Lonon mo 1 - Yálá laawoo hɛɓɛ

Nonon mo dɔlɔɔ

¹ Yai-Laa ə pələ ɓo Moisə ɓa Sinai nɔi pun ɉu, gee kaa kələ mu. Di kulaa Eziptə lɔi hu, gwɛlan veelɛ nwɔ ɲąnin veelɛnąą voló tɔlɔɔ li kɛ. Yɛ mą:

² «Israɛlə lonnii kəlee lonon, a di huwu laa, da bɛlɛ́ɠaa, ə́ ɉinąą kəlee laa pɛ̨ɛ̨ tɛitɛi.

³ Yá gɛ a ɉinąąi di kaa kwɛlan gaa pow hveelɛ, da yiiɠaa di wɛi tɛɛi ɉu; yiiɠaa da pɛli kɔ́ kɔ́i Israɛlə nwɔ kɔlaɠai hu. Ə́ di lonon a gɔ́ laɠa heeiɠaa, yɛ́ ka Aarɔn.

⁴ Nu tɛitɛi həɠə nu huwu kəlee lɔwai diɛ ɓo a pɛlɛ́ nąmįną di hvilɛn ka pɔ.

⁵ Nuą pai kpɔnmąą tɛɛi ka pɔ, di laa ka: Rubɛn yəi bɛlɛ́n, Sedeurə lon Elisurə,

⁶ Simeɔn yəi bɛlɛ́n, Surisadai lon Selumiɛlə;

⁷ Ɉuda yəi bɛlɛ́n, Aminadavə lon Nasɔn;

⁸ Isakarə yəi bɛlɛ́n, Suarə lon Netanɛlə;

⁹ Zabulɔn yəi bɛlɛ́n, Helɔn lon Eliavə;

¹⁰ Ɉosɛfə lonnii di wɛi, Ɛfraimə yəi bɛlɛ́n, Amihudə lon Elisama; Manase yəi bɛlɛ́n, Pedasurə lon Gameliɛlə;

¹¹ Bɛnɉamɛn yəi bɛlɛ́n, Gideoni lon Avidan;

¹² Dan yəi bɛlɛ́n, Amisadai lon Ahiezɛrə;

¹³ Asɛrə yəi bɛlɛ́n, Okran lon Pagiɛlə;

¹⁴ Gadə yəi bɛlɛ́n, Deuɛlə lon Ɛliasafə;

¹⁵ Nɛftali yəi bɛlɛ́n, Einan lon Ahira.»

¹⁶ Diɛ ɓə kɛ a nu huwuɠaa tii ɲɛ̨ikɔw nonon mo mɛ̨nį hu, di kɛ nu waa tɛitɛi nwun na Israɛlə lonnii lɔwai.

¹⁷ Moisə da Aarɔn di nuą tii həɠə, di di kɛ a di kwɛlɛ nuą, yɛ bələi di mo la diɛ.

¹⁸ Di Israɛlə lonnii kəlee ɲąąkpɔn a ɲąnin veelɛnąą nwɔ hvóló tɔlɔɔ yələ, ɛlɛɛ, di Israɛlə lonnii hee a di kaa pələ, da di huwu, ɛlɛɛ, da bɛlɛ́ɠaa laa, a nuąi kpɔ di kaa kwɛlan ə kɛ pow hveelɛ, da yiiɠaai kɛ di wɛi laŋin ŋąą yili mɛ̨i, di laa pɛ̨ɛ̨ tɛitɛi.

¹⁹ Bələi Yai-Laa ə Moisə tí la, Moisə ə gɛ tii, ə nu kəlee lonon Sinai nɔi pun ɉu.

²⁰ Israɛlə lon dɔlɔɔ Rubɛn lonnii lonoi di mo, a gwəliɠaa laa, da bɛlɛ́ɠaa laa, diɛ di lonon tɛitɛi, ɉinąąi di kaa kwɛlan ə kɛ pow hveelɛ da yiiɠaai di wɛi laŋin ŋąą mɛ̨i, diɛ pɛli ɓɔwa kwɛaa yalai daa hu;

²¹ nuąi di pɛli di laa pɛ̨ɛ̨i Rubɛn nwɔ nu huwui lɔwai, di kɛ a nu waa pow nąąn kɔ́w mɛ̨ida pulu nwun nɔɔli (46500).

