Nahumə 2 - Yálá laawoo hɛɓɛ

¹ Wɛlɛɛ ɓomun da kaa gilɛ həɠəi ɲeeɠaa ton na, gaa liilaa wɛlɛɛ laa həlii, Ɉuda, ə́ wɔ hɛliɠaai pu, mɛ̨nįɠaai ə́ naakwɛlanmo, di kɛ, mąąhɔlɔɓo, mɛ̨nį kalamun va kɛa tɛɛ ə pɔɔli, daa ɉu kala kpɔ tɛ̨ɛ̨ tɛ̨ɛ̨.

² Kɔ kpulu ka tii pai woloi yɛ́. Nuą tɔɔ daa kwɛlɛ, nuą tɔɔ diɛ bələi mąąkpɛɛ, ə́ hąą yili ə́ tɔɔ a ə́ nwąnąi.

³ Mąąhɔlɔɓo, Yai-laa aa Ɉakɔbə nwɔ mąąwiɛi hee ɉeei, yaa kpinįi ɓə gaa a Israɛlə nwɔ mąąwiɛ, toomɛ̨i kɛ nuą daa kɛ ɲəi hɛnŋąą kəlee kulɔ ɲəi, diɛ nwɔ tíiɠaai kəlee hukala.

Ninivə too mɛ̨nį

⁴ gɔ́kulááɠaai tii di wɔ hə́mə́ɠaai kaa a gbɔluɔ, di kwaną həɠəɠaa kpɔluɔ, gɔ́ kɔ́-wotoloɠaa diɛ lən gbɔ kɛnɛ̨, ɓɛlɔwai di kaa tɛi la gɔ́ kpalan ŋą. Diɛ gbalaɠaa pili di yee mɛ̨i.

⁵ Gɔ kɔ́-wotoloɠaa di kaa gilɛ həɠəi gbomoi, diɛ pili daa kwəi, nąą kɛ pələ kaa yɛ nwɔ̨n a too; di kaa tɛɛi yɛ yələ gbąnąą.

⁶ Asiri tɔɔmun gaa nwɔ kɔlaɠa ɲɛ̨itɔwɔ nuą təlii, Kɛlaa, di hiɛ kɔ́wɔɠaa kaa pui ɉu, nuą kaa gilɛ həɠəi diɛ lɛɠɛ daa mąąkpɛ hįį ɓa, di kaa di mąą kilɛi.

⁷ Gbonŋaai di laaləi kaa ɲaɠaa kwɛlɛ pələ, daa di laa yali, nuą hu aa pu diɛ tɔɔmun ɲəi bɛlɛ́n.

⁸ Daa mąąkpoloon, daa ɉəɠə diɛ li la, nwɔ tí nɛ̨ąi di kaa yɛ tonwələnŋąą di mąąwɛliɛ, di kaa lii a diɛ, di kaa di ɲinį hon ɉii.

⁹ Wɔlɔ wɔlɔ ɓa, Ninivə ə kɛ yɛ ya pui gɛnɛ̨ɛ̨, yai ya hvo kɛi kpɛɛ ɉu, ɲa ka ŋɛ̨i kɛa gboloon gaa laai. Ka tɔɔ a ka nwąnąi, ka ka huwalawala; Kɛlaa, nu ta hvo kpɛli bulu kaa.

¹⁰ Ka nwali həɠə, ka ɉɛni həɠə, ɉɛn laa, kpɛɛ hvo mą; hɛn nɛlɛɛ huwu kəlee puɔi laa gee mɛ̨i.

¹¹ Daa gəlee həɠə, daa di laa tɛ gəlee mu, daa gəlee taɠa, nu ta lii hvo kɛa kpələ li; di kɔ́wɔ kaa kɛlɛi gee hu, diɛ kpɛlin nɔ ya-ya, di ɲɛ̨i aa tɔɔ lɔ gamąn.

Daa ɲalaɠaa pɛlɛi kala

¹² Ɲalaɠaa pɛlɛi kaa mį? Ɓɛi ɲala lonnii di kɛi di kɔ̨nɔ̨n ɉɔlɔɓo laai, ɓɛlɔwai ɲala ə kɛi li la huwɔ kpɛi; nu ta hvo kɛi ɲala lon mąąɲɔw.

¹³ Ɲala ə kɛi ɉuwɔɠaa ɲąąkwɛlɛ lonnii diɛ, ə kɛi ɉuwɔɠaa hon a ɲala haaɠaa di wɔɔ, ə kɛi nwɔ woloɠaai laahvɛɛ a hɛnŋąą, yɛ nwɔ kwɛni woloɠaai laahvɛɛ a huwɔ powa.

¹⁴ Ɲą́ą́ ga, ŋą́ą́ kɔ́ pɛlɛ yɛ́, ɲą́ą́ Yai-Laa Mɛ̨nį Kəlee ŋą Hééɓomun, nwóó li! Gáá nwɔ kɔ́ kɔ́-wotoloɠaai mąą pənəi a luwu, gáá ə́ wɔ toomɛ̨i kɛ mɛ̨nįɠaai kpɛɛi lɔi mɛ̨i, di hva kɛa ə́ wɔ kɛlaɠaa woo mɛ̨n.