Ɉeremi 51 - Yálá laawoo hɛɓɛ1 Yai-Laa woo ka, yɛ diɛ: Gáá pai lɔi kala hvaŋą ɲąątɔɔi Babilonə ɓa, da ɲówoɠaa di wɔ yɛnɛ̨ɛ̨. 2 Gáá nwɛ̨ąą tíi mą, diɛ ɉutaɠa-taɠa, diɛ nwɔ lɔi lɛɛ a gboloon, nwɛ̨ąą tii kaa pai kulɔi pələ kəlee, diɛ wolo mą, a mɛ̨nį ɲąąnwąnąą yələ. 3 Nu ə mą nwɔ kilɛn ɲala ɉu, 'ka hvo nɛɛ laa, nu ə mą ɉuɲąŋą kɛnɛ̨ a nwɔ hə́méi, 'ka hvo mąąwɛli kaa. 'Ka hvo kpɛli nwɔ hilɛlɛa mąąwɛli kaa. 'Ka nwɔ kɔkulaaɠaa kəlee kulɔ mą́ą́ a haláá. 4 Nuąi daa di mąą nwąną di paa pələ ɓa, di kaa tooi Kalde lɔi hu a di powa. Nuąi daa ɓɔ di hu, diɛ too bələɠaa pɔ. 5 Mąąhɔlɔɓo, nɛ̨ŋɛ̨n di ɉəɠə Israɛlə nwɔ Yálái Mąąhəɠɛɛ ɓa, gɛnɛ̨i nɔi, ya pa, Israɛlə da Ɉuda di wɔ Yálái hvo haa li di yəi, di hvo lɛɛ li a Mɛ̨nį Kəlee ŋą Hééɓomun Yai-Laa wɛli. 6 'Ka pu, ka kulɔ Babilonə daai, nu kəlee ə gbɔwɔ nwun mąąkilɛi kwɛli; a wala kɛ tii, ka nwun gaa pai lɛɛi ɉu. Ɓɛlɔwai gaa pai nwɔ túwɔ́ pələ ɲɔ̨n gwələ kulɔi la, a ɲələi Yai-Laa kaa pai nwąną kulɔi la mą; ɉɛn Babilonə ə gwɛli, ya ɓə gáá pai dɛɛi bɔ. 7 Babilonə ə kɛ Yai-Laa yəi yɛ hɛni gəgən, ə kɛi lɔi kəlee kɛ a lɔɔ hon, yɛnɛ̨ɛ̨ nuą di kɛi nwɔ lɔɔi kpələ, diɛ ɓowo la. 8 Ya ka, Babilonə aa too lɔ ŋɛ̨i tɔ̨nɔ̨, nuą tɛɠii pələ, ɉu aa yali. 'Ka wɔlɔ pu mɛ̨i, 'ka ɉali kɛ, gaa kiɛ pai ɓaloi. 9 Kwaa Babilonə hali kɛ pələ kwɛli, Kɛlaa, kɛi hvo kɛa mą. 'Ka tee kɛa mą, nu kəlee ə li bɔ taai, nwɔ mɛ̨nįi aa həli yələkɔlɔ ma, aa tɛ tulɔ kpinįnŋaa diɛ. 10 Yai-Laa aa gu nwun mąąɓo mɛ̨nį kulɔ pɔ̨nɔ̨ ɲą. 'Ka pa gu Yai-Laa gu wɔ Yálái kɛ mɛ̨nį hukulɔ Siɔn. 11 'Ka donwąɠaa ɲąąkulɔ, ka gɔ́ kɔ́ hɛnŋaa həɠə, Yai-Laa aa Medi tɔɔɓɛlaa kili mąą kɛlɛ, mɛ̨nįi gaa Yai-Laa kwəi yɛ hvilɛn na Babilonə ɓa, ya ɓaa ə gulɔ lɔi mɛ̨i. Yai-Laa kaa nwąną kulɔi, yələkɔlɔn gaa nwąną kulɔi. 12 'Ka gɔ́ təli Babilonə hįį ɓa, 'Ka daa mąąkpɛ nuą ta pɛlɛ mą, 'ka nuą hee di tɔwɔ lɔwɔi. Gaa tii, mɛ̨nįi Yai-Laa ə mo yɛ hvilɛn Babilonə nuą diɛ, ə gbɛa giliŋąhiɛ mą, gaa kɛa gɛi. 13 Yɛ́i heeni yákpɛa kpɛaɠaa kwɛlɛ, ə́ yee laa hvɛɛ hɛn gɔw hu, ə́ wɔ yɛnɛ̨ɛ̨ aa kpɛɛ. Yáá ə́ tɔ̨nɔ̨ kəlee hɔlɔɓo. 