Ɉeremi 17 - Yálá laawoo hɛɓɛ

Di hva pɛli Ɉuda nwɔ nɛ̨ŋɛ̨n mąąhvaalɛɛi

¹ Nɛ̨ŋɛ̨n Ɉuda aa ɉəɠə; a tɛ̨ą! Bɛ̨ɛ̨i a kwɛli hɛɓɛ́ kpɔw, a wala kɛti a Kúwɔ́-kwɛni hunwɔla. Bɛ̨ɛ̨i di lii hu! Bɛ̨ɛ̨i di wɔ haláá kulɔ kəhi wəli la!

² Ə gɛ, di wɔ haláá kulɔiɠaa da nwulukpiɛnɠaai di vilɛn ɲeeɠaa nwuɔ̨ diɛ gɔ́ nwuluɠaa mu, gili hvo pa kpɛɛ di lonnii ŋą.

³ Yɛi ŋɛ̨i a ɲee nwuɔ̨ haláá kulɔ mun vaŋalɔɔ, ɲɛɛ kɔ́wɔɠaa hu, gáá ə́ yəi hɛnŋaa da ə́ yəi hɛn gɔwɠaa kəlee tɛɛi di too ɉu, nɛ̨ŋɛ̨n yaa ɉəɠə nɔi kəlee hu a haláá kulaa hali ɓa mąą mɛ̨nį ɓa,

⁴ Ə́ kaa pai gwələ kəlee kulɔi yɛ tɔ̨nɔ̨, ə́ mąą kwɛaa nɔi ŋį́ dɛɛ ə́ pɔ mą. Gáá pai ə́ lɛɛi ə́ yówóɠaa yee mu, nɔi hvo gɔlɔn ɉu. Mąąhɔlɔɓo, kaa nwɔ́ liiholi nwun, hvo kɛa pai kpɛlai mą.

Wəli pulu laɠi ɲɔ̨nwɔ̨ɔ̨ da liilaa kpɔɔ-kpɔɔ

⁵ Yai-Laa woo kaa, yɛ: Nɛ̨ŋɛ̨n naa mun mąą nui a gilitɔɔ nu kan ma, yɛ nįį na nu nwɔ yeewalawala mɛ̨i, yɛ gili kulɔ Yai-Laa hu.

⁶ Gaa yɛ wulu yii gaa gbalə hu, hva nwun nanɛɛ kaa yɛ pa, lɔi pun gələn ŋąą ɓə ɲɛ̨i kaa dɔwɔ, kwɛni lɔi hu ɓɛi a tɔɔ laa.

⁷ Kɛlaa, nui a gilitɔɔ Yai-Laa ɓa, lúwɔ́ kaa mą. Yai-Laa a kɛ a gilitɔɔi.

⁸ Gaa yɛ wului dɔɔ ya kwɛlɛ, ɉamu yɛ li ɲá lii ɓa, hvóló hva ɓɔ ɉu, naa tɛlin ŋąą lɔ a yələ kəlee. Hvóló ə mą hɔɔ kwɛlan dɔ̨nɔ̨ yee mu, hva mɛ̨nį ta kɛ mą, dɛlin gaa lɔ ɉu a yələ kəlee. Má hva kpɛɛ ɉu.

⁹ Nu kwəi kili ɲɔ̨nwɔ̨ɔ̨i hɛn gəlee ɓa, gbəlaan ŋąą, ɉu hva pɛli tɔɔi, gbɛɛ ɓə a pɛli gɔlɔn ɉii.

¹⁰ Ɲą́ą́ Yai-Laa, ɲą́ą́ ɓə ŋį́ nu kwəi kiliŋąhiɛɠaa hu kaa, gɛ́ gwəi kili hu kpɛ. Ŋą́ nu kəlee hvɛla kulɔ yɛ bələi a túwɔ́ la. Yɛ bələi gɛ pələ kaa la.

¹¹ Nui a hɛn ɉɔlɔɓo a hulu, gaa yɛ háɉalii a mɛlan gbɛ ɲąnįn mɛ̨i, ə pɛlɛ laa. Mąą nu nwɔ yɛnɛ̨ɛ̨ hva kpɛli həli ɉąąi, nwɔ hɛn gɔw yɛ kpɛɛ ɲəi; A nwɔ yɛnɛ̨ɛ̨ laa kulɔ nu kpoloon naa hu.

Ɉeremi kaa Yálá hvɛlii

¹² Tɔɔkpəlin mąąwia kaa hvilɛn ni yələi ə gɔwɔ tɔɔ kpɔ yɛnɛ̨ɛ̨ pɛli hvóló ɓa. Nąą ɓə a ku wɔ kɛɛnąą mąąhəɠɛɛ.

¹³ Yai-Laa! Yɛ́ ɓə Israɛlə kilitɔɔ yɛ́; nuąi da ə́ lɛɛ laa, nwumɛ̨ a di ɲɛ̨i paa; nuąi da di mąą kwɛa mą́ą́, kiti a kala diɛ. Mąąhɔlɔɓo, Yai-Laa a tɛɛyá nwun gulɔi, daa nɛɛ.

¹⁴ Yai-Laa, ɉálə kɛ, ŋį́ ɓalo, nwún mąąɓo, nwún gulɔ mɛ̨nįi; Mąąhɔlɔɓo, yɛ́ ɓə gílitɔɔ yɛ́.

