Ɉeremi 34 - Yálá laawoo hɛɓɛ

Sedesiasə nwɔ yɛnɛ̨ɛ̨ ɲąąkpɛɛ pələ

¹ Ɓɛlɔwai Nabukodonosorə Babilonə tɔɔmun, nwɔ kɔlaɠai, da yɛnɛ̨ɛ̨ tɔɔɓɛlaai kpɔ nwɔ heeɓolaa ə kɛ di mɛ̨i, da nuąi daa kɛ kɔ́ pɛlɛ Ɉerusalɛmə ɓa, da gwɛlɛ taaɠaa kəlee, nwooi ŋɛ̨i ə həɠə Yai-Laa pɔ, yɛ həli Ɉeremi ɓa, yɛ kɛ mą:

² «Yai-Laa Israɛlə nwɔ Yálái nwoo ka, yɛ mą: 'Li ə́ mo Ɉuda tɔɔmun Sedesiasə ɓa, 'li ə́ mo mą, a ə́ nwąnąi, yɛ́ mą: Yai-Laa yɛ: Gaa pai daa ŋɛ̨i tooi Babilonə tɔɔmun ɲee kɔ́nma, gaa pai nwɔ̨n bilii ɉu.

³ Yɛ́ kpinįi, hvo pai kulɔi ɲəi, di kaa pai ə́ hon ɉii, di ə́ tɛɛ bɔ, yɛ́ ka Babilonə tɔɔmun, ka káá pai ka ɲɛ̨i kwəleen ɉeei gee ɓa, kaa pələ pili ka kee ɓa, ə́ kaa pai lii Babilonə.

⁴ «Ə mą kɛ tii, Ɉuda tɔɔmun Sedesiasə, ə́ wəli tɔɔ Yai-Laa woo ɓa; mɛ̨nįi Yai-Laa kaa moi yɛ hvilɛn na yɛ́, ya ka, yɛ mą: ‹Kɔ́ ɓɔwa hvo pai ə́ paai.

⁵ Ə́ kaa pai haai liilaa hu, diɛ wulɔ kun nɛ̨ɛ̨ kələn ə́ mąą mɛ̨nį ɓa, yɛ bələi di gələn na, ə́ nanii kɛ ə́ tɔwɔ dɔɔlaa hu, di mąą mɛ̨nį hu. Di kaa pai ə́ haa wɔlɔ ɓoi, diɛ kɛ: Le mɛ̨nį ɲąąnwąnąą ɓəi Ną́mu! Ɲą́ą́ Yai-Laa, ɲą́ą́ ɓə mɛ̨nįi tii ɓoi.›»

⁶ Yálá kwəi mɛ̨nį hukulɔ mun Ɉeremi, ə nwooɠaai tii kəlee ɓo Ɉuda tɔɔmun Sedesiasə ɲɛ̨i ɓa Ɉerusalɛmə.

⁷ Ɓɛlɔwai Babilonə tɔɔmun ə kɛi gɔ́ pɛlɛ la Ɉerusalɛmə taa ɓa, da Ɉuda taaɠaai kɛi tɔɔ na, yɛ bələi Lakisə da Azeka di kaa laa, mąąhɔlɔɓo, diɛ ɓə a Ɉuda taaɠaai di mąąkpɛ hįi ə kɛ diɛ; di hvo ni kɛ daa hveelɛi tii hon ni.

Gɔluwɔɠaa mąą mɛ̨nį

⁸ Nwoo ŋɛ̨i ə həɠə nwɔ̨nɔ̨ Yai-Laa pɔ, yɛ həli Ɉeremi ɓa. Ɓɛlɔwai tɔɔmun Sedesiasə ə mo la nuąi kpɔ Ɉerusalɛmə diɛ, da diɛni di woo ə laa ma, diɛ nuwɔɠaa kəlee lɛɛ di kpɔɔ ɓa, nąąlɔwai li kɛ.

⁹ Mąą nɛ̨ɛ̨, nui nwɔ luwɔ a kɛ a Hebreu mun, ə nɛɛ gbɔwɔ ɓa; ɉinąą mąn nɛ̨ąą mąn. Ɛlɛɛ, káái a Ɉuda nuą, nu ta hvo kɛa gaayɔwɔ ta kɛ a luwɔ.

¹⁰ Nu kpɛa kpɛaa da nɔi lonnii kəlee di kɛɛ mɛ̨nįi tii ɲąą yilii, yai kɛ a nuwɔɠaa lɛɛ mɛ̨nį di kpɔɔ ɓa; ɉinąą mąn nɛ̨ąą mąn, ɛlɛɛ, di hva kɛa di yee kanąn diɛ, luwɔlaa hu. Nwooi tii mɛ̨n di mo, di bɔ mɛ̨nį kɛ, diɛ nuwɔɠaa lɛɛ di kpɔɔ ɓa.