14 Yai-Laa Mɛ̨nį Kəlee ŋą Hééɓomun aa gwɛla a gbɔwɔ; yɛ diɛ: «Gáá ə́ laa hvɛɛi a nuą, di tamąą di tɛɛ peelə ɓa, diɛ kɔ́ húú pili ə́ mɛ̨i, yɛ mɔ̨nun dee nuą da kɛi tomą.» Yɛnɛ̨ɛ̨ pɛli Yálá da haliɠaa 15 Ya ɓə lɔi pɛli a nwɔ huwalawala, ə yɛnɛ̨ɛ̨ hee kpəlin na kɛ a kilikɛɲəi, ə yələkɔ́lɔn ɉu lɛan a nwɔ mɛ̨nį kɔ́lɔnŋąą, 16 Mąąhɔlɔɓo, ya ɓə a tulɔ yáɠaa tiɛ̨ gee mɛ̨i yələi, yɛ tulɔ kpinįnŋaa kulɔ lɔi kpon ɉeei, a di hu wia, diɛ tɛ; yɛ tulɔ pu a yələgbąnąą nwɔ mąną-mąną; ya ɓə a hvaŋąɠaa kulɔ ɓɛi a di pu laa gee mɛ̨i. 17 Nu kəlee da lɛɛ lɔ tín, di hva pɛli hvaai, di hva mɛ̨nį ŋąą kaa. Hali pɛli nuą kəlee diɛ nwumɛ̨ di wɔ haliɠaai mąą mɛ̨nį hu, di wɔ haliɠaai, mąą mɛ̨nįɠaa kaa a lɛɛ, di nɔ̨ɔ̨ hvo di hu. 18 Kili kpɛɛ gwəi hɛnŋąą li, yɛlɛɛ kulɔ ɉu hɛnŋąą li, yələi mąąnɛ̨ɛ̨ di di kwɛlanmo la, da lɛɛ ɉu. 19 Ɉakɔbə nwɛ̨i hvo tii, ya ɓə hɛn gəlee kɛ, ə lɛɛ, Israɛlə lɔi kaa a gwɛlin nɔi, naa ɓaa a: Yai-Laa; Yai-Laa Mɛ̨nį Kəlee ŋą Hééɓomun. Babilonə hon mɛ̨nį 20 Ə́ kɛ ɲə́i a yənə, a kɔ́ kɔ́ kwɛli hɛn, ŋį́ lɔiɠaa hu ɓuwɔ a yɛ́, ŋį́ lɔiɠaa huwolo a yɛ́; 21 ŋį́ hooɠaa da hoo gilɛ həɠə nuą ɓuwɔ a yɛ́, ŋį́ wotoloɠaa da di gilɛ həɠə nuą ɓuwɔ a yɛ́. 22 Yɛ́ ɓə ŋį́ hinąą da nɛ̨ąą ɓuwɔ a yɛ́, ŋį́ hulɔgoloɠaa da nu nwunuɠaa ɓuwɔ a yɛ́ ŋį́ hilɛlɛa da nɛ̨ɛ̨lɛa ɓuwɔ a yɛ́. 23 Taatɛlɛɛ da di mɛ̨i kaa nuą ɓuwɔ a yɛ́. Ŋą́ tíi kɛ nuą da di wɔ kóló kɛ kwɛli hɛnŋaa ɓuwɔ a yɛ́. Ŋą́ lɔi ɲąą woo ɓo nuą da di ɲɛ̨itɔɔ nuą ɓuwɔ a yɛ́. 24 Mɔ̨nɔ̨ɠaa kpɔ Babilonə da Kalde nuą di naa Siɔn ɓa, gáá gəlee kwələ kulɔi diɛ ka ɲɛ̨i ɓa. Ɲą́ą́ Yai-Laa nwóó li! 25 Yɛ́ kpɔ ɓə vílɛn ŋąą ə́ pulu, kɛɛ kalamun, yɛnɛ̨ɛ̨ kəlee hu kalamun; Ɲą́ą́ Yai-Laa nwóó li. Gáá ɲéé kpuwulu kɛi yɛ́, gɛ́ ə́ kulɔ kwɛniɠaa mɛ̨i, gɛ́ ə́ too, gɛ́ ə́ mąą pənə a nwɔ̨n dəŋą yee. 26 Yɛ́i kɛ a pɛlɛ́ tɔɔ kwɛni, yɛ́i kɛ a pɛlɛ hvilɛn gwɛni, di hva kɛa kulɔ ɓɛi ə́ kaa laa, ə́ kaa pai lɛɛi a lɔi pun, a hvoló kəlee da nwɔɔ, ɲą́ą́ Yai-Laa nwóó li. 27 'Ka nuą təli gɔ́ ɓa, yɛnɛ̨ɛ̨ nuą kəlee, 'ka gɔ́ tulu hvɛɛ lɔiɠaa hu, 'ka lɔiɠaa ɲąąkpɔn, di wolo mą; a Yálá nwɔ kɔ́. 