Levetekɔ 1 - Yálá laawoo hɛɓɛ

Ɉaláá kulɔ pələ Haláá hɛn da gəlee kələn

¹ Yai-Laa ə lɛɛ gee kaa kələ mu yɛ Moisə ɓa:

² «'Mo Israɛlə lonnii diɛ, yɛ́ diɛ: Nu ta a kɛ gaa Yai-Laa kɔ́i a taatɛlɛɛ, ə gɛ a nįŋɛ̨, a wala kɛ tii, ɓɛlaa da ɓolu.

³ «Akɛ nwɔ haláái kaa a haláá hɛn da gəlee kələn, ə kɛ a nįŋɛ̨ hilɛ, nąą ta hvo kɛ mą. Ə paa la gee kaa kələ laaləi, ə gɛ, Yai-Laa ə ɲee hee mu.

⁴ Yai-Laa a ɲee hee mu, ə ɲee pɛlɛ daatɛlɛɛ nwuɔ̨, ə ɉɛatɔɔ mą, nwɔ nɛ̨ŋɛ̨n mąąhvaalɛɛ mɛ̨nį ɓa.

⁵ Da daatɛlɛɛ nwun dee Yai-Laa liíla, yili pulu, Aarɔn lonnii a ɉaláá laa həli nuą, di ɲąmą həɠə, di daɠa ɉaláá kulɔi ɓa gee kaa kələ laaləi, di dínɛ̨n mą di doo gee hu.

⁶ Da Yálá kɔ́ taatɛlɛɛ tii kɔ́lɔɓo, di dee a gbuwulu kpɛa kpɛaa.

⁷ Yili pulu, ɉaláá laa həli nuąi a Aarɔn lonnii, da nwɔ̨n naa ɉaláá kulɔi, di gwɛi tɔɔ mą.

⁸ Di ɉuwɔ kpunŋaa, nwun ganin da nwulɔ laa ɉaláá kulɔi gwɛi mɛ̨i.

⁹ Di gwəi hɛnŋaa da gɔwɔ kwąnąɠaa mąą waa, ɉaláá laa həli mun a gəlee kələn ɉaláá kulɔi. Yili kaa a haláá hɛn yii da gəlee kələn, mąą kun nɛ̨ɛ̨ yɛ Yai-Laa liilaa.

¹⁰ «Akɛ, taatɛlɛɛ pɛlɛɛ ta ɓə di paa la a Yálá kɔ́ hɛn, diɛ gəlee kələn, ə kɛ a ɓɛlaa, ə kɛ a ɓolu, mąąnɛ̨ɛ̨ ə kɛ a ɉilɛ, nąą ta hvo kɛ mą.

¹¹ Da nwun dee ɉaláá kulɔi ɲələi pələ Yai-Laa liíla. Yili pulu, Aarɔn lonnii a ɉaláá laa həli nuą, da ɲąmą pu ɉaláá kulɔi ɓa di dínɛ̨n di doo gee hu.

¹² Da ɉu tee a gbun gbɛa-kpɛaa. Ɉaláá laa həli mun ə ɉuwɔ nwun ganin da nwulɔɠaa kəlee laa ɉaláá kulɔi gwɛi mɛ̨i nwɔ̨n ɉu.

¹³ Di gboyɛliɠaa da gɔwɔ kwąnąɠaa mąą waa. Ɉaláá laa həli mun a gəlee laa həli Yai-Laa ɓa, ə gəlee kələn ɉaláá kulɔi; yili kaa a haláá hɛn da gəlee kələn, mąą kun nɛ̨ɛ̨ yɛ Yai-Laa liilaa.

¹⁴ «Akɛ, nwɛ̨ni ɓə di paa la a Yai-Laa kɔ́ hɛn, diɛ gəlee kələn, ə kɛ a tonwələn, a wala kɛ tii, ɓopo.

¹⁵ Ɉaláá laa həli mun a naa ɉaláá kulɔi, ə gɔn gbəlaan ə gulɔ ɲą, ə nwun ganin gələn yili pulu, ə ɲąmą taɠa ɉaláá kulɔi ɓa.

¹⁶ Da gwɛ́lɛ kulɔ, da ɉu hɛnŋąą, di bili ɉaláá kulɔi kɔ́wɔ mu, voló həɠəi pələ, ɓɛi da nuwu pu laa.

¹⁷ Da nwɛ̨ni kwəi ɓɛla, goon dɔ̨nɔ̨ ə lɛɛ bələ tɔ̨nɔ̨ dɔ̨nɔ̨ ə lɛɛ bələ tɔ̨nɔ̨, hva ɉu ɓɛla hvo gulɔ gee la. Ɉaláá laa həli mun a gələn gwɛi mɛ̨i, ɉaláá kulɔ kəhi mɛ̨i. Yili kaa a haláá hɛn da gəlee kələn, mąą kun nɛ̨ɛ̨ yɛ Yai-Laa liilaa.