²² Simeɔn lonnii di wɛi, di lonoi di mo tɛitɛi, ɉinąąi di kaa kwɛlan ə kɛ pow hveelɛ da bulu, di lonoi di mo a gwəliɠaa laa da bɛlɛ́ɠaa laa, a nuąi da pɛli ɓɔwa kwɛa yalai daa hu,

²³ diɛi kɛ a Simeɔn lonnii di kɛ a nu waa pow lɔɔli kɔ́w mɛ̨inąąn pulu nwun ɉaaɓa (59300).

²⁴ Gadə lonnii lɔwai, yiiɠaai di kaa kwɛlan ə kɛ pow hveelɛ, da yiiɠaai di wɛi tɛɛ ɉu, diɛ pɛli ɓɔwa kwɛaa yalai daa hu, di hee kpəlin na kɛi di mo a gwəliɠaa laa da bɛlɛ́ɠaa laa,

²⁵ diɛi kɛ a Gadə lonnii di kɛ a nu waa pow nąąn kɔ́w lɔɔli pulu nwun mɛ̨ida ɲee lɔɔli (45650).

²⁶ Ɉuda lonnii di wɛi, di lonoi di mo, yiiɠaai di kaa kwɛlan ə kɛ pow hveelɛ da yiiɠaai di wɛi tɛɛ ɉu, diɛ pɛli ɓɔwa kwɛaa yalai daa hu, di hee kpəlin na kɛi di mo a gwəliɠaa laa da bɛlɛ́ɠaa laa,

²⁷ diɛi kɛ a Ɉuda lonnii di kɛ a nu waa pow mɛ̨ihveelɛ kɔ́w nąąn, pulu nwun mɛ̨ida (74600).

²⁸ Isakarə lonnii di wɛi di lonoi di mo, yiiɠaa di kaa kwɛlan ə kɛ pow hveelɛ, da yiiɠaa di wɛi lanŋin ŋąą mɛ̨i, diɛ pɛli ɓɔwa kwɛaa yalai daa hu, di hee kpəlin na kɛi di mo, a gwəliɠaa laa, da bɛlɛ́ɠaa laa,

²⁹ di kɛ a nu waa pow lɔɔli kɔ́w nąąn pulu nwun nąąn (54400).

³⁰ Zabulɔn lonnii, di wɛi di lonoi di mo, yiiɠaa di kaa kwɛlan ə kɛ pow hveelɛ da yiiɠaa di wɛi lanŋin ŋąą mɛ̨i, diɛ pɛli ɓɔwa kwɛaa yalai daa hu, di hee kpəlin na kɛi di mo, a gwəliɠaa laa da bɛlɛ́ɠaa laa,

³¹ diɛi kɛ a Zabulɔn lonnii, di kɛ a nu waa pow lɔɔli kɔ́w mɛ̨ihveelɛ pulu nwun nąąn (57400).

³² Yiiɠaa kɛ a Ɉosɛfə lonnii, Ɛfraimə lonnii di wɛi, di lonoi di mo, yiiɠaai di kaa kwɛlan ə kɛ pow hveelɛ, da yiiɠaa di wɛi lanŋin ŋąą mɛ̨i, diɛ pɛli ɓɔwa kwɛaa yalai daa hu, di hee kpəlin na kɛi di mo, a gwəliɠaa laa da bɛlɛ́ɠaa laa,

³³ diɛi kɛ a Ɛfraimə lonnii, di kɛ a nu waa pow nąąn pulu nwun nɔɔli (40500).

³⁴ Ɉosɛfə lon Manase lonnii di wɛi, di lonoi di mo, yiiɠaai di kaa kwɛlan ə kɛ pow hveelɛ da yiiɠaai di wɛi tɛɛ ɉu, diɛ pɛli ɓɔwa kwɛaa yalai daa hu, di hee kpəlin na kɛi di mo a bɛlɛ́ɠaa laa da gwəliɠaa laa,

³⁵ diɛi kɛ a Manase lonnii di kɛ a nu waa pow haaɓa kɔ́w hveelɛ pulu nwun veelɛ (32200)

³⁶ Yii ɓaa Bɛnɉamɛn lonnii di wɛi, di lonoi di mo, yiiɠaai di kaa kwɛlan ə kɛ pow hveelɛ, da yiiɠaai di wɛi tɛɛ ɉu, diɛ pɛli ɓɔwa kwɛaa yalai daa hu, di hee kpəlin na kɛi di mo a bɛlɛ́ɠaa laa da gwəliɠaa laa,

³⁷ diɛi kɛ a Bɛnɉamɛn lonnii, di lonoɔ ə kɛ a nu waa pow haaɓa kɔ́w looli pulu nwun nąąn (35400).