'Ka tɔɔɓɛlaa ɲąątɔɔ mą, Araratə, Mini, Askenazə, 'ka yala nąmįną tɔɔ, diɛ kɔ́kulááɠaa kulɔ mąą mɛ̨nį ɓa, 28 'Ka nɔiɠaa ɲąąkpɔn Yálá nwɔ kɔ́i kɔ́ mɛ̨nį ɓa, diɛ wolo ma, Medi tɔɔɓɛlaa di wɔ lɔi ɲąą woo ɓo nuą, nɔi hu kóló kɛ nuą kpɛa kpɛaɠaa da nɔiɠaai kpɔ ɲee mu. 29 Lɔi mąą kaa kpɛlin ɉii, nwun mini-mini yɛ yɛɛ laa, mɛ̨nį Yai-Laa ə mo, gaa kɛa gɛi. Yaa ɓaa, ə Babilonə lɔi mąą pənə a lɔi pun! Ə ɉu ɓo; ə ɉu nuą kəlee kulɔ ɉu. 30 Babilonə kɔ́kulááɠaa daa lənə gɔ́ ɓa, daa hee so-so, hoŋonŋaa hu, di hvaai aa kpɛɛ di yəi, daa kɛ yɛ nɛ̨ąą, di kaa nwɔ pɛlɛ́ɠaai kələn ɉii. Diɛ nwɔ kponŋaai ɓɛla. 31 Wɛlɛɛ ɓomun a lɛɛ gilɛ həɠəi, ə da kpɛli hon. Hɛɓɛ́ laalɛ mun ə hɛɓɛ́ laalɛ mun da kpɛli hon, diɛ li kɛi Babilonə tɔɔmun ma: daa ə́ wɔ taai hon gɔlɔ kəlee, 32 daa bələ kəlee hon, daa nwɔ̨n bili daa mąąkpɛ pɛlɛ́ɠaa hu, gɔ́ kulaɠaa daa pu. 33 Yai-Laa Mɛ̨nį Kəlee ŋą Hééɓomun, Israɛlə nwɔ Yálái woo ka, yɛ diɛ: Babilonə lɛlɛɛ kaa yɛ mɔ̨nun gbala gbaha, ɓɛlɔwai di kaa pai bɛlɛi la, ɉu hvo kɛa kwɛa li diɛ pa mɔ̨nun bui mɛ̨i, Yálá kaa nwɔ nuąi nwąną kulɔi 34 «Babilonə tɔɔmun Nabukodonosorə aa mį́i, aa gbɔ́lɔ kəlee yala ɉú, aa gɛ yɛ kɔ́wɔi da ɉu kɔ́mɔ̨, aa gbələ yɛ yileen, aa goo laa hvɛɛ a nwúlɔ, aa nówó pílii. 35 Siɔn nuą ka kɛ diɛ: Nwúmɛ mɛ̨nį da nwɔ́ mąąwɛli mɛ̨nį, ə yɛɛ a Babilonə nwun, Ɉerusalɛmə, mo yɛ́ mą: ‹Ɲą́mą ə yɛɛ a Kalde nuą nwun.›» 36 Yii gaa tii, Yai-Laa woo ka, yɛ mą: Ɲą́ą́ ɓə ə́ mąą mɛ̨nį ɲɛ̨i kulɔi, ə́ nwąną kulɔ mɛ̨nį yɛ lɛɛ nwúɔ̨, Gáá pai nwɔ yalee kpalai, da ɲa nwun gulɔi. 37 Babilonə kaa pai lɛɛi a kwɛni hįį, a yalaɠaa pɛlɛi, a lɔi pun, yii nu a gaa, hvo kɛli a kɛ: «Éé kə́!» Ŋą́ ɉu nuą kulɔ laa. 38 Di kaa pai kɛi huluun ɉii mɛ̨i a gee, yɛ yala gbɔnŋaa, diɛ hvaa di nwun ɉu, yɛ yala lonnii. 