Mise 2 - Yálá laawoo hɛɓɛ

Ɲąąwooɓolaa kɛɛ a yeepənə ɉu

¹ Nuąi da mɛ̨nį ɲɔ̨nwɔ̨ɔ̨ mąą kiliŋąhiɛ kɛ, Di nwun na ɲɔ̨nwɔ̨ɔ̨i; di ɓo di yəi gbin ŋą, diɛ mɛ̨nį ɲɔ̨nwɔ̨ɔ̨ pənə di kwəi diɛ doo. Yələ a lɛɛ kpɔlɔɔ ɓɔi, diɛ di yee pɛlɛ mɛ̨nį ɲɔ̨n gɛɛ ɓa, mąąhɔlɔɓo, mąą laa kaa di yəi.

² Di kili a hvilɛn nɔ yɛa ta ɓa, daa mąn nwuɔ̨. Di ɲɛ̨i a kulɔ lɔ pɛlɛ́ ta pɔ, daa mąn ɉəɠə. Bɛlɛ́-o, nąmu-o, nu leelee-o, gwɛlin-o da gəlee həɠə.

³ Yili mąą mɛ̨nį ɓa, Yai-Laa yɛ diɛ: «Gáá mɛ̨nį ɲąąnwąnąą ta kili ɓoi, gɛ́ naa nu huwu taaləi tii ɓa, ka hva pɛli ka nwun gulɔi ɉu, ka hva pɛli hiɛi a ka ɲɛ̨i pilɛɛ yələi, mąąhɔlɔɓo, a kɛ a hvóló ɲɔ̨nwɔ̨ɔ̨.»

⁴ Mąą yələi, da kaa ka laa too, a yɛlɛ mąą wələ, mɛ̨nįi tii aa gbɛa mun hɔlɔ kɛ, di kaa pai kɛi diɛ: «Daa ku hukala kpɔ tɛ̨ɛ̨ tɛ̨ɛ̨, daa nwɔ́ nuąi kwɛlin gulɔ di yəi, gulɔ mɛ̨nį ɲə́i nwun maa lə? Di kaa ku wɔ tíiɠaai ɲąąkwɛlɛi kulɔ nwoo mu nuą lɔwai.»

⁵ Yili mąą mɛ̨nį ɓa, hvó pai nu ta hɔlɔɓoi yɛ ə́ kɔ́ a Yai-Laa nwɔ ɲąąkpɔn ɲələ.

Nuąi da kɛ Yálá kwəi mɛ̨nį hukulɔ mun naa hɛa tooi

⁶ Nu taɠaa da kɛ kɛi mą́ą́: 'Ə́ laapilɛ, nu hva hvaa tii! Mąą hvo nɛ̨ɛ̨li nu hvo kɛ diɛ: A tɛ̨ą, laanɔ̨nwɔ̨ hvo pai həɠəi ku pulu.

⁷ Yɛ́i a Ɉakɔbə nwɔ pɛ́lɛ́i, akɛtii ə́ nɛ̨ŋɛ̨n naa ɓə tii mɔ̨ɔ̨i? Yai-Laa nwɔ liilaai hvii aa mɔ̨ɔ̨ kpɛɛ? Nwɔ mɛ̨nį kɛ pələ li mɔ̨ɔ̨ a bɔlɔ? Nui a hiɛ a ɉaŋąą, wɛlikɛmąą woo hvo mɔ̨ɔ̨ a kɛ moi mą?

⁸ Wɛ́i tii kɛ, nwɔ́ nuąi di kɛ kɔ́ ɓa da di yowoɠaa, nuąi kɛ da həɠə gɔ́ ɓa, diɛ pa nɛ̨kpɛlɛɛ, ka kɛli gbaawii kulɔ gilɛn ɉəɠə mɛ̨i di yəi.

⁹ Kaa nwɔ́ lɔi hu nɛ̨ąą kəlee kulɔ di liiɓa pɛlɛ́ɠaa mu, mɛlɛi ŋį́ gɛ di lonnii diɛ, kaa gulɔ di yəi ɲali bulu hvo mą.

¹⁰ 'Ka ka muhəɠə ka həɠə ɓɛ, hvįįtɔɔ yələ hvəi kɛa. Ə́ túwɔ́ pələ ɲɔ̨nwɔ̨i moɔ̨i, ə́ hukala pələ ɓə yá gwɛli. Ə́ hu kaa pai kalai, ə lɔ kpɔ yɛ́ hɔ̨ɔ̨.

¹¹ Ə li kɛ nu a pɛli hɔlɔɓoi, yɛ gilɛ həɠə hvaŋą pulu, lɔɔ pulu, yɛ kɛ diɛ: «'Ka lɔɔ tɛɛ bɔ́, a lɔɔ kpəɠiɛ ŋį́ Yálá kwəi mɛ̨nį ɓo yɛ́ a ə́ kwəinɛ̨ɛ̨ mɛ̨nį» mąą nu lɔ ɓə li kɛ a nu huwui ŋɛ̨i nwɔ kalan gɛmun.

Yálá kaa pai pənəi ə Israɛlə ɲąą kpɔn

¹² Gáá pai Ɉakɔbə nwɔ pɛ́lɛ́i kəlee pɛlɛi gee ɓa, gáá pai Israɛlə nu kpəli ɲąąkpɔn ɉii, gáá pai di pui di kee ɓa yɛ Bɔsra ɓɛlaa haaɠaa, yɛ taatɛlɛɛ kpulu a kɛ kala tiliin mɛ̨i, ɛlɛɛ, nu woo kaa pai kɛi tɔɔi di lɔwai.

¹³ Nui wolo ɓɔ daa mąąkpɛ hį́í ɓa, aa tɛɛ di ɲɛ̨i tɔwɔ, daa wolo ɓɔ ɉį́i ɓa, daa tɛɛ a pɛlɛ́ laaləi tɔ̨nɔ̨, daa kulɔ nąą bələ, di wɔ tɔɔmun aa tɛɛ di ɲɛ̨i tɔwɔ, Yai-Laa ɓə di nwun na.