Izikiɛ 14 - Yálá laawoo hɛɓɛ

Mąąnɛ̨ɛ̨ Israɛlə ə ɲee kulɔ hali kɔ́ mɛ̨nį hu

¹ Israɛlə pɛlɛ́ nąmįną taɠaa di pa bɔ́ di hee nííla.

² Nąąlɔwai Yai-Laa ə mɛ̨nį ɓo mą́ą́, yɛ mą́ą́:

³ Hulɔnu lon, nuąi ɲɛ̨́i daa di wɔ haliɠaai lɔ di nį́į́ pɔ, ɉɛn pai di tooi nɛ̨ŋɛ̨n ɉu daa di yee kąnąn mą. A kɛ ti ŋą́ pɛli mɔ̨ɔ̨ di lɛɛi laa diɛ di nwun dɔɔ a ɲą́ą́?

⁴ 'Mo diɛ, yɛ́ diɛ: Hééɓo kəlee Nąmu woo ka, yɛ: Israɛlə mun lɔpee a nwɔ halii laa nii pɔ, ɉɛn pai doo nɛ̨ŋɛ̨n ɉu, yɛ ɲee kąnąn mą, yili pulu, yɛ pa gwə́i mɛ̨nį hu kulɔmun bɔ, ɲą́ą́ ɓə ŋą́ mąą nu woo pulu pənə; a pa, pələi lɔ nwɔ haliɠaai da kɛ la a di tamąą, bələ lɔ ɓə ŋį́ nwoo pulu pənə la.

⁵ Gɛ́ pɛli nɛ̨́ɛ̨́i gwɛlii Israɛlə lonnii hu; a diɛi ti daa di mąą kwɛa mą́ą́, di wɔ haliɠaai mąą mɛ̨nį ɓa.

⁶ Yili mąą mɛ̨nį ɓa, 'mo Israɛlə nwɔ pɛlɛ́i ɓa, yɛ́ mą: Hééɓo kəlee Nąmu Yálá woo ka, yɛ: 'Ká pənə ka pa, ka ka pulu tɔɔ ka wɔ haliɠaai diɛ; ka həɠə kɛa ka wɔ ɓowo mɛ̨nįɠaai ti kəlee pulu.

⁷ Nui lɔpee yɛ ə kɛ a Israɛlə nwɔ pɛlɛ́i mu mun da, yɛ ə kɛ a nwɛą yii gaa heeni Israɛlə lɔi hu, a mąą kwɛa mą́ą́, ə hali mɛ̨nį hee nį́į́ hu, ɉɛn pai dooi nɛ̨ŋɛ̨n ɉu ə ɲee kąnąn mą; yili a tɔɔ yɛ pa gwə́i mɛ̨nį hu kulɔmun mąąni kɛi, ɲą́ą́ Yai-Laa, ɲą́ą́ gbinįi ɓə ŋį́ nwoo pulu pənə.

⁸ Ŋą́ hee mąą nu hu, yɛ kɛ a nui da mɛ̨nį kɔ́ɔn mą, ɛlɛɛ ŋį́ gulɔ nwɔ́ nu huwui lɔwai; ka gili kɔ́lɔn kaa kɛ diɛ, ɲą́ą́ ɓə gáá a Yai-Laa.

⁹ Yálá kwəi mɛ̨nį hu kulɔmun lɔpee da mowo yɛ mɛ̨nį ta ɓo, a kɛ ti ɲą́ą́ ɓə mąą nu ɓowo; ŋį́ hee ɉu, ɛlɛɛ ŋį́ gulɔ nwɔ́ nu huwui Israɛlə lɔwai.

¹⁰ Di wɔ nɛ̨ŋɛ̨nŋąąi wulu a lɛɛ di nwuɔ̨; nui a pa kɛɛmąąni kɛi, nwɔɔ nɛ̨ŋɛ̨n a kɛ lɔ yɛ pələi nu gaa Yálá kwəi mɛ̨nį hu kulɔi nwɔɔ nɛ̨ŋɛ̨n a kɛ la.

¹¹ Bələ ɓə Israɛlə pɛlɛ́ hva kɛa lan na, yɛ mąą kwɛa mą́ą́; hva kɛa nɛ̨ŋɛ̨n ɉəɠə a nwɔ kulɔ nwoo mu mɛ̨nįɠaa, yɛ pɛli kɛi la a nwɔ́ nu huwu, ɲą́ą́n gɛ́ kɛ a nwɔ Yálá. Mɛ̨nį kəlee ŋą Hééɓomun Yálá woo li.