39 Hvɛ́nɛ̨ aa di yɔwɔ, gáá kɔ̨nɔ̨n bili diɛ, gáá lɔɔ tɔɔi di la, yɛ di yee kulɔ di mu, diɛ yíi, a yíi ɲɔ̨nwɔ̨mąn, kpɛɛ hvo mą, di hva kɛa pənə di hvo nwun. Ɲą́ą́ Yai-Laa nwóó li. 40 Gáá lii a diɛ, diɛ di nwun dee, yɛ ɓɛlaa hilɛɠaa, yɛ ɓoluɠaa da ɓɛlaaɠaa. Babilonə mɛ̨i wɔlɔ woo 41 Sesakə lɔi kəlee nwɔ mąąwiɛi, di ɉon bələ kɛ ləi? Daa ɉon a kɔ́! Éé kə́! Babilonə ə kɛ pələ kɛ ləi a lɔi pun lɔiɠaa lɔwai? 42 Gboloyá aa laa Babilonə mɛ̨i, aa lɛɛ yaɠilin ɉu. 43 Nwɔ taaɠaai daa lɛɛ a taa kpoloon, a gbɔwɔlɔ kwɛni lɔi, da gbalə koloon nɔwɔ. A lɔi yii nu ta hva kɛa hee ɉu, nu ta hva kɛa daa tɔɔ laa, nu ta hva kɛa tɛɛ laa. 44 Babilonə halii tii a Bɛlə, gáá hee ɉu, ɉɛn ə mį́i, gáá gulɔi gwəi. Yɛnɛ̨ɛ̨ nuą di hva kɛa pa bɔ a di kpulu, Babilonə mąąkpɛ hįį kəlee kaa pui. 45 Kaai a nwɔ́ nuą, 'ka kulɔ laa! Nu kəlee ə nwun mąąkɔ̨nwɔ̨, Yai-Laa nwɔ líiholi kɛnɛ̨ tɔwɔ. 46 Və́ bɔ ka hvii hvo kpɛɛ, ə lɛɛ, mɛ̨nįɠaai di kaa moi nɔi, hvo ka mąą ɲɔw, hvo gaai, kwɛlan ɲii, mɛ̨nį yii a kulɔ; kwɛlan da kpɛli, mɛ̨nį takpɛli, wea mɛ̨nį a kɛ nɔi, tɔɔmun yɛ mɛlan dɔɔmun gbɛ. 47 Yili ɓə gaa mą, Yələ ta kaa pai həlii, gáá pai heei Babilonə haliɠaa hu, yili hva kɛ a nɔi ɲɛ̨i pɔ̨nɔ̨ mɛ̨nį tɔ̨nɔ̨ kpɛli. Nu kaa pai kɛi tooi lɔ a bowa. 48 Mąą yələ, yələkɔlɔn da lɔi, da di hu hɛnŋaa, di kaa pai kɛi wələ tooi Babilonə mɛ̨i, a kɔ́ nɛ̨ɛ̨ mąą wələ. Mąąhɔlɔɓo, ɉu wolo nuą kaa həɠəi ɲələi pələ. Ɲą́ą́ Yai-Laa nwóó li! 49 Babilonə aa yɛnɛ̨ɛ̨ nuą tamąą nwun napili, Babilonə yɛ́ kpɛli ə́ nwun napili hiɛ li, Israɛlə nuą tamąąi di nwun na aa pili, di mąą mɛ̨nį ɓa. 50 Israɛlə, kaai kulɔ Babilonə nwɔ gɔ́ kɔ́ ɓɔwa yee ŋą, 'Ka bələ həɠə! 'Ka hvo tɔɔ! Yai-Laa kili ə too ka ŋą, nwɛ̨ą lɔi hu kwɛa ŋɛ̨i hu, 'ka ka kili lɛɛ Ɉerusalɛmə hu. 51 Kwaa nwumɛ̨ ku lalan bələ ɓa, nwumɛ̨ aa ku ɲɛ̨i paa. Nwɛ̨ąą daa lɔ Yai-Laa nwɔ pɛlɛ́i mu, gɛɛnąą mąąhəɠɛɛ ɓa. 52 Yii gaa tii, Yai-Laa yɛ: Yələ ta kaa pai həlii, ŋį́ hee nwɔ haliɠaa hu, ɛlɛɛ, nu lɛɠɛɠaa kaa pai kɛi ɲiŋɛ̨i nɔi nąą kəlee. 