Ɉeremi 13 - Yálá laawoo hɛɓɛɈeremi da ɉąą yili kɔ́lɔ 1 Mɛ̨nįi Yai-Laa ə dɔ́ɔ́ la, ya ka; yɛ mą́ą́: 'Lí, ə́ hɛan yili kɔ́lɔ ya, yɛ ɓo a nwalawalaa yɛ mąąlən gɔw, ə́ gɛ a ə́ wɔɔ, ə́ dɔɔ ə́ hąą; kɛlaa hvó nɔ yai. 2 Ŋą́ ɉąą yili kɔ́lɔ ya yɛ bələi Yai-Laa ə mo la mą́ą́. Ŋą́ dɔɔ ɉą́ą́. 3 Yai-Laa ə́ pənə nwɔ̨nɔ̨ yɛ mą́ą́: 4 Ɉąą yili kɔ́lɔi tii ə́ ɲa, ə́ dɔɔ ə́ hąąi, ɉəɠə ə́ li la Peratə ɲai, yá həli laa, ə́ ɉąą yili kɔ́lɔ lɔ kwɛni wolo ta hu. 5 Ŋą́ li a ɉąą yili kɔ́lɔi tii, ŋį́ now Peratə, yɛ bələi Yai-Laa ə dí la. 6 Yələ tamąą kulaa ɉu, Yai-Laa yɛ nwɔ̨nɔ̨ mą́ą́: «Pənə ə́ li Peratə ɲai, ɉąą yili kɔ́lɔi tii hiɛ ŋį́ kɛ yɛ́ now laa, ə́ ɉəɠə.» 7 Ŋą́ li kɛa Peratə ɲai, gɛ́ naakwɛli, ɓɛi hiɛ ŋį́ ɉąą yili kɔ́lɔ loo laa, gɛ́ kɛ ŋį́ ɉəɠə. Ɉąą yili kɔ́lɔ tii aa kala kpɔ tɛ̨ɛ̨tɛ̨ɛ̨; hva pɛli kɛa kɛ kɛi a hɛn da. 8 Ya ɓə Yai-Laa a kɛ mą́ą́: 9 «Ɲą́ą́ Yai-Laa nwóó ka; gɛ́ diɛ: Bələ ɓə gáá pai Ɉuda nwɔ kpɔɔ ɲąą kɛnɛ̨i hu kalai la, da Ɉerusalɛmə nwɔ kpɔɔ ɲąą kɛnɛ̨ mɛ̨nį. 10 Yaan, di kaa a nu huwu ɲɔ̨nwɔ̨ɔ̨, di hvo gɛi di hvo di wəli tɔɔ nwóó ɓa. Di kanąn ŋąą lɔ di wɔ wəlii kpɔlɔi ɓa. Diɛ li diɛ kwɛli hvilɛn haliɠaa diɛ; diɛ di mąąwiɛ, diɛ pɛlɛ di lííla. Di kaa pai kɛi yɛ bələi tii ɉąą yili kɔ́lɔi tii kaa la; tɔ̨nɔ̨ lɔpee hva kɛ mą. 11 Bələi lɔ nu a hąą yili kɔ́lɔ tɔɔ la nəŋəi, bələ lɔ ɓə ŋį́ Israɛlə nuą da Ɉuda nuą tɔɔ la ɉą́ą́, əgɛ, di kɛ a nu huwui gaa a ɲą́ą́ nwɔ́ɔ́, a náá tɛ hɛn, a ɲɛ̨́i pɔ̨nɔ̨ hɛn, a mą́ą́ yili hɛn. Kɛlaa, ya ka tii, di hvo hvaa li mą tiikpə kpɛli. 12 «'Lí yɛ́ diɛ: Nwooi Yai-Laa Israɛlə nwɔ Yálái kaa moi ya ka: ‹Ɓálá kəlee kaa a lɔɔ pu hɛn.› Da kɛ yɛ́: ‹Akɛti, ku kili hvo mɔ̨ɔ̨ ɉu, kuɔ kɛ ɓálá kəlee kaa a lɔɔ pu hɛn?› 13 Yá bulu pənə diɛ, yɛ́ diɛ: ‹Yai-Laa yɛ: Nɔi ŋɛ̨i hu nuą kəlee, di wɔɔ tɔɔɓɛlaai di kaa a Davidə huwu, diɛi heeni nwɔ tɔɔkpəlin mɛ̨i, ɉaláá laa həli nuą mąn, da Yálá kwəi mɛ̨nį hukulɔ nuą mąn, da Ɉerusalɛmə nuą kəlee; gáá pai gəlee kɛi yɛ lɔɔ honŋaa. 14 Gáá di nwun nwoloi gee ɓa; lon ɉulɔnu da nąn ŋį́ di wɛi kɛ a gee. Ɲą́ą́ Yai-Laa nwóóli. Və́ pai nui lɔpee ta mąąwɛli kaai, nɛɛmąą hva kulɔ, mąą hvaalɛɛ mɛ̨nį hva kɛ ɉu. Ŋą́ di hu kala.