Markə 1 - Yálá laawoo hɛɓɛɈaan-Batistə nwɔ kalan gɛ woo ( Matie 3.1-12 ; Lukə 3.1-18 ; Ɉaan 1.19-28 ) 1 Nwɛlɛɛ lɛlɛɛi vilɛn ŋąąi Yálá lon Jesus Kristə ɓa, gbala tɔɔi ka. 2 Yɛ bələi bɛ̨ɛ̨i la Yálá kwəi mɛ̨nį hukulɔ mun Esai nwɔ hɛɓɛ́ yili hu yɛ kɛ mą: «Yálá yɛ gaa pai nwɔ wɛlɛɛ ɓomun dɛɛi ə ɲɛ̨i tɔwɔ yai pai ə́ wɔ pələi laa ɓo. 3 Yili mąą nui tii ka tii nwoo kaa tɛi nɔi pun ɉu yɛ kɛ mą: ka Nąmu nwɔ pələi pɛli, ka nwɔ pələ pɛlɛɛɠaa kəlee haŋąn.» 4 Ɉaan ə li nɔi pun ɉu yɛ nuą mąąwaa, yɛ di kalan, yɛ kɛ diɛ: «Ka kpəla mɛ̨nį ɲɔ̨n mą, ka tinɛ̨n, ka ka túwɔ́ pələ mąąhvalin, di ka mąąwaa, ə gɛ, Yálá ə ka mąąhvaalɛɛ.» 5 Ɉude lɔi hu nuą, da Ɉerusalɛmə daai nuą di kɛi pa Ɉaan pɔ diɛ hvaa di kɛ nɛ̨ŋɛ̨ ma nu kəlee ɲɛ̨i ɓa. Ɉaan yɛ di mąąwaa Ɉurdɛn yá hu. 6 Ɉəɠəi kɛ Ɉaan gwąną, ə kɛ a huwɔ ləɠa həɠə, ɉąą yilɛɛ a huwɔ kɔ́lɔ. Gɔ̨nɔ̨n yɛ ɓo a peelə da kwɛin nwulɔ. 7 Ə kɛi mo nuą diɛ yɛ kɛ diɛ: «Nu ta kaa búlú yɛ pa, nwɔ huwalawala kɛnɛ̨i dɛɛ mą́ą́. Ɲą́ą́ mą́ą́ hvo kpɛli nɛ̨ɛ̨li a nwɔ kɔ́lɔi laa hvólón mun. 8 Nwɛ́i, gáá ka mąąwaai a yá. Kɛlaa, yaa tii nwɛi, gaa pai ka mąąwaa a Nįį-Mąąhəɠɛɛ.» Jesus mąąwaa mɛ̨nį da ɲąąhɛŋįn mɛ̨nį ( Matie 3.13—4.11 ; Lukə 3.21-22 ; 4.1-13 ) 9 Nąąlɔwai ɓə Jesus ə həɠə la Galile taa ta hu, yii da kɛ naa ɓa: Nazarɛtə, ə yɛ pa Ɉaan pɔ. Ɉaan ə́ mąąwaa Ɉurdɛn yá hu. 10 Ɓɛlɔwai Jesus ə kulɔ ɲái, ŋąąɓa, yələkɔlɔn naa ə ɓo, Nįį-Mąąhəɠɛɛ ə yɛɛ mɛ̨i yɛ tonwələn. 11 Woo ta ə kulɔ yələi yɛ kɛ mą: «Ə kaa ɓo a nííɓa Lon, yaa níí hon gbɔ a mɔlɔɔ.» 12 Ɲąąɓa, Yálá-Nįį ə li a Jesus nɔi pun ɉu. 13 Ə hvóló pow nąąn gɛ nɔi pun ɉu, ɓilihi yɛ ɲąąhɛŋįn. Ə kɛ lɔ laa nɔwɔ huwɔɠaa lɔwai. Malakaɠaa diɛ mąąkpɛ. Jesus ə hɔ̨nwɔ̨lee kpɛ nuą nąąn dəli ( Matie 4.12-22 ; Lukə 4.14-15 ; 5.1-11 ) 14 Ɉaan toɔ kɛa gaho ŋą, yili pulu, Jesus ə li Galile lɔi hu, nwɛlɛɛ lɛlɛɛi Yálá ə dɔɔ la, yɛ naa