53 Ə mą kɛ, Babilonə aa tɛ yələi, yɛ mąąkpɛ hįį tɔɔ, yii nu hva pɛli tɛi mą, ŋą ɉuwolo nuą ɲąątɔɔ mą, di yee ə lɔ. Ɲą́ą́ Yai-Laa nwóó li! 54 «'Ka pa kilɛ kuɔ!» Woo kaa tɔɔi Babilonə. Mɔ̨nɔ̨ kɛnɛ̨ aa laa Kalde lɔi ɓa! 55 Yai-Laa ka tii Babilonə huwoloi, yɛ gɛ nuą diɛ gboo təli ɉu, ə mą kɛ di tomą wooi, aa kɛ yɛ ya hvɛɛɠaa da kɛi huluun, di mɛ̨i kaa pai haai. 56 A tɛ̨ą, kɛɛ kalamun gaa pai, ə yili mą, ə yili Babilonə ɓa. Da nwɔ kɔkulaaɠaa hon, di wɔ kilɛnŋaai hu yali yali, Yai-Laa kaa a nwąną kulɔ Yálá; nwəlɛɛi kwələ kulɔi. 57 «Gáá lɔɔ tɔɔi Babilonə lɔi hu kóló kɛ nu kpɛa kpɛa kəlee la, da nwɔ mɛ̨nį kɔ́lɔn nuą, da nɔi ɲɛ̨itɔwɔ nuą, bɛlɛɛ galanɉonŋaa diɛ, da gulaaɠaa; yɛ di hon. Di kaa pai yíi, kpɛla bələi hva kɛ mą, di hva kɛa di ɲįnąąɓo. Dɔɔmun da kɛ naa ɓaa a: Yai-Laa Mɛ̨nį Kəlee ŋą Hééɓomun nwoo li!» 58 Yai-Laa Mɛ̨nį Kəlee ŋą Hééɓomun woo ka, yɛ mą: «Babilonə taa mąąkpɛɛ hįį ŋąą kɛnɛ̨i, aa pu kpɔ tɛ̨ɛ̨tɛ̨ɛ̨?. Nwɔ̨n aa nwɔ kpon gbɛa-kpɛaa kələn. Nuą kaa mɔ̨nɔ̨ mįi kpɛli kpɛli, tɔ̨nɔ̨i lɔiɠaa kaa gwɛlii, nwɔ̨n gɔ̨nɔ̨n ni.» Ɉɛɓɛ́i di bili Efratə ɲálee hu 59 Seraya, yai kɛ a Neriya lon, ə ɓo a Maseya mąnįn, mɛ̨nį Yálá kwəi mɛ̨nį hukulɔ mun Ɉeremi ə dí la, ya ka; ɓɛlɔwai Ɉuda tɔɔmun Sedesiasə ni di kɛi li la Babilonə, a nwɔ tɔɔlaa gwɛlan nąąn nɔwai. Seraya ə kɛ ɉiɛ mɛ̨nį nwun na. 60 Mɛ̨nį ɲąąnwąnąąɠaa kpɔ kɛi pa laai Babilonə ɓa, a mɛ̨nįɠaa kpɔ ŋɛ̨i gwaa mo, yaai di di pɛ̨ɛ̨ a Babilonə mąą mɛ̨nį, Ɉeremi aa kɛ gəlee pɛ̨ɛ̨ hɛɓɛ́ tɔ̨nɔ̨ hu, 61 Ɉeremi yɛ Seraya ɓa; yá pa həlii Babilonə, yá nąą kaa, nwooɠaa ŋɛ̨i kəlee ɓo. 62 Yili pulu, yɛ́ diɛ: «Yai-Laa yɛ́ ɓə mɛ̨nįi ŋɛ̨i laa ə́ kwəi, yɛ hvilɛn na gɛɛnąą ŋɛ̨i ɓa, yɛ́ kɛ diɛ, ə́ kaa pai nąą woloi hvá hɛn da lɛɛ laa a vulú, yɛi kɛ a nu, a wala kɛ tii, huwɔ. Ə́ mo, yɛ́ ə́ kaa nąą kɛi a lɔi pun a yələ kəlee.» 63 Seraya, yá kpɛɛ a ɉɛɓɛ́i ŋɛ̨i ɓoɔ, kwɛni kpuwulu yili mą, ə́ bili Eufratə ɲá hamąi. 64 Ɛlɛɛ, yɛ́ mą: «Bələ ɓə Babilonə kaa pai lɛɛi la yai, mɔ̨nɔ̨ɠaai gáá pai naai mą, hva kɛa pənə hvo kulɔ ɉu.» Ɉeremi wooɠaa kpɛlai ka tii. |