Nehemi 1 - Yálá laawoo hɛɓɛ

Nehemi nwɔ Yálá hvɛli woo

¹ Hakalia lon Nehemi, woo ka: Tɔɔmun Artasɛrsɛsə nwɔ tɔɔlaa gwɛlan bow hveelɛ lɔwai, ɲąnįn ŋɛ̨i da kɛ mą: Kislɛwə ɲee mu, ŋį́ kɛ Susə goɓitaa kɛnɛ̨ hu,

² Hanani, yii gaa a ną́n non da, ə pa da mɛlaa taɠaa, ŋį́ di mąąnin gɛ, nuąi di hvo lɛɛ nuwɔ laa hu, di mąą mɛ̨nį ɓa da Ɉerusalɛmə taa mąą mɛ̨nį.

³ Diɛ mą́ą́: «Nuąi həɠə nuwɔ laa hu, di haa laa nɔi mɔ̨nɔ̨ kɛnɛ̨ hu, da nwunmɛ̨. Ɉerusalɛmə mąąkpɛɛ hįį puɔ naa taɠaa, ɛlɛɛ, gbonŋąą kələnŋąą.»

⁴ Nwooɠaa tii mɛ̨n ŋį́ mo, ŋą hee, ŋą wɔlɔ; hvolo tamąą yee mu, ŋį́ kɛ lɔ wɔlɔ mɛ̨nį hu; ŋį́ hin nɔ, gɛ yələkɔlɔn ɉu Yálá hvɛli.

⁵ Gɛ́ kɛ mą: «Ee kə! Yələkɔlɔn ɉu Yálá, Yálá kɛnɛ̨ maaɲɔwɔ! Ya ə́ wɔ mįnɛ̨i mąą yɛlɛ kɛ, yɛ́ naahɔn mo nuąi da ə wɛli la kɛ, di ɓo ə́ wɔ tɔ́n nwooi mu, di mɛ̨i.

⁶ Ə́ wəli tɔɔ kpɔ kani, ɛlɛɛ, ə́ ə́ ɲəi hee, yɛ tímun nwɔ mąąwɛli wooi mɛ̨n. Volóɠaa ŋɛ̨i yee mu, gáá moi yɛ́ hvóló da kpinį, yɛ́ tínuą Israɛlə lonnii mąą mɛ̨nį ɓa, ŋą́ą́ hvaa di kɛ nɛ̨ŋɛ̨n mąą mɛ̨nį ɓa, yaai ku ɉəɠə yɛ́; ɲą́ą́ kwa gala mɔlɔni kwaa nɛ̨ŋɛ̨n ɉəɠə yɛ́.

⁷ Kwaa ku hɔn gɛ a yɛ́ kpɔ a neelee, ɛlɛɛ, díɓoɠaa da dɔ́n nwooɠaai ə́ dɛɛ yɛ́ tímun Moisə pɔ, ku hvo di kɛ li.

⁸ Ə́ kiliŋąhiɛ mɛ̨nį ə́ mo yɛ tímun Moisə ɓa, yaai ə́ kɛ mą: ‹Akɛ ka ka woo lɛɛi, ɲą́ą́ ŋį́ ka taɠa taɠa hį́i takpɛliɠaa lɔwai.

⁹ Kɛlaa, akɛ, ka pənə ka pa bɔ́, ka ka yee hee nwɔ tíɓoɠaa mu, kaa bɔ mɛ̨nį kɛ. Ka wɔ nuą di mą kɛ luwɔlaa hu lɔi kpɛlai, ŋį́ di ɲąą kpɔn, ŋį́ paa diɛ, ɓɛi ŋɛ̨i ŋį́ ɉəɠə ɉu, náá yɛ́ ɓo laa.›

¹⁰ Ə́ wɔ nu huwui li, ə́ di nwun mąąɓo a ə́ wɔ hvaŋą kɛnɛ̨, a ə́ yee nwɔ huwalawalalaa.

¹¹ Ee Yai-Laa! Ə́ wəli tɔɔ ə́ wɔ tímun nwɔ hvɛli ɓo woo ɓa, ə́ wɔ tínuą di di wɔ hvɛli ɓo woo ɓa, diɛi da ɲɔw ə́ laa ɓa, hvaa mą, ɉulɔnui ŋɛ̨i ə ɲɛ̨i lɛlɛɛ hee ə́ wɔ tímun ma.» Nąąlɔwai, ɲą́ą́ ɓə kɛ a tɔɔmun nwɔ lɔɔi pɛlimun.