Lonon mo 8 - Yálá laawoo hɛɓɛ

Nwɔ̨n ɉee hɛnŋąą

¹ Yai-Laa yɛ Moisə ɓa:

² «'Mo Aarɔn ɓa, yɛ́ mą: Yá kɛi pa nwɔ̨n ɉee hɛnŋąą heei, di hee pələ ka: Nwɔ̨n ɉee hɛn mɛ̨ihveelɛi mąąnɛ̨ɛ̨ diɛ lən, di lən yɛ di tɔwɔ pɔ̨nɔ̨.»

³ Aarɔn ə gɛ tii, ə nwulɔ nwɔ̨n dɔɔ, di ɲɛ̨i hiɛ tɔwɔ pələ, yɛ bələi Yai-Laa ə mo la Moisə ɓa.

⁴ Bələi nwulɔ nwɔ̨n ɉee hɛn ə kɛ la bələ ka: Di bɛli a hɛni, di ɲɔw, ə həɠə gɔwɔ ɓa ə həli la dona. Di nwulɔ nwɔ̨n ɉee hɛn tii pɛli, yɛ bələi Yai-Laa ə gɔɔn mąą lɛ la Moisə ɓa.

Lévi lonnii laakwɛlanmo pələ

⁵ Yai-Laa yɛ Moisə ɓa:

⁶ «Levi lonnii həɠə Israɛlə lonnii lɔwai, ə́ di mąąhəɠə.

⁷ Bələi ə́ pai di mąąhəɠəi la, bələ ka: Nu mąąhəɠə yá taɠa diɛ, di kpəŋą hiɛ di kɔ́lɔ ɓa kəlee, di di mąą həɠə waa, a kɛ tii, di mąą aa həɠə.

⁸ Di nįŋɛ̨ hilɛ həɠə, da ɉaláá hɛn mąąnɛ̨ɛ̨ di bɛlɛ mą, da lɛɠɛ hunwɔ̨ kiin ŋąą wulɔ hu, ə́ nįŋɛ̨ hilɛ takpɛli həɠə a nɛ̨ŋɛ̨n mąąhvaalɛɛ haláá hɛn.

⁹ Ə́ mo, Levi lonnii di lɛɠɛ gee kaa kələ laaləi, ə́ Israɛlə lonnii kəlee ɲąąkpɔn.

¹⁰ Ə́ Levi lonnii mąą lɛɠɛ Yai-Laa lííla, Israɛlə lonnii kəlee di di yee pɛlɛ di nwuɔ̨.

¹¹ Yili pulu, Aarɔn ə Levi lonnii laakwɛlanmo Yai-Laa ɓa a haláá hɛn, Israɛlə lonnii di di laa həli Yai-Laa ɓa, Levi lonnii yee ə lɛɛ Yai-Laa nwɔ kóló ɓa.

¹² Levi lonnii da di yee pɛlɛ nįŋɛ̨ hilɛɠaa nwuɔ̨, ə́ nįŋɛ̨ hilɛɠaa laa həli Yai-laa ɓa, dɔ̨nɔ̨ ə kɛ a nɛ̨ŋɛ̨n mąąhvaalɛɛ haláá, dɔ̨nɔ̨ a kɛ a haláá hɛn da gəlee kələn. Yɛ nɛ̨ŋɛ̨n mąąhvaalɛɛ kóló kɛ la tii Levi lonnii mɛ̨i.

¹³ Yá Levi lonnii tɔɔ Aarɔn lonnii lííla, ə́ di laa həli yɛ haláá hɛn da gəlee kələn.

¹⁴ Israɛlə nuą lonnii lɔwai, Levi lonnii tɔɔ a di tee, nwɔ́ɔ́ ɓaa diɛ.

¹⁵ Yili pulu, Levi lonnii da pa kɛa, diɛ gee kaa kələ mąą kóló kɛ. «Mąąnɛ̨ɛ̨ ə́ di mąąhəɠə, ə́ di laa həli yɛ haláá hɛn da Yai-Laa kɔ́ la.

¹⁶ Mąąhɔlɔɓo, daa di tɛɛ bɔ́ kpɔ a neelee, Israɛlə lonnii lɔwai, Ŋą́ą́ di kɛ a nwɔ́ɔ́, a Israɛlə lon dɔlɔɔɠaa mąąhvalin.

¹⁷ Mąąhɔlɔɓo, nwɔ́ɔ́ ɓaa, Israɛlə lon dɔlɔɔɠaa kəlee; yɛi kɛ a nu kan, yɛi kɛ a taatɛlɛɛɠaa. Ɲələi ŋą́ lon dɔlɔɔɠaa paa la Eziptə lɔi hu, ɲələ ɓə ŋį́ Israɛlə lon dɔlɔɔɠaa kɛ la a nwɔ́ɔ́.

¹⁸ Kɛlaa, gáá Levi lonnii həɠəi a Israɛlə lon dɔlɔɔɠaa kəlee mąąhvalin.

¹⁹ Gɛ́ di tɛɛ Aarɔn da nonnii di pɔ Israɛlə lonnii lɔwai, Levi lonnii kaa di yee kɔ́nma, diɛ Israɛlə lonnii di wɔ haláá laa həli gee kaa kələ mu, diɛ nɛ̨ŋɛ̨n mąąhvaalɛɛ kóló kɛ diɛ, a kɛ tii, ɲɔ̨n ɲɔ̨nwɔ̨ɔ̨ hva kɛa pɛlɛ Israɛlə lonnii diɛ, a kɛ da lɛɠɛ gɛɛnąą mąąhəɠɛɛ ɓa.»

²⁰ Bələ ɓə, Moisə, Aarɔn, da Israɛlə nu kpulu kəlee di gɛ la Levi lonnii mąą mɛ̨nį hu. Di gɛ kpɔlɔ yɛ bələi Yai-Laa ə Moisə tí la, Levi lonnii mąą mɛ̨nį hu.

²¹ Levi lonnii di di kpɔɔ mąąhəɠə, di di mąą həɠəɠaa waa, Aarɔn ə di laa həli yɛ hɛn daa naakwɛlanmo Yai-Laa ɓa, ə nɛ̨ŋɛ̨n mąąhvaalɛɛ woo ɓo di mɛ̨i, diɛ di mąąhəɠə.

²² Yili pulu, Levi lonnii di li, diɛ di kɛ kólóɠaa kɛ gee kaa kələ mu, Aarɔn da nonnii di yee mu. Di Levi lonnii mąą mɛ̨nį kɛ yɛ bələi Yai-Laa ə Moisə tí la.

²³ Yai-Laa yɛ Moisə ɓa:

²⁴ «Levi lonnii mąą tɔ́nŋąą ka: Levi lonnii kaa kwɛlan a həli pow hveelɛ kɔ́w lɔɔli hu, mąąnɛ̨ɛ̨ yili ə nwɔɔ kóló kɔ́wɔ tɔɔ, yɛ gee kaa kələ mąą kólógaa kɛ.

²⁵ Di kaa kwɛlan a həli pow lɔɔli hu, da mąą nu yee kulɔ kɛa góló ɓa.

²⁶ Mąą nu a pɛli kpɔnmąą tɛɛi nąn nonnii pɔ, diɛ gee kaa kóló mąą mɛ̨nį ɲɛ̨i kulɔ, kɛlaa, kóló kɛ taa túwɔ́ hva kɛ kɛa mɛ̨i. Bələi ə́ kaa pai Levi lonnii hon ɉii la di wɔ kóló hu, bələ ka tii.»