Ɉeremi 1 - Yálá laawoo hɛɓɛ1 Ɉeremi yai kɛ a Hilkiyahu lon ɉulɔnu, nwoo ka. Ɉeremi nąn Hilkiyahu ə kɛ a ɉaláá laa həli nuąi kɛ heeni Anatotə daai di ta; yii kɛ Bɛnɉamɛn nwɔ lɔi hu. 2 Yai-Laa ə gwəi mɛ̨nį ɓo Ɉeremi ɓa, Amɔn lon Ɉosiasə nwɔ tɔɔlaa gwɛlan bow kɔ́w haaɓa lɔwai, Ɉuda lɔi hu nwun na. 3 Yai-Laa ə da ɓo nwɔ̨nɔ̨ Ɉeremi ɓa a Ɉosiasə lon Yoyakimə Ɉuda tɔɔmun nwɔ yələ, ə lɛɛ kpɔ la ɉu, ə həli la Ɉosiasə lon Sedesiasə Ɉuda tɔɔmun nwɔ tɔɔlaa gwɛlan bow kɔ́w tɔ̨nɔ̨ laa kulɔi lɔwai, ə lɛɛ la ɉu, ɓɛlɔwai də li la a Ɉerusalɛmə nuą nuwɔ laa hu, a ɲąnin nɔɔli naa. Yai-Laa ə mąą pamą Ɉuda lɔi da Ɉerusalɛmə taa diɛ Yálá ə Ɉeremi təli yɛ gɛ a naa woo tɛɛ mun 4 Yai-Laa ə pə́lə́ ɓo mą́ą́, yɛ mą́ą́: 5 «Ɉeremi! Di hvo nii kpɛli kɛ ə́ mąą koo həɠə li ŋį́ ə́ kɔ́lɔn gɛ. Di hvo nii kpɛli kɛ ə́ kaa li, ŋį́ ə́ həɠə ɉu a nwɔ́ɔ́, ə gɛ, ə́ tí mą́ą́; ŋį́ ə́ kɛ a gwə́i mɛ̨nį hukulɔ mun lɔiɠaa diɛ.» 6 Gɛ́ Yai-Laa ɓa: «Kə́! Ną́mu Yai-Laa! Gáá a lokolo, və́ wala kpɔn ɉu mɛ̨nį ɓo.» 7 Kɛlaa, Yai-Laa yɛ mą́ą́: «'Hvó kɛ diɛ: ‹Gáá a lokolo›; mąąhɔlɔɓo, ɓɛi lɔpee ŋį́ ə́ tɔɔlaa, 'lí. Yii lɔpee ŋį́ ə́ tí la, 'mó. 8 'Hvó ɲɔw, gáá ə́ pɔ, gɛ́ ə́ kulɔ mɛ̨nįi. Yai-Laa woo li.» 9 Yili pulu Yai-Laa ə ɲee haŋą, ə ɉee nááləi ɓa, yɛ mą́ą́: «Yiihu, ŋą́ą́ nwóóɠaa pu ə́ la ka tii. 10 Ə́ kili ə kɛ ɉu, yɛ́ kɛ gáá heeɓo laa tɛɛi ə́ pɔ háákələi lɔiɠaa mɛ̨i, da tɔɔɓɛlaa mɛ̨i. Yɛ́ mɛ̨nįɠaa kulɔ a nwun, yɛ́ naa pɛlɛ, yɛ́ di hu kala, yɛ́ di ɓuwɔ. Yɛ́ da tɔɔ, yɛ́ da hi.» Mɛ̨nį tɔlɔɔ yii di nɛ Ɉeremi ɓa da mɛ̨nįi ə gaa 11 Yai-Laa ə mo mą́ą́, yɛ mą́ą́: «Lə ɓə tii ə́ kaa gaai?» Gɛ́ mą: «Kwii tɛɠan nwulu kpaɠa ɓə gáá gaai!» 12 Yai-Laa yɛ mą́ą́: «Yáá gaa a nɛlɛɛ! Mąąhɔlɔɓo, Gáá kɛa pai nwóó pɔ mɛ̨nį kɛi.» 13 Yai-Laa ə pənə nwɔ̨nɔ̨ yɛ mą́ą́: «Lə ɓə nwɔ̨nɔ̨ ə́ kaa gaai tii?» Gɛ́ mą: «Ɉɛn gáá gaai, ya ɓaa kwɛliləɠi, yɛ nɛn, naa tumon ŋąą ɲələi pələ.» 14 Yai-Laa ə mɛ̨nįi tii hukulɔ mą́ą́, yɛ mą́ą́: «Ɲanwuɔ̨ pələ ɓə mɛ̨nį ɲąąnwąnąą kaa pai həɠəi la yɛ pa laai nɔi lonnii kəlee diɛ. 15 Gáá pai ɲanwuɔ̨ pələ tɔɔɓɛlaa kəlee təlii, di kaa pai, nu kəlee kaa pai nwɔ tɔɔkpəlin hvilɛn ɉii Ɉerusalɛmə taa bələ nwun na; daa mąąkpɛ hįį tənən ma, da Ɉuda taaɠaa kəlee tənən ma. Ɲą́ą́ Yai-Laa, Nwóó li. 16 «Mɛ̨nįɠaai ŋį́ mąą kili tee gwə́i di wɔ túwɔ́ pələ ɲɔ̨nŋąą mąą mɛ̨nį ɓa; gáá gəlee hukulɔi diɛ; ya baa: Daa ɓo mą́ą́, daa dóó, diɛ haláá kulɔ haliɠaa diɛ; a hɛnŋaai di bɛli a di yee, diɛ pɛlɛ di lííla. 17 Kɛlaa, ə́ wɛi, 'ə́ hąą yili, 'ə́i muhəgə, mɛ̨nįi lɔpee ŋį́ ə́ tí la mo diɛ. 'Hvó nɛɛ laa di hvo ə́ mąą ɲɔw, di hvó hee ə́ mɛ̨i; ya gɛ tii, ɲą́ą́ ɓə pai ə́ hu pui yɛ́ di ɲɛ̨i ɓa. 18 Nwɛ́i, gáá ə́ kɛi háákələi a taa walawala, a kwɛli hɔlɔɔn, ŋį́ ə́ kɛ a hįį yii dɔɔ a ɓala kwɛli, yɛ́ tɔɔ la nɔi nuą kəlee la, Ɉuda tɔɔɓɛlaa, da nwɔ ɲɛ̨itɔwɔ nuą, da nwɔ haláá laa həli nuą kəlee, da ɉu lonnii kəlee. 19 Di kaa pai kɔ́ pɛlɛi yɛ́, kɛlaa di yee hvo pai pɛlii yɛ́. Mąąhɔlɔɓo, gáá ə́ pulu, gɛ́ ə́ nwun mąąkɔ̨nwɔ̨. Yai-Laa woo li.» |