Ɉeremi 11 - Yálá laawoo hɛɓɛNɔi nuą daa mįnɛ̨ hukala 1 Nwooi Yai-Laa ə́ mo Ɉeremi ɓa ya ka: 2 Yɛ mą: Ka ka wɛli tɔɔ mįnɛ̨ həɠə wooɠaa diɛ, ka bɔ mɛ̨nį kɛ, mo Ɉuda nuą da Ɉerusalɛmə nuą diɛ, 3 yɛ diɛ: Yai-Laa Israɛlə nwɔ Yálái yɛ: Nui hva nwəli tɔɔ mįnɛ̨i ŋɛ̨i hu woo ɓa, mąą nu nɛ̨ŋɛ̨n naai. 4 Mįnɛ̨i tii ɓaa, yii ŋɛ̨i ŋį́ dɛɛ ka nąnni pɔ, diɛi ŋį́ di kulɔ Eziptə lɔi hu, huluun nwɔ̨n ɉu. Yili ɓa, ka ka wəli tɔɔ nwóó ɓa, kaa bɔ mɛ̨nį kɛ; yili pɔ pələ ɓə ka kɛ la a nwɔ́ nu huwu, ɲą́ą́n gɛ́ ɓo a ka wɔ Yálá. 5 Yili a kɛ kɛa tii, mɛ̨nįi ŋį́ naakwɛlanmo ka nąnni diɛ, gɛ́ kɛ diɛ, gáá lɔi tɛɛi ka pɔ, ɓɛi kwɛin nwulɔ da ɲįnįya gboloon naai laa; ŋį́ pɛli kɛa ŋį́ nwóó tii pɔ mɛ̨nį kɛ. Yili ɓa, háákələi, nɔi kaa a ka wɔɔ. Gɛ́ Yai-Laa ɓa: «Gaa tii Yai-Laa.» 6 Yai-Laa yɛ mą́ą́ nwɔ̨nɔ̨: Nwɛlɛɛ ŋɛ̨i ɓo a lolo Ɉuda daa leeɠaa hu da Ɉerusalɛmə daai, gwəliɠaa pɔ; yɛ diɛ: Ka ka wəli tɔɔ, mįnɛ̨i ŋɛ̨i hu wooɠaa diɛ, ɛlɛɛ, ka di pɔ mɛ̨nį kɛ. 7 Ŋą́ mo kpɔ ka nąnni diɛ kpaan, ə həɠə ɲələi ŋį́ di kulɔ la Eziptə lɔi hu, ə həli la háákələi ɓa, ŋį́ kɛi mo diɛ kpɔ a nwą́nąąi, gɛ́ kɛ diɛ: 'Ka ka wəli tɔɔ nwóó ɓa! 8 Kɛlaa, di hvo gɛ, di hvo di wəli tɔɔ! Di hvo di wəli tɛɛ bɔ́! Nu kəlee ə kanąn gwəi kili ɲɔ̨nwɔ̨ɔ̨ ɓa, di kpowola wala-walaa; ŋį́ di tí a mįnɛ̨i ŋɛ̨i hu woo hon mɛ̨nį, di hvo gɛ li, yili ɓə gɛ, gɛ́ mįnɛ̨i ŋɛ̨i hu wooɠaa pɔ mɛ̨nį nwąnąą laa diɛ. 9 Yai-Laa yɛ nwɔ̨nɔ̨ mą́ą́: Ɉuda nuą da Ɉerusalɛmə nuą daa di kwɛli tee. 10 Daa pənə daa hvilɛn di kalani pɔlɔɠaa kɛ nɛ̨ŋɛ̨nŋaa pulu, a diɛi tii di hvo gɛ, di hvo di wəli tɔɔ nwóó ɓa. Ya ka, diɛ kpɛli mąn daa hvilɛn haliɠaa pulu, diɛ kwɛli hvilɛn diɛ. Ɉuda nɔi nuą-o, Israɛlə lɔi hu nuą-o, mįnɛ̨i ŋɛ̨i kwa diɛni ku ɉəɠə, bələ ɓə daa mąą kala la. 11 Yai-Laa yɛ diɛ: Yii gaa tii, gáá mɛ̨nį ɲąąnwąnąą laai diɛ, yii di hva pɛli di kpɔɔ kulɔi ɉu. Di kaa pai wɔlɔi, diɛ də́li, kɛlaa vá nwə́li tɔɔ di woo ɓa. 12 Nąąlɔwai, ɉaliɠaa tii Ɉuda taaɠaa, da Ɉerusalɛmə taa, di kɛi ɉaláá hɛnŋaa kələn di lííla, di kaa pai lii di pɔ, diɛ di hvɛlii, kɛlaa, yiliɠaa di hvo pai pɛlii di kulɔi mąąwɛli mɛ̨nį tii hu. 13 Ɉuda lɔi! Ə́ wɔ haliɠaa daa tamą lɔ, yɛ bələi ə́ wɔ taaɠaa tamąą la. Ɉerusalɛmə