Lonon mo 18 - Yálá laawoo hɛɓɛ

¹ Yai-Laa yɛ Aarɔn ɓa: «Yɛ́, ə́ lonnii, ka Levi nu huwu, ka nwuɔ̨ tiɛ̨ ɓaa nɛ̨ŋɛ̨ŋąą da ɉəɠə gɛɛnąą mąąhəɠɛɛ ɓa, mąą pɔnnaa pu mɛ̨nį. Ɛlɛɛ, nɛ̨ŋɛ̨nŋąąi da ɉəɠə ɉaláá kulɔ kóló hu, yɛ́ ka ə́ lonnii ɓə yili nwulu kaa ka nwuɔ̨.

² Ə́ nąn nonnii a Levi nu huwu, di həɠə diɛ kpɛli, ka diɛni kaa lɛɠɛ gɛɛnąą mąąhəɠɛɛ ɓa. Di kaa pai kɛi kpɔn ɉii yɛ́, diɛ ə́ yee mąąkpɛ, kɛlaa, yɛ́ ka ə́ lonnii ɓə pai kɛi tɔɔi gee kaa kələ lííla.

³ Yiiɠaai tii di wɛi, di kaa pai kɛi ə́ yee mu. Di ɓo gələ mąą kóló kəlee ɓa. Kɛlaa, di hva lɛɠɛ bɛlɛ́n ɉɛn mąąhəɠɛɛɠaa diɛ, ə mą kɛ ɉaláá kulɔ kəhi, di hvo pa nee di kpɔɔ kwɛli a haa, ə mą kɛ kaa kpinįi.

⁴ Di kaa pai kɛi ə́ mąą kpɔnmąą ɓoi, diɛ gee kaa kələ mąą mɛ̨nį ɲɛ̨i kulɔ, a gələ́ mąą mɛ̨nįɠaa kəlee, nu takpɛli hva pɛlɛ kaa.

⁵ Kaa ɓə pai kɛi gɛɛnąą mąąhəɠɛɛ da ɉaláá kulɔ kəhi mąą mɛ̨nį ɲɛ̨i kulɔi. A kɛ tii, nwɔ́ liiholi hvo pai kɛa ɓɛlai Israɛlə lonnii mɛ̨i.

⁶ Kaa gaa, ɲą́ą́ gbinįi gáá ka nąn nonnii a Levi nu huwu di həɠəi Israɛlə lonnii lɔwai, ŋį́ di tɛɛ ka pɔ a ka wɔɔ. Di tɛɛ li kpɔ tɛ̨ɛ̨ tɛ̨ɛ̨ Yai-Laa pɔ. Diɛ gee kaa kələ mąą kólóɠaa kɛ.

⁷ Yɛ́ ka ə́ lonnii ɓə pai kɛi ɉaláá kulɔ kəhi ɓa, da ɉəɠə pɛlɛ́, gɛɛnąą mąąhəɠɛɛ mąą mɛ̨nį; ka nwuɔ̨ tiɛ̨ li. Ŋą́ą́ ɉaláá kulɔ mɛ̨nį mąą laa tɛɛ tii ka pɔ. Nui yili mąą laa hvo ɲəi, a lɛɠɛ laa a haa.»

Ɉaláá laa həli nuą hɔlɔɓo hɛn

⁸ Yai-Laa yɛ Aarɔn ɓa: «Ə́ wəli tɔɔ, Nįįhɔ̨nwɔ̨i da gulɔ mą́ą́, gáá ə́ heei nwun na. Hɛn lɔpee Israɛlə lonnii da gulɔ di hɔlɔɓo hɛnŋąą hu, diɛ gɛ a nwɔ́ɔ́. Gáá nɛɛi ə́ yee kɔ́nma, yɛ́ ka ə́ lonnii, a mɛ̨nįi mąą hva pɛli hvalin ɉii.

⁹ Ɉaláá hɛn mąąhəɠɛɛ hu yii hva kələn, yɛ lɛɛ a ə́ wɔɔ ya ka: Mɛ̨inɛ̨ɛ̨ haláá kəlee. Yii gaa a lɛɠɛ hunwɔ̨, nɛ̨ŋɛ̨n mąąhvaalɛɛ haláá kəlee, nu pɔɔŋą pɛli haláái lɔpee da gulɔ mą́ą́, ɉaláá mąąhəɠɛɛɠaai tii kaa a ka wɔɔ, yɛ́ ka ə́ lonnii.