›» Ka wala ka wəli tɔɔ, hvo pai lɛlɛi 15 Ka ka wəli tɔɔ! Ka mɛ̨nį mɛ̨n a nɛlɛɛ. Ka hvo ka wəli nwala-nwala: Yai-Laa ka tii hvaai! 16 Gɛɛ hvitili hvo pu, kpinį hvo pɛlɛ kaa, kaa ka kɔ́wɔ tuwɔ ɲeeɠaa ɓa; kaa kɛɛpono mąą kpɔn, Kɛlaa mąą yɛ pənə a tɛɛhilɛ kpinį, a tulɔ kpinį hu tɛɠiɛ, 'ka Yai-Laa ka wɔ Yálái mąąwiɛ. 17 Ka wala ka wəli tɔɔ niɛwoo ŋɛ̨i ɓa, gáá pai mąąwɛli hee ɓoi honwon ɉu, gbɔwɔ ɲąą kɛnɛ̨ taaləi tii mąą mɛ̨nį ɓaa, gɛ́ wɔlɔ, ɲɛ̨́i ya yɛ laa a yalon. Mąąhɔlɔɓo, Yai-Laa nwɔ kpului kaa lii luwɔlaa hu. Dɔɔ pɛlɛ da Ɉerusalɛmə taa, ɓáá kaa pai kulɔi diɛ 18 'Mó dɔɔmun da dɔɔmun nee diɛ, yɛ diɛ: Ká hee pɔlɔ hu nɔi ɓa! Mąąhɔlɔɓo, ka wɔɔ tɔɔɓɔlɔ ɲɛ̨i tɔɔi, aa kulɔ ka nwuɔ̨ aa too! 19 Daa ɉɛɠɛɛ pələ taaɠaa kəlee gbon naa kpulu, nu ta hvo pai naa ɓoi, daa li a Ɉuda nuą kəlee kpɔ tɛ̨ɛ̨tɛ̨ɛ̨ luwɔlaa hu, dɔ̨nɔ̨ kpɛli hvo lɛɛ li. 20 'Ə́ nwun mu həɠə, ə́ kɛɛ kaa! Ə́ yowoɠaa kaa həɠəi ɲánwuɔ̨ pələ! Daatɛlɛɛ kpului diɛ ə́ mɛ̨i kaa, gaa mįnɛ̨? Yɛ́ ɓɛlaa lɛlɛɛɠaa kaa mį? 21 Ə́ kaa pai kɛi lə! Nuą tii ə́ nɛ̨ɛ̨laa kɛnɛ̨ laa, ka diɛni ka lɔwai, Ɓɛlɔwai, di kaa pai heei la ə́ hu, diɛ hee ə́ mɛ̨i, Yɛ́ mɔ̨nɔ̨ mį́i yɛ kwəi nwąną kɛ Nɛ̨ɛ̨nu, yá kɛ lə? 22 Akɛti, ya ə́ kpɔɔ mąąni kɛ, yɛ kɛ diɛ: «Mɛ̨niɠaa ŋɛ̨i kaa laai mą́ą́ lə mɛ̨nį ɓa?» Ə́ wɔ lii ɲɔ̨n gwəi laa ɓə gɛi, diɛ həɠə tee la yɛ́, di yee tɔɔ ə́ kwąną. 23 Akɛti, nu a pɛli mɔ̨ɔ̨ gɔlɔ mąą hvalin ɉii? Kwɛ́li a pɛli mɔ̨ɔ̨ gɔlɔ mąą hvalin ɉii? Kpaa-o! Ɛlɛɛ, kaa ŋɛ̨i mɛ̨nį ɲɔ̨n aa ɓɔ ka hui, ka pɛli kɛa mɛ̨nį lɛlɛɛ kɛi? 24 Gáá pai ka hu taɠai yɛ dɛɛ kpoloon, yɛ bələi hvaŋą a gɛ la nɔi pun ɉu. 25 Ɉerusalɛmə! Ɉɛn ə́ kaa gwɛlii ya ka tii; yáá kulɔ nwóó mu, ɉɛn yáá ɉee ə́ kpɔɔ tɔwɔ, yaa li. Hvo gaai, ə́ lɛ̨ą mą́ą́, yɛ́ ə́ kpɔɔ ɓowo a lɛɛ hɛn. Ɲą́ą́ Yai-Laa nwóó li. 26 Ɲą́ą́ gbínii, gáá yɛ́ həɠəi tɛi a ə́ nwun, ə́ ɓɛlɛ ə́ too nu kəlee ɲɛ̨i ɓa. 27 Əkə́! Ə́ wɔ wɛli hon mɛ̨nįɠaa, ə́ tomą pələ a wɛli ɲąŋą kulaa, ə́ kpɔɔ tɛɛ mɛ̨nį hinąą pɔ, hvá mąn nwumɛ̨ ɉu, ɲeeɠaa nwuɔ̨, da ɲɛa kɔ́ɔɠaa hu, ŋą́ą́ yili kəlee naa kaa. Ə́kə Ɉerusalɛmə! Nwumɛ̨ aa tɛ yɛ́. Hvó bɔ, hvó ə́ gbɔwɔ mąąhəɠə, hvó hvilɛn búlú! Ə́ kaa pai lɛɛi yili hu ə lɛɛɉu lə yələ? |