¹⁵ Hvó di kaai diɛ kɛ mą́ą́: mįnɛ̨ ɓə Yai-Laa woo kaa laa? Nwoo pɔ mɛ̨nį ə kɛ kani wɛ!

¹⁶ Ɛlɛɛ yaan, gu woo hvə li li a pələ tɔ̨nɔ̨, və́ ɉu hvɛli gɛ́ kɛ mɛ̨nį nwąnąą ə pa ɉa, və́ kɛ mɛ̨nį kalaa nwɔ yələ hu hvɛli li, yɛ́ kpįnįi gbaɠala kaa yɛ́. Mɛ̨nįi kulɔ ná, ŋį́ mo ə́ ɲɛ̨i ɓa.

¹⁷ Hvó ə́ yee wiɛ mɛ̨́i, ə́ hvaŋan mu ɓə ŋį́ mą́ą́kilɛ laa a mɛ̨nį nwąnąą yələ.

¹⁸ Nuąi di hvilɛn ŋąą bulú, di ɲɛ̨i ə paa a nwumɛ̨, hvo kɛ tii a ɲą́ą́, hee di hu, kɛlaa hvo kɛ tii a ɲą́ą́, kpalo ɓɛla diɛ, di hu yali gee hu pow lee pow.

Vįitɔɔ yələi naakwɛlanmoɔ Yai-Laa ɓa

¹⁹ Yai-Laa woo ka, yɛ mą: 'Li ə́ tɔɔ gbon gɛnɛ̨ ɓa, ɓɛ pələi tii Ɉuda tɔɔɓɛlaa da lɔ la, diɛ kulɔ. Yili pulu, Ɉerusalɛmə taa laa kpulu kpon gəlee ɓa,

²⁰ yɛ́ diɛ: Ka ka wəli tɔɔ Yai-Laa woo ɓa, Ɉuda tɔɔɓɛlaa, da Ɉuda lɔi hu nuą, Ɉerusalɛmə daai nuą, kaai kpɔ ka tɛɛ gbonŋaa ŋɛ̨i laaləi.

²¹ Yai-Laa yɛ: Nu ta hvo tiɛ̨ həɠə a vįitɔɔ yələ, yɛ tɛɛ la Ɉerusalɛmə taa gbonŋaa laaləi,

²² Nu ta hvo nwɔ̨nɔ̨ tiɛ̨ həɠə hvo kulɔ la ɲəi pɛlɛ́n a vįitɔɔ yələ, nu ta hvo kóló lɔpee ta kɛ, kɛlaa, ka vįitɔɔ yələi tii kɛ a hvoló mąąhəɠɛɛ, yɛ bələi ŋį́ ka nąnni tí la.

²³ Ka nanii tii, di hvo di wəli tɔɔ, di di kili walawala, di di wəlii kpɔlɔ, mɛ̨nįi ŋį́ kɛi nɛ diɛ, diɛ di wəli kulɔ ɉu.

²⁴ Yai-Laa yɛ: Káá ŋɛ̨i, ka ka wəli tɔɔ a nɛlɛɛ, ka wala tɛɛ a tiɛ̨ daa ŋɛ̨i gbonŋaa laaləi, ka wala kóló huwui lɔpee da kɛ a mąą yələi, kaa vįitɔɔ yələ mąąhəɠə,

²⁵ ka gɛ tii, daa ŋɛ̨i hu kalanɉonŋaa, da tɔɔɓɛlaa, di kaa pai kɛi heei Davidə nwɔ kpəlin hu; diɛ tɛi wotoloɠaa hu, diɛ hee hooɠaa mɛ̨i, Ɉuda nɔi nuą, Ɉerusalɛmə nuą, da lɛɛ heeni nɔi ŋɛ̨i hu a yələ kəlee.

²⁶ Nąąlɔwai, nuą da həɠə Ɉuda taaɠaa hu, da Ɉerusalɛmə kwɛlɛ taaɠaa, Bɛnɉamɛn nwɔ lɔi hu, ɉɛɠɛɛ pələ nuą, da nuąi heeni ɲeeɠaa hu, da nɛ̨ŋɛ̨ lɔi hu nuą, diɛ pa a haláá taatɛlɛɛɠaa, da haláá hɛn dakpɛliɠaa, da mɛ̨inɛ̨ɛ̨ɠaa, ə mą kɛ, hɛn gun nɛ̨ɛ̨ɠaa, da Yálá mąątɛ̨nɛ̨ haláá Yai-Laa yəi bɛlɛ́n.

²⁷ Kɛlaa, ka wala ka wəli tɔɔ nwóó ɓa, ká hvo vįitɔɔ hvóló mąąhəɠə, kaa tiɛ̨ həɠə, káá tɛɛ la Ɉerusalɛmə gbonŋaa laaləi a vįitɔɔ yələ, ká hvo kpəla li yili ɓa, yili nwɛi, nwɔ̨n mə ŋą́ doo gbonŋaa ŋɛ̨i ɓa, yɛ Ɉerusalɛmə pɛlɛ́ lɛlɛɛɠaa kələn, ɛlɛɛ, nwɔ̨n va luwun.