Ɉeremi 21 - Yálá laawoo hɛɓɛ

Yálá ə tɔɔmun Sedesiasə woo pulu pənə

¹ Ɓɛlɔwai tɔɔmun Sedesiasə ə Malkiya lon Pasehurə, da ɉaláá laa həli mun Sefania, Maaseya lon dɔɔ la Ɉeremi pɔɔli, diɛ kɛ mą:

² «Yai-Laa mąąni kɛ ku mąą mɛ̨nį ɓa, mąąhɔlɔɓo, Babilonə tɔɔmun Nabukodonosorə aa kɔ́ pɛlɛ kuɔ, gbəli hu Yai-Laa a pɛli ə kpalo mɛ̨nį ta kɛ, ə ku mąąkɔ̨nwɔ̨ Nabukodonosorə yəi.»

³ Ɉeremi yɛ diɛ: «Mɛ̨nįi ka káá lii moi Sedesiasə ɓa, ya ka:

⁴ 'Ká li, káá mą, Yai-Laa, Israɛlə nwɔ Yálá yɛ: ‹Gwɛli hɛnŋaa tii ka yəi kaa gɔ́ kɔ́ la ka Babilonə tɔɔmun ni, da Kalde nuą ŋɛ̨i daa ka hvana daa mąąkpɛ hįi kɔ́lɔ ɓa pələ, gáá gwɛli hɛnŋaa tii kəlee ɲɛ̨i tinɛ̨n ɉii, ŋį́ ɉee daa ŋɛ̨i hąmąi pələ.

⁵ Gáá ɲéé haŋąi a vaŋa kɛnɛ̨ɛ, ɲą́ą́ gbinįi ɓə kɔ́ pɛlɛi kaa a liiholi, kpɔ a kɛɛ kala liiholi, a liikələn gwəi.

⁶ Gáá daa ŋɛ̨i hu nuą kɛlɛi, nu kan da daatɛlɛɛɠaa di kaa haai ɲɔ̨n walawalaa yəi.

⁷ Yili pulu, ŋį́ Ɉuda tɔɔmun Sedesiasə tɛɛ Babilonə tɔɔmun bɔ, yaa da daa ŋɛ̨i hu nuą, yiiɠaai pai kulɔi ɲɔ̨n ɲəi, da kɔ́ kɔ́ ɓɔwa, ə mą kɛ, pulu. Yiliɠaa da too Babilonə tɔɔmun ɲəi, da di yowoɠaa, yiiɠaa di hvilɛn ŋąą di pulu di paa mɛ̨nį ɓa. Gaa pai di paai, hva di mąąwɛli kaa, hva di mąą hvaalɛɛ, di ta lɔpee hva kulɔ a ɲee wolo.›» Ɲą́ą́ Yai-Laa nwóó li!

⁸ Yii ɓaa nuą ŋɛ̨i di wɛi, yá kɛ diɛ: «Yai-Laa woo ka, yɛ diɛ: Ka ka liiɓa həɠə: Ɓalo da haa di lɔwai.

⁹ Nui pai kɛi daai ŋɛ̨i hu, pulu, ɲɔ̨n walawala, da kɔ́ kɔ́ ɓɔwa, ya ɓə pai baai. Kalde nuą daa kɔ́ pɛlɛ daa ɓa, nui pai kulɔi daai yɛ gbɔwɔ tɛɛ di pɔ, mąą nu a lɛɛ a vulú, nwun na kaa pai nɛ̨ɛ̨i, mąąhɔlɔɓo, gaa pai nwɔ yɛnɛ̨ɛ̨ laa hɔn moi.

¹⁰ Yai-Laa yɛ diɛ: A tɛ̨ą, gáá pɛlɛi daa ŋɛ̨i ɓa, gɛ́ mɛ̨nį nwąnąą laa mą, və́ nɛlɛɛ laai mą. Gáá dooi Babilonə tɔɔmun yee ŋą, ə gələn.»

Dɔɔɓɛlaa, di wɔ tɔɔ pɛlɛ́ɠaa, da daa-lee

¹¹ Kaai a Ɉuda tɔɔmun ɲəi bɛlɛ́n nuą, ka ka wəli tɔɔ Yai-Laa woo ɓa!

¹² «Davidə yəi bɛlɛ́n nuą, Yai-Laa woo ka! Yɛ diɛ: Ka kiti tee a ɉaŋaa yələwala pɔ tɛitɛi kəlee ɓa. Nui daa hee mɛ̨i, ka gulɔ ɲəi kɛ; a wala kɛ tii, nwɔ́ liiholi kaa pai ɓɛlai yɛ nwɔ̨n, gaa pai kɛi lən ɉii, nu hva hɔlɔɓo hvo nuwun. Mąąhɔlɔɓo, ka túwɔ́ pələ aa ɲɔ̨n.

¹³ Yai-Laa yɛ: Yɛ́ kpɔ ɓə gáá yɛ́, yɛ́i tii gwɛni yee koo mu. Kaai ka kɛ diɛ: Gbɛɛ kpɔ ɓə pai yɛɛi ɓɛ, yɛ kɔ́ pɛlɛ kuɔ, gbɛɛ ɓə pai lɔi kuɔ nwoloi ŋɛ̨i hu?

¹⁴ Gáá heei ka hu, yɛ bələi ka wɔ túwɔ́ pələ ɲɔ̨n gaa la. Yai-Laa woo ka, yɛ diɛ: Gáá nwɔ̨n bilii nwɔ wəlai hu, nwɔ̨n ə gwɛlɛ hɛnŋaa kəlee kələn.»