Ɉeremi 41 - Yálá laawoo hɛɓɛ

¹ Ɲąnin mɛ̨ihveelɛnąą, Elisama lon Netania non Yismaɛlə, ŋɛ̨i kɛ a tɔɔmun ɉuwu, ə ɓo a tɔɔmun nwɔ kalanɉon gɛnɛ̨ ta; ə pa Ahikamə lon Gedaliasə pɔ Mispa, nu pow hvilɛnŋąą kɛ bɔ. Di lɛɛ kɔ̨nɔ̨n mįi da diɛni Mispa,

² Netania lon Yismaɛlə da nu powi tii kɛ bɔ, di di muhəɠə nuą tɛɠii, di Ahikamə lon Gedaliasə paa a ɓɔwa kwɛa, nui tii Babilonə tɔɔmun ə ɉee, yɛ ɲɛ̨i kɛ nɔi ɓa. Bələ ɓə di baa la.

³ Ɉuda nuąi kɛ Gedaliasə pɔ Mispa da Kalde nuąi kɛ laa, da gɔ́kulááɠaa, Yismaɛlə ə gəlee paa.

⁴ Gedaliasə paai di mo, hvóló hveelɛ ə tɛɛ, nu ta kili hvo ni kɛ ɉu.

⁵ Nuą di həɠə Sisɛmə da Silo, da Samari, di kɛ a nu pow mɛ̨ihaaɓa, daa di kpɛlɛ pu, di mąąhəɠəɠaa huɓɛlaa, pala teɛ diɛ, di kɛi pa a haláá hɛnŋaa da lansan a Yálá hee pɛlɛ́ nwɔɔ.

⁶ Netania lon Yismaɛlə ə kulɔ Mispa, yɛ li di laakwiɛn ɉii, ə kɛi li, yɛ wɔlɔ; Ə həli nuąi tii diɛ, yɛ diɛ: 'Ká pa ka Ahikamə lon Gedaliasə kaa!

⁷ Di həliɛ daa hąąi, Netania lon Yismaɛlə da nuąi tii kɛ bɔ, di di paa, di di powa pili ɲálɔwa hu.

⁸ Nuąi tii lɔwai nu pow ə kɛ laa, diɛ Yismaɛlə ɓa: «'Hvó ku paa, kwaa kɔ́nɔ̨nŋaa loo gbomoi ku yee kɔ́nma, a mɔ̨nun, kpai, da wulɔ, ɛlɛɛ, da kwɛ̨n nwulɔ.» Yismaɛlə hvo di paa da di ɓɛlaa.

⁹ Ɲálɔwai Yismaɛlə ə nu powaɠaa pu ɉui, ɲálɔwa kɛnɛ̨i tɔɔmun Asa ə dee ɓɛlɔwai Israɛlə tɔɔmun Baesa ə kɔ́ pɛlɛ la ma. Netania lon Yismaɛlə ə ɲálɔwai tii laahvɛɛ a nu powa.

¹⁰ Mispa nuą yiiɠaai lɛɛ, Yismaɛlə ə li a diɛ luwɔlaa hu; dɔɔ kwəlii nɛ̨ą, da nuąi kpɔ kɛ nii Mispa; diɛi tii tɔɔmun mąąkpɛ nuą nwun nąmu Nebuzaradan ə di kalihvaɓo Ahikamə lon Gedaliasə ɓa. Netania lon Yismaɛlə ə li a diɛ luwɔlaa hu. Ə pənə yɛ li Amɔn nuą pɔ.

¹¹ Karea lon Yohanan da gɔ́kulaa nwun nąmįnąi tii kɛ bɔ di mɛ̨nį ɲɔ̨nwɔ̨ɔ̨i ti, Netania lon Yismaɛlə ə gɛ, di bələ mɛ̨n.

¹² Di di wɔ nuąi ɲąąkpɔn, di laŋąn Netania lon Yismaɛlə ɓa, di gaa Gabaɔn powa kwɛlɛ.

¹³ Nuąi kpɔ tii Yismaɛlə ə kɛi li a diɛ, Karea lon Yohanan kaai di mo, da gɔ́kulaa nwun nąmįnąi tii kɛ bɔ, di kwəi ə nɛ̨ɛ̨.

¹⁴ Nuąi kpɔ tii Yismaɛlə ə di kulɔ Mispa yɛ li a diɛ luwɔlaa hu, di yali di pulu, diɛ li, Karea lon Yohanan pɔ pələ.

¹⁵ Netania lon Yismaɛlə nwɛi, Karea lon Yismaɛlə kaai ə mo, ə pu, da nu mɛ̨ihaaɓa. Ə li Amɔn nuą pɔ.

¹⁶ Karea lon Yohanan da gɔ́kulaa nwun nąmįnąi tii kɛ bɔ, di nuąi tii kɛ daa lɛɛ, diɛi tii Netania lon Yismaɛlə ə di kulɔ Mispa, ə di kɛ a luwɔ, yɛ li a diɛ, Ahikamə lon Gedaliasə paa pulu, di di həɠə di nįnįn mu; ɉinąą mąn, gɔ́kulááɠaa mąn, nɛ̨ąą mąn, nɛapɛlɛɛ mąn, da dɔɔ kwəlii nuąi tii di həɠə a diɛ Gabaɔn.

¹⁷ Di bələ hon, di pa di di hvįįtɔɔ Kimamə kələ la, Bɛtleɛmə daa kpala, di kɛi kɛ də li Eziptə pələ.

¹⁸ Di kɛi pu Kalde nuą diɛ, di kɛi ɲɔw diɛ; mąąhɔlɔbo Netania lon Yismaɛlə aa kɛ Ahikamə lon Gedaliasə paa, a nui tii Babilonə tɔɔmun ə ɉee yɛ ɲɛ̨i kɛ nɔi ɓa.