həli. Yɛ kɛ diɛ: 15 «Yálá nwɔ lɔwai ə vaaɓo aa həli, mąąhɔlɔɓo, Yálá-taa tɔɔlaa mąą aa kpuwɔ; ka kpəla mɛ̨nį ɲɔ̨n ma, ka tinɛ̨n, ka ka túwɔ́ pələ mąąhvalin, əlɛɛ, ka ka yee hee nwɛlɛɛ lɛlɛɛ mu.» 16 Jesus kɛɛ tɛɛi Galile Bowa-ya kwɛlɛ, ə hɔ̨nwɔ̨lee kpɛ nuą hveelɛ kaa: Simɔn da nəɠə Andre diɛ diŋɛ̨n bili. 17 Jesus yɛ diɛ: «Ka pa ka hvilɛn búlú, gáá pai ka kɛi a nu kwɛli nuą.» 18 Ɲąąɓa, di di wɔ diŋɛ̨nŋąąi lɛɛ la di hvilɛn Jesus pulu. 19 Ə mąą tɛ lɔ nwɔ̨nɔ̨ tɔwɔ wolo ɓo, ə Zebede lon ɉinąą hveelɛ kaa; Ɉakə da nəɠə Ɉaan di kɛ heeni gələn ɉu, diɛ di wɔ diŋɛ̨nŋąąi nwoloi hɔlɔn. 20 Ə di kaa lɔ, ɲąąɓa, ə di təli. Di di nąn Zebede lɛɛ neeni gələn ɉu da goló kɛ nuą, di hvilɛn Jesus pulu. Hulɔnu ta yii ɲinɛ̨n ə kɛ bulu ( Lukə 4.31-37 ) 21 Jesus da nwɔ kalan nɛai də li Kafarnaumə daai, ə kɛ a hvįitɔɔ yələ ta. Jesus ə lɔ di wɔ Yálá hvɛli pɛlɛ́ mu, yɛ nuą mąąkwɛli. 22 Nwɔ kalan gɛ pələ ə nuą kwəi pili diɛ. Mąąhɔlɔɓo, nwɛi kɛ pələ hvo kɛ yɛ dɔ́n galamɔ̨ɔ̨ɠaa di wɔ kalan gɛ pələ. Ə kɛli di mąąkwɛli yɛ nui yili mąą laa kaa ɲəi. 23 Hulɔnu ta ə kɛ laa di wɔ Yálá hvɛli pɛlɛ́i ti mu, kpɔlɔ a nąąlɔwai, ɲįnɛ̨n yɛ ɓo bulu. Ə kɛi tómą yɛ kɛ mą: 24 «Lə ɓə ə́ kaa bɔ ə́ gɛ a kuɔ, Jesus Nazarɛtə mun? Ə kaa bɔ ə́ ku nwun napili? Ŋą ə kɔ́lɔn, gɛ́: Ə́ kaa a Yálá nwɔ nu mąąhəɠɛɛ.» 25 Jesus ə haŋą ɲinɛ̨n tii ɓa kpɔ kɛnɛ̨, yɛ mą: «'Ə mɛ̨i haa, ə́ həɠə nui ŋɛ̨i pulu.» 26 Ɲinɛ̨n ə ɉulɔnu tii too nɔi ɓa, ə gɔnwɔ kpɔ kɛnɛ̨. 27 Nuą tii kɛ laa, di kəlee di kwəi ə pili diɛ; diɛ di kee ni mąąni kɛ, diɛ kɛ mą: «Yii mukulaa ɓaa a lə? Yii kaa a kalan nįnɛ̨ yii huwalawala kaa ɉu. Ɉulɔnu ŋɛ̨i a haŋą ɲinɛ̨nŋąą diɛ, əlɛɛ, diɛ nwoo hon.» 28 Ɲąąɓa, Jesus mąątin ə too Galile lɔi hu nąą kəlee. Jesus ə ɲɔ̨n gɛ nuą tamąą kɔ́lɔi pono ( Matie 8.14-17 ; Lukə 4.38-41 ) 29 Jesus kulaa Yálá hvɛli pɛlɛ́ mu, Ɉakə da Ɉaan di lɛɛ bulu