¹⁰ Ka di mįi yɛ kɔ̨nɔ̨n mąąhəɠɛɛ. Hinąą kəlee da pɛli da mįi, mąąnɛ̨ɛ̨ ə́ ɉɛnŋąąi tii kaa yɛ́ hɛn mąąhəɠɛɛɠaa.

¹¹ Mɛ̨inɛ̨ɛ̨ yii lɔpee Israɛlə lonnii da paa la, da yii lɔpee da gulɔ ɉaláá hɛnŋąą hu a nwɔ́ɔ́i, ə́ wɔɔ li nwɔ̨nɔ̨, gáá di tɛɛi ə́ pɔ ka ə́ lon ɉinąą, da ə́ lonnii nɛ̨ąą, a mɛ̨nįi hva pɛli ɉəɠəi mą. Nui lɔpee a kɛ ə́ yəi bɛlɛ́n mąąhəɠɛɛ tɔ́n ɲəi, a pɛli mą ə da mįi.

¹² Wulɔ nįnɛ̨, da lɔɔ nįnɛ̨, da mɔ̨nun ə mą kɛ hɛn dɔlɔɔɠaai da Yai-Laa kɔ́ la, gáá di tɛɛi ə́ pɔ.

¹³ Di wɔ lɔi hu hɛn má tɔlɔɔɠaai lɔpee da paa la Yai-Laa pɔ, ə́ wɔɔ li. Nui lɔpee a kɛ ə́ yəi bɛlɛ́n, tɔ́n və mą, a pɛli da mįi.

¹⁴ Hɛn lɔpee naakwɛlanmoɔ, tɔ́n gaa mą nu takpɛli tɔwɔ; ə́ wɔɔ li.

¹⁵ Lon dɔlɔɔ kəlee, kaa a Yai-Laa nwɔɔ, ka paa la bɔ; yɛi kɛ a taatɛlɛɛ, yɛi kɛ a nu kan. Kɛlaa, yá mo di nu lonnii dɔlɔɔɠaa nwun mąąɓo. Taatɛlɛɛɠaai tɔ́n gaa diɛ, ə́ di lon dɔlɔɔɠaa nwun mąąɓo.

¹⁶ Lon dɔlɔɔ yii mąąnɛ̨ɛ̨ nwun mąą ə ɓo, da nwun mąąɓo nwɔ ɲąnin dɔlɔɔ hu, a ɉɛn yá vaa ɓo. Ya ɓaa wali kwələ lɔɔli, yɛ bələi Yálá hee pɛlɛ́ mu wali kɔ́ɔn bələ kaa la.

¹⁷ Kɛlaa, nįŋɛ̨ haa, ɓɛlaa haa, ɓolu haa, hva di lon dɔlɔɔɠaai lɛɛ laa di hvo di nwun mąąɓo. Di kulɔ mą́ą́ a haláá, yá di ɲąmą pu ɉaláá kulɔ kəhi mɛ̨i, ə́ di wulɔ kələn a hɛn gun nɛ̨ɛ̨, a Yai-Laa nwɔɔ, yɛ niilaa.

¹⁸ Ɉuwɔ a lɛɛ a ə́ wɔɔ, yɛ bələi gəŋəi da naa həli mą́ą́ da mamįiyee wəla di kaa la a ə́ wɔɔ.

¹⁹ «Ka yíi pələ li, hva ɉəɠə mą, yɛ́ ə́ lon ɉinąą da ə́ nonnii nɛ̨ąą. Hɛn lɔpee Israɛlə lonnii da gulɔ haláá hɛn ɉu a Yai-Laa nwɔɔ, gáá di tɛɛi ka pɔ. Mįnɛ̨ ka tii ɲilɛɛ a kpolo a yələ kəlee mɛ̨nį, Yai-Laa ɲɛ̨i ɓa, yɛ́ ka ə́ huwu ka mąą mɛ̨nį ɓa.»

²⁰ Yai-Laa yɛ nwɔ̨nɔ̨ Aarɔn ɓa: «Lɔi hvo pai kɛi ə́ yəi nɔi ɲąąkwɛlɛi lɔwai. Hɛn və pai kɛi ə́ yəi di lɔwai, Ɲą́ą́ ɓə pai kɛi ə́ yə́i a ə́ yə́i hɛn, a ə́ kwɛlin Israɛlə lonnii lɔwai.

