛ mą, kwa pa a bow naa Levi huwuhu nuą pɔ. Levi huwuhu nuąi tii ɓə da tɛɛ, di ɉɛn bow nąąɠaai tii kəlee hon daaɠaai kpɔ kwa tíi kɛ ɉu naa kəlee.

³⁹ Ɉaláá laa həli mun dɔ̨nɔ̨, yii gaa a Aarɔn lon da, a kɛ Levi huwuhu nuą pɔ, ɓɛlɔwai da kɛ ɉɛn bow naa hon ɉii la. Levi huwuhu nuą da ɉɛn bow naa tii, nwɔ hɛn bow nąąɠaa həɠə a ku wɔ Yálái nwɔ pɛ́lɛ́i nwɔɔ, də li di bu ɉɛn gɔw laikɛ pɛlɛ mu.

⁴⁰ Mąąhɔlɔɓo, bɛlɛ́ɠaai tii mu ɓə, Israɛlə lonnii da Levi lonnii da pa laa a mɔ̨nun, nɔɔ nįnɛ̨ da nwulɔ nįnɛ̨, naa ɓə Yálá yəi bɛlɛ́n ɉɛn ɲąŋą kaa laa, ɉaláá laa həli nuą diɛ koló kɛ laa ə mą kɛ bɛlɛ́ laaləi nuą da nwali too nuą. Bələ ɓə ku kaa pai kɛi gɛi la, ku hva kɛa ku kili kulɔ ku wɔ Yálái hee pɛlɛ́ hu.