da diɛni diɛ li Simɔn da Andre ni yei bɛlɛ́n. 30 Simɔn ɲolaa ə kɛ laa laa ni gɔlɔ kələn ŋąą mą. 31 Ə lɛɠɛ nɛ̨ɛ̨nu tii ɓa ə ɉon a ɲee; ə muhəɠə. Gɔlɔ kələn mąą tii ə kpɛɛ. Nɛ̨ɛ̨nu tii ə muhəɠə, ə di kɔ̨nɔ̨n gɛ. 32 Yələ wulii pɔ, hvóló kɔ́w toɔ pulu, di pa a ɲɔ̨n gɛ nuą tamąą Jesus pɔ, ə mą kɛ yiiɠaai ɲį́nɛ̨n ə kɛ di pulu. 33 Daa tii hu nuą kəlee di di ŋąąkpɔn bɛlɛ́ laaləi. 34 Jesus ə ɲɔ̨n ɉuwu tamąą kɛ nuą kɔ́lɔi pono. Ə ɲinɛ̨n damąą kpɛɛ nuą pulu. Jesus hvo kɛli hvaa mą ɲį́nɛ̨nŋąą tii di hvo mɛ̨nį ta ɓo. Mąąhɔlɔɓo, ɲį́nɛ̨nŋąą tii di kɛ Jesus kɔ́lɔn. Jesus ə Galile lɔi hu hiɛ ( Lukə 4.42-44 ) 35 Mąą yələ laaɓoɔ, yələ ɓoi kpinį mu, Jesus ə kulɔ bɛlɛ́n ə li daa pulu pələ yɛ Yálá hvɛli dɔ̨nɔ̨ kɛɛnąą. 36 Simɔn da mɛlaa di hvilɛn bulu diɛ gwɛli. 37 Ɓɛlɔwai kɛa di gaa la, di mo mą diɛ mą: «Nu kəlee kaa háá ə́ kwɛli.» 38 Kɛlaa, Jesus ə di woo ɲąąpənə, yɛ diɛ: «Ka gwə li pələ takpɛli, gu kwɛlɛ taaɠaa hu. Mąąnɛ̨ɛ̨ ŋą kalan gɛ gɛɛnąąɠaa tii kəlee ɓa. Mąąhɔlɔɓo, mɛ̨nį ŋį́ paa la yaa li.» 39 Ə Galile lɔi hu hiɛ nąą kəlee, yɛ nuą mąąkwɛli di wɔ Yálá hvɛli pɛlɛ́ɠaa mu, ɛlɛɛ, yɛ ɲinɛ̨nŋąą kpɛ. Jesus ə hvólóɲɔ̨n gɛmun da kɔ́lɔi pono ( Matie 8.1-4 ; Lukə 5.12-16 ) 40 Hvólóɲɔ̨n gɛmun da ə pa ə too Jesus kɔ́wɔ mu yɛ mą: «Akɛ ya hvaa mą, ya pɛli ə́ gɔ́lɔ́i pono ə́ mą́ą́həɠə.» 41 Ɲɛ̨i mąąwɛli ə Jesus hon; ə ɲee pɛlɛ mą; yɛ mą: «Ŋą́ą́ hvaa mą; ə́ kɔ́lɔi ə́ pono, ə́ mąą ə həɠə.» 42 Ɲąąɓa, volóɲɔ̨n tii ə kpɛɛ, mąą ə həɠə. 43 Yili pulu Jesus ə mo kpɔ mą a nwąnąi, yɛ mą: 44 Hvo mɛ̨nį ŋɛ̨i hukulɔ nui lɔpee ta ɓa. Kɛlaa, li ə́ kpɔɔ lɛ ɉaláá laa həli mun mą, yɛ mą: Gɔ́lɔ́ a pono. Yili pulu, ɉaláá yii Moisə ə vaaɓo, ə́ yili kulɔ, ə gɛ, nu kəlee di gɔlɔn diɛ ə́ kɔ́lɔi aa pono, ə́ mąą a həɠə. 45 Kɛlaa, ɉulɔnu tii ə li ə mɛ̨nį tii hukulɔ kɛɛnąą kəlee ɓa. Yili ɓə gɛ, nuą diɛ həɠə kɛɛnąą kəlee diɛ pa bɔ. |