Hɛn da hvo pai Yálá nwɔ kitii həɠəi mą

¹² Yai-Laa ə mɛ̨nį ta ɓo mą́ą́, yɛ mą́ą́:

¹³ Hulɔnu lon, lɔi ta kɛ laa; a nɛ̨ŋɛ̨n ɉəɠə mą́ą́ a náá pu pələ; ŋį́ hee ɉu, gɔ̨nɔ̨n gaa ɉeei a ɲee pulu, gɛ́ gəlee hu kala, gɛ́ pulu too mą; ə kɛ a nu, ə kɛ a huwɔ, gɛ́ di paa ɉu.

¹⁴ Ə mą kɛ, nu haaɓai ɲɛ̨́i a Noe, Daniɛlə, da Ɉobə, da kɛ kɛ nɔi ti hu, diɛ lɔ ɓə li pɛli di kpɔwɔ nwun mąąɓoi a di wɔ tələnmolaa. Mɛ̨nį kəlee ŋą Hééɓomun Yálá woo li.

¹⁵ Ɛlɛɛ, ŋą́ lɔwɔ huwɔ ɲɔ̨nwɔ̨ɔ̨ɠaa ɲąątɔɔ nɔi ti ɓa, di nɛɛ a lɔi pun, ɉu lon da hva lɛɛ laa; nu ta hva pɛli tɛɛi laa ɉuwɔɠaai ti mąą mɛ̨nį ɓa.

¹⁶ Akɛ hu haaɓai ti di mą kɛli kɛ nɔi ti hu, Mɛ̨nį kəlee ŋą Hééɓomun Yálá woo li; ə kɛ a hulɔnon, yɛ ə kɛ a nɛ̨ɛ̨nnon, di hva pɛli dɔ̨nɔ̨ kpɛli ɓalo; kɛlaa diɛ tɔ̨nɔ̨ lɔ ɓə da ɓalo; nɔi ə lɛɛ a lɔi pun.

¹⁷ A wala kɛ ti, ŋą́ pa a kɔ́ kɔ́ nɔi ti hu; gɛ́ kɛ diɛ: Ə kɛ a nu, ə kɛ a huwɔ; kɔ́ kɔ́ ɓɔwa ə tɛɛ, ə gəlee paa.

¹⁸ Nu haaɓai ti da kɛ nɔi ti hu; a tɛ̨ąą, Mɛ̨nį kəlee ŋą Hééɓomun Yálá woo li; yɛ ə kɛ a hulɔnon, yɛ ə kɛ a nɛ̨ɛ̨nnon, da hva pɛli ɓaloi; ə kulɔ lɔ nu haaɓai ti ɓə da ɓalo.

¹⁹ A wala kɛ ti, ŋą́ ɲɔ̨n bɛlɛ́ nɔi ti ɓa; gɛ́ nííholi bɔ, gɛ́ di paa; nu kanŋaa da huwɔɠaa diɛ kpɛɛ ɉu.

²⁰ Ə mą kɛ, Noe, Daniɛlə, da Ɉobə di kaa nɔi ti hu; a tɛ̨ą, Yai-Laa woo li; di hva pɛli hulɔnon maloi, ə mą kɛ, nɛ̨ɛ̨nnon mə. Ə kulɔ lɔ nu haaɓai ti ɓə da ɓalo di wɔ tələnmolaa haa lai.

²¹ Mąąhɔlɔɓo, mɛ̨nįi Yai-Laa kaa moi ya ka: «Ə mą kɛ, ŋą́ą́ hutɔɔ hɛnŋąą nąąn dɛɠɛ Ɉerusalɛmə ɓa, diɛ ɓaa a, kɔ-kɔ-ɓɔwa, pulu, lɔwɔ huwɔ kpəɠiɛɠaa, da ɲɔ̨n, diɛ nu kanŋaa da taatɛlɛɛɠaa paa laa,

²² ə mą kɛ ti, nu kpəli wolo a lɛɛ. Diɛ hilɛlɛa da nɛ̨ɛ̨lɛa kulɔ daai; diɛ ka ɲɛ̨i pai ka pɔ. Ka káá pai di tuwɔ pələ kaai, da di kɛ mɛ̨nįɠaa; yili kaa pai ka lii laai mɔnɔ̨ɠaai laa Ɉerusalɛmə ɓa, ɉu, da mɛ̨nįɠaai kpɔ ŋą́ą́ gɛ diɛ həli mą.

²³ Di kaa pai ka lii laai; mąąhɔlɔɓo ka káá pai di tuwɔ pələ kaai, kaa gɔlɔn kaa mɛ̨nįɠaai kpɔ ŋį́ naa daai ɲɛ̨́i ɓa nwun gaa mą. Mɛ̨nį kəlee ŋą Hééɓomun Yálá woo li.»

« Roimhe

Air adhart »

Bible Society in Guinea-Conakry

Lean sinn:

Ceanglaichean taic

Sanasan