³⁸ Dan lonnii di wɛi, di lonoi di mo, yiiɠaai di kaa kwɛlan ə kɛ pow hveelɛ, da yiiɠaai di wɛi tɛɛ ɉu, diɛ pɛli ɓɔwa kwɛaa yalai daa hu, di hee kpɛlin na kɛi di mo a bɛlɛ́ɠaa laa da gwəliɠaa laa,

³⁹ diɛi kɛ a Dan lonnii di kɛ a nu waa pow mɛ̨ida kɔ́w hveelɛ pulu nwun mɛ̨ihveelɛ (62700).

⁴⁰ Asɛrə lonnii di wɛi, di lonoi di mo, yiiɠaai di kaa kwɛlan ə kɛ pow hveelɛ, da yiiɠaai di wɛi tɛɛ ɉu, diɛ pɛli ɓɔwa kwɛaa yalai daa hu, di hee kpəlin na kɛi di mo a bɛlɛ́ɠaa laa da gwəliɠaa laa,

⁴¹ diɛi kɛ a Asɛrə lonnii, di kɛ a nu waa pow nąąn kɔ́w tanɔ̨n pulu nwun nooli (41500).

⁴² Nɛftali lonnii di wɛi, di lonoi di mo, yiiɠaai di kaa kwɛlan ə kɛ pow hveelɛ, da yiiɠaai di wɛi tɛɛ ɉu, diɛ pɛli ɓɔwa kwɛaa yalai daa hu, di hee kpəlin na kɛi di mo, a bɛlɛ́ɠaa laa, da gwəliɠaa laa,

⁴³ diɛi kɛ a Nɛftali lonnii di kɛ a nu waa pow lɔɔli pulu nwun nąąn (50400).

⁴⁴ Moisə da Aarɔn, bɛlɛɛ nu pow kɔ́w hveelɛi ŋɛ̨i di di həɠə Israɛlə lonnii tɛitɛi kəlee lɔwai diɛ, di kwɛdɛn ga tii.

⁴⁵ Israɛlə lonnii kpɔ di di lonon, a bɛlɛ́ɠaa laa da gwəliɠaa laa, diɛi di kaa kwɛlan ə kɛ pow hveelɛ da yiiɠaa di wɛi tɛɛ kɛ ɉu, diɛ pɛli ɓɔwa kwɛaa yalai daa hu Israɛlə kɔlaɠa hu,

⁴⁶ di lonoɔ ə kɛ a nu waa nwun mɛ̨ida kɔ́w haaɓa pulu nwun nɔɔli ɲee lɔɔli (603550)

Levi nu huwu kɛ kóló

⁴⁷ Levi lonnii di wɛi, di nąn mąą mɛ̨nį ɓa, di hvo pɛli di lonoi.

⁴⁸ Yai-Laa yɛ Moisə ɓa:

⁴⁹ «Levi lonnii di wɛi, hvá pɛli di lonoi, hvá pɛli di laa tooi Israɛlə lonnii laa pɔ.

⁵⁰ Gee kaa kələ mąą mɛ̨nį lɛɛ Levi lonnii nwuɔ̨, da mu hɛnŋąą diɛ ɓə mąąnɛ̨ɛ̨ diɛ gbəŋəi, da mu hɛnŋąą kəlee, diɛ kóló kɛ mu; ɛlɛɛ, di di wɔɔ həɠə pɛlɛ́ɠaa tɔɔ gwɛlɛ, di mąątínɛ̨n na.

⁵¹ Da kɛi li a gee kaa kələ, Levi lonnii ɓə da gboloon diɛ li la, da kɛi dɔɔ, diɛ ɓə da ɉee gee la. Nu takpɛli a lɛɠɛ mą, mąą nu a haa.

⁵² «Israɛlə lonnii da di wɔ kələɠaai tɔɔ; da gələɠaa tɔɔ a bɛlɛ́ɠaa laa, ɓɛi da di wɔ taai pu laa.

⁵³ Levi lonnii di wɛi, da di wɔɔ kələɠaai tɔɔ, di gee kaa kələ mąątínɛ̨n na, yili ɓə a gɛ, Yai-Laa nwɔ liiholi hva pɛli həlii Israɛlə lonnii diɛ. Levi lonnii diɛ kóló kɛ gee kaa kələ mu.»

⁵⁴ Yili ɓə Israɛlə lonnii di gɛ yɛ bələi kpɔlɔ Yai-Laa ə Moisə tí la.