Ɉeremi 24 - Yálá laawoo hɛɓɛƁɔ́láá ɓá kpili hveelɛ 1 Yai-Laa ə ɓɔ́láá ɓá kpili hveelɛ lɛ mą́ą́, di heɛ di kee kwɛlɛ Yai-Laa yəi bɛlɛ́ laaləi. Nąąlɔwai, Babilonə tɔɔmun Nabukodonosorə aa kɛ Yoyakimə lon Yekonia, yai kɛ a Ɉuda tɔɔmun, ɉon Ɉerusalɛmə daai, da Ɉuda nɔi nwun nąmįną, ə mą kɛ, da galanɉonŋaa, da gwɛli yɔw nuą ə li a diɛ Babilonə. 2 Ɓɔ́láá ɓá lɛlɛɛɠaa di kɛ gbili dɔlɔɔ hu, yɛ ɓɔ́láá ɓá dɔɔdɔwɔɠaa. Gbili hveelɛnąą hu, wulu ɓaɠaa ɲɔ̨nwɔ̨ɔ̨ kɛ, mįi hvo kɛ diɛ, di kala pələ ɓa. 3 Yai-Laa yɛ mą́ą́: «Ɉeremi! Lə ɓə tii ə́ kaa gaai?» Gɛ́ mą: «Ɓɔ́láá ɓáɠaa ka tii, daɠaa lɛlɛɛ kpɔ a neelee, yiiɠaa tii di kalaa, di ɲɔ̨nwɔ̨ɔ̨ kpɔ a neelee, nu hva pɛli di mįi, di ɲɔ̨nwɔ̨ pələ ɓa.» 4 Nąąlɔwai, Yai-Laa yɛ mą́ą́: 5 «Yai-Laa Israɛlə nwɔ Yálá woo ka, yɛ diɛ: Bələi lɔ da di ɲɛ̨i hee la a nɛlɛɛ mɔ́láá ɓá lɛlɛɛɠaa ŋɛ̨i diɛ, bələ lɔ ɓə gáá pai ɲɛ̨́i lɛlɛɛ heei la Ɉuda kɔluwɔɠaa diɛ, diɛi tii ŋį́ di kpɛ gɛɛnąą ŋɛ̨i ɓa, diɛ li Kalde lɔi hu. 6 Gáá ɲɛ̨́i lɛlɛɛ heei diɛ a wɛlikɛmąąlaa. Gáá pai pənəi ŋį́ pa a diɛ nɔi ŋɛ̨i hu, ŋį́ di tɔɔ, vá kɛa di kala. Ŋą́ di hin, vá kɛa di kulɔ a di nwun. 7 Gáá pai kili tɛɛi di pɔ, diɛ pɛli gɔ́lɔn ɉii la, diɛ kɛ diɛ: Ɲą́ą́ ɓə gáá a Yai-Laa diɛ ɓo a nwɔ nuą, ɲą́ą́ ɓə a di wɔ Yálá; mąąhɔlɔɓo, da pənə di pa bɔ a di kwəi kwəlɛɛ.» 8 Yai-Laa yɛ diɛ: «Mɔ́láá ɓá ɲɔ̨nwɔ̨ɔ̨ɠaai tii mį́i hvo diɛ, di kalaa, ɉɛn da gɛ a diɛ, ya ɓə gáá pai gɛi a Ɉuda tɔɔmun Sedesiasə da nwɔ tí nuąi, da Ɉerusalɛmə nuą gbəliɠaai lɛɛ daai, yiiɠaai kpɔ kɛ nɔi ŋɛ̨i hu da yiiɠaai kpɔ Eziptə lɔi hu. 9 Gáá di kɛi a hɛn da, nuą diɛ ɲɔw mą, diɛ mɛ̨nį kɔ́ɔn diɛ, yɛnɛ̨ɛ̨ lɔiɠaa kəlee hu. Gáá di taɠa taɠai lɔi mɛ̨i nąą kəlee, diɛ pa kɛi a yɛlɛ kulɔ ɉu hɛn. Nuą diɛ lalan ɉuwui lɔpee gəlee, da nɛ̨ŋɛ̨n naa huwui lɔpee pili diɛ. 10 Gáá kɔ́ pɛlɛi diɛ, ŋį́ pulu too diɛ, da ɲɔ̨n, əlɛɛ ɉu, di kpɛɛ nɔi ŋɛ̨i hu, yai ŋą́ dɛɛ di pɔ da di nąnni.» |