¹¹ Yili pulu, di di woo yali bulu, nuwɔɠaai tii di di yee ɓo diɛi, di pənə di di hon a luwɔ, ɉinąą da nɛ̨ą.

¹² Yai-Laa woo ə həli Ɉeremi ɓa, yɛ mą:

¹³ «Yai-Laa Israɛlə nwɔ Yálái woo ka: Kwa ka nąnni ku woo ə laa mą, ku ɲąą yili, ɓɛlɔwai ŋį́ di kulɔ la Eziptə lɔi hu, nuwɔ pɛlɛ́ mu.

¹⁴ ‹Kwɛlan mɛ̨ihveelɛ tɛɛ pulu, ka kaayɔwɔɠaai a Hebreu, yai aa kɛ gbɔwɔ tɔlaa hee kaa; nu kəlee a mąą nu lɛɛ gbɔwɔ ɓa. A lɛɛ ka yəi tɔlaa laa hu, kwɛlan mɛ̨ida yeemu, yili pulu, ka nɛɛlaa.› Kɛlaa, ka nąnnii di hvo di wəli tɔɔ, di hvo nwoo mɛ̨n.

¹⁵ Vóló hveelɛi ŋɛ̨i yeemu, kaa kɛ ka hɔn mąąhvaalən; mɛ̨nįi ɉaŋąą ɲɛ̨́i ɓa, kaa gɛ. Ká kəlee kaa ka kaayɔwɔɠaa lɛɛ mɛ̨nį di kpɔwɔ ɓa, laakwɛlanmo, kaa kɛ ka woo kwɛlɛ ɲɛ̨́i ɓa, bɛlɛ́i ŋɛ̨i da náá təli mu naaləi.

¹⁶ Kɛlaa, kaa pənə kaa ka woo kala, kaa náá ɓɛlɛ too la tii. Ka kəlee káá pənə káá ka wɔ luwɔɠaai hon nwɔ̨nɔ̨; ɉinąą mąn nɛ̨ą mąn. Diɛi tii kɛ kaa ka yee ɓo diɛ, káá pənə káá di tɔ̨nɔ̨ mį́i yɛ luwɔɠaa.»

¹⁷ Yili mąą mɛ̨nį ɓa, Yai-Laa woo ka, yɛ diɛ: «Ka hvo lɛɛ li nwóó mu, ka hvo ka kaayɔwɔɠaa da ka nąn nonnii lɛɛ li di kpɔɔ ɓa: ‹Ɲą́ą́ gbɛli, gáá ka lɛɛ mɛ̨nį ka kpɔɔ yee kɔ́nma loloɓoi, gɛ́ ka lɛɛ ɓɔwa kwɛa yəi, da ɲɔ̨n, da pulu; Yai-Laa woo li. Gáá ka kɛi a hɛn yɛnɛ̨ɛ̨ tɔɔɓɛlaa kəlee da ɲɔw mą.›

¹⁸ «Nui a nwɔ́ mįnɛ̨i mąą kala, a mįnɛ̨i di hvaa mą, di di yee hee mu ɲɛ̨́i ɓa, di hvo bɔ mɛ̨nį kɛ li. A mįnɛ̨i di ɉəɠə, diɛ Nįŋɛ̨ lon ɉu tee ɉu hveelɛ, ə lɛɛ diɛ tɛɛ mɛla hveelɛi lɔwai.

¹⁹ Ɉuda lɔi da Ɉerusalɛmə ɲąąwooɓo nuą, dɔɔ kwəlii nuą, ɉaláá laa həli nuą da nɔi nąmįną kəlee, nuąi kpɔ tii tɛɛ Nįŋɛ̨ lon mɛla hveelɛi lɔwai,

²⁰ gáá di tooi di yowoɠaa yee kɔ́nma, nuąi di kaa bɔ di di paa, di yee kɔ́nma; di powa a lɛɛ a yələi nwɛ̨nįɠaa da lɔwɔ huwɔɠaa kɔ̨nɔ̨n.

²¹ Ɉuda tɔɔmun Sedesiasə da nwɔ kalanɉonŋaa di wɛi, gáá di tooi di yowoɠaa yee kɔ́nma, Babilonə tɔɔmun nwɔ kɔlaɠai yee ɲą; diɛi ŋɛ̨i daa gɔ́ mąą kwɛa daa ɓa.

²² Yai-Laa yɛ diɛ: Gáá moi di pənə di pa, di pɛlɛ daai ŋɛ̨i ɓa. Di kaa pai woloi mą, di ɉon, di gələn, gáá Ɉuda taaɠaa kɛi a taa kpoloon, nu hva kɛ ɉu.»