Levi lonnii hɔlɔɓo hɛn

²¹ «Levi lonnii di wɛi ka: Hɛn lɔpee pai hɔlɔɓoi Israɛlə lɔi hu, bow nąąi da gulɔ a Nįįhɔ̨nwɔ̨; yili ɓə gáá dɛɛi Levi lonnii pɔ a gee kaa kələ mąą kólóɠaai da gɛ mąą hvɛla.

²² A kɛ tii, Israɛlə lonnii di hva kɛa lɛɠɛ gee kaa kələ ɓa, ə gɛ di hvo pa nee nɛ̨ŋɛ̨n ɉəɠə di hvo haa.

²³ Levi lonnii ɓə pai kɛi gee kaa kələ mąą mɛ̨nį ɲɛ̨i kulɔi, da túwɔ́ a ɲɔ̨nwɔ̨ɔ̨, nwulu a lɛɛ di nwuɔ̨. Ka huwu nwuɔ̨ tiɛ̨ li a yələ kəlee. Di hvo pai lɔi hɔlɔɓoi a di kwɛlin Israɛlə lonnii lɔwai.

²⁴ Kɛlaa, hɛn bow nąąi Israɛlə lonnii kaa pai kɛi dɛɛi a nįįhɔ̨nwɔ̨ a Yai-Laa nwɔɔi, gáá di tɛɛi Levi lonnii pɔ. Yili mąą mɛ̨nį ɓə ŋį́ kɛ la diɛ, di hvo pai lɔi hɔlɔɓoi a di kwɛlin Israɛlə lonnii lɔwai».

²⁵ Yai-Laa yɛ Moisə ɓa:

²⁶ «'Mo Levi lonnii diɛ, yɛ́ diɛ: «Ka kɛi pa ɉɛn bow nąąi tii hɔlɔɓoi Israɛlə lonnii yəi, yai gáá dɛɛi ka pɔ a ka hɔlɔɓo hɛn. Ka di ɲąąkwɛlɛ ɉu nwɔ̨nɔ̨ pow, ka bow nąąi tii kɛ a Yai-Laa nwɔɔ.

²⁷ Ka wɔ Nįįhɔ̨nwɔ̨ li, yɛ bələi lɔ nuą takpɛliɠaa kaa pai nįįhɔ̨nwɔ̨ kulɔi la a di pɔ yɛa hihɛn da di wɔ kɔ́wɔ la wulɔ ta.

²⁸ Bələ ɓə kaa kpɛli ka káá pai kɛi nįįhɔ̨nwɔ̨ kulɔi la Yai-Laa ɓa. Ka ɉəɠə ɉɛnŋąąi tii Israɛlə lonnii kaa pai kɛi dɛɛi ka pɔ di hu; ka da həɠə ɉu a nįįhɔ̨nwɔ̨ yii gaa a Yai-Laa nwɔɔ, ka dɛɛ ɉaláá laa həli mun Aarɔn pɔ.

²⁹ Hɛn lɔpee di kaa pai kɛi dɛɛi ka pɔ, ka Yai-Laa nwɔ nįįhɔ̨nwɔ̨ kulɔ ɉu, da hva lɛɛ pulu. Ɉɛnŋąąi tii kəlee hu, nɛlɛɛɠaa ɓə ka ɉəɠə a haláá hɛn mąąhəɠɛɛ.

³⁰ «Ə́ mo diɛ yɛ́ diɛ: ka pa ɉɛnŋąąi tii kəlee nɛlɛɛ mun ɉəɠəi ɉu, gbəlii tii a lɛɛ kaai a Levi lonnii ka yəi; yɛ hihɛn má da kɔ́wɔ la wulɔ,

³¹ ka ka yəi bɛlɛ́n nuą ka mįi ɓɛi lɔpee, mąąhɔlɔɓo gee kaa kələ mąą kólóɠaai ka gɛ, mąą hvɛla li.

³² Mɛ̨nįɠaai tii kəlee hu, ka ɉɛnŋąąi tii nɛlɛɛɠaa kulɔ ɉu, nɛ̨ŋɛ̨n va kɛ kaa yili hu. Israɛlə lonnii di wɔ haláá mąą həɠɛɛɠaa hukalaa hvə li, ɛlɛɛ, ka hva haa yili mąą mɛ̨nį ɓa.»