taa yɛ kpɛli, ɉaláá kulɔiɠaai gaa gwəliɠaa lɔwai, damąąi dɛɛ bələɠaa diɛ, ɓɛi da kɛ haláá hɛnŋaa kələn ɉii laa Baalə-Nwumɛ-Hali ɓa. 14 Ɉeremi! Ə́ wɛi, hvó kɛ ə́ kaa nu huwui ŋɛ̨i mąą nɛɛmąą hvəi mą́ą́, hvó kpɛli ə́ woolaa di mąą mɛ̨nį ɓa; hvó vɛ́li di mąą mɛ̨nį ɓa, ɓɛlɔwai mąąwɛli mɛ̨nį kaa pai laai laa diɛ, və́ pai nwə́li tɔɔi di woo ɓa. Yai-Laa kaa haŋąi nwɔ pɛlɛ́i mu nuą diɛ 15 Lə ɓə nííɓa lonnii kaa pai gwɛlii ɲə́i bɛlɛ́n? Gbili pɛlɛ di koo kpala, wee heɛ di nɛn ɲa! Gaa kaa ka kwəi, wooi ka gwɛlɛ mą́ą́, da ɉaláá huwɔɠaa, di kaa pai mɛ̨nį ŋąą nwąnąą həɠəi ka wəli pulu? Gaa ka kwəi bələ ɓə ka pɛli kulɔi la ɲə́i? 16 «Olivə wului ɲąąnɛ̨ɛ̨i, yɛ ɓa a yələ kəlee, nɛlɛɛ ma lɛlɛɛ», bələ ɓə Yai-Laa ə ka laa hee la. Aa nwɔ̨n doo naa hu, dín gɛnɛ̨, yɛ nwonwoɠaa kələn. 17 Yai-Laa Mɛ̨nį Kəlee ŋą Hééɓomun, yaai ka hin, ya ɓə mo, mɛ̨nį nwąnąą ŋɛ̨i yɛ laa kaa; nɛ̨ŋɛ̨nŋaai Israɛlə nwɔ pɛlɛ́i da Ɉuda nwɔ pɛlɛ́i di ɉəɠə mąą mɛ̨nį ɓa; a yaai di niikələn na gwəi, diɛ halááɠaa kulɔ Baalə ɓa. Di kɔ́ pɛlɛ Ɉeremi ɓa 18 Ɓɛlɔwai Yai-Laa, ə́ nwə́li lon doo la ɉu, gɛ́ gbaɠala kaa, nąąlɔwai ɓə ŋį́ di wɔ gbanalaai kaa la. 19 Nwɛ́i, ŋį́ kɛ lɔ di yəi yɛ ɓɛlaa lon, yii hva mąąkɔ̨nwɔ̨, yaai di kaa lííla baa mɛ̨nį ɓa. Gíli hvo kɛ ɉu, gɛ́ kɛ mɛ̨nį ɲɔ̨nwɔ̨ɔ̨ɠaa di kɛi mo, vilɛnŋaa kɛ mą́ą́; yaai di kɛi kɛ la mą: «Ka gu nwulu lɛɛ nwunu kɔ́lɔi, ka gu gulɔ a ɉamu, ka gu gulɔ yɛnɛ̨ɛ̨, əgɛ, nu ta hvo kɛa naa mɛ̨n.» 20 Yai-Laa Mɛ̨nį Kəlee ŋą Hééɓomun, yɛ́i ya mɛ̨nį hutɔɔ a tələnmolaa, yɛ nuą koo kpala mɛ̨nįɠaa da di wɔ kiliŋąhiɛɠaa hu kpɛ; bələi ə́ kaa pai ə́ nwąną kulɔi la diɛ, gɛ tai, ŋį́ nąą kaa! Mąąhɔlɔɓo, yɛ́ ɓə ŋą́ą́ mąą mɛ̨nį lɛɛ ə́ yee kɔ́nma. 21 Yili mąą mɛ̨nį ɓə gɛ, Yai-Laa yɛ kɛ mą́ą́: Anatotə nuą, a diɛi tii ə́ paa pələ kwɛlii, di kaa kɛi yɛ́: Hó mɛ̨nį lɛɛ kwɛa la, hvó ɉukulɔ kuɔ Yai-Laa laa hu, yá gɛ tii, kwa ə́ paa. 22 Yili mąą mɛ̨nį ɓa, Yai-Laa Mɛ̨nį Kəlee ŋą Hééɓomun yɛ diɛ: Gáá pai həli diɛ, di wɔɔ hilɛlɛa diɛ lɛɛ kɔ́ hu, di lonnii hinąą ə mą kɛ, nɛ̨ąą, diɛ haa a pulu. 23 Di ta hvo pai lɛɛi yɛnɛ̨ɛ̨ a vulú, gáá pai mɛ̨nį ɲąąnwąnąą laai Anatotə nuą diɛ; a gwɛlan mąąnɛ̨ɛ̨ di di wɔ nɛnɛnŋaa mąą mɔ̨nɔ̨ mį́i la. |