Ikilisiati 3 - Yálá laawoo hɛɓɛ

Mɛ̨nį kəlee nwɔ yələ kaa mą

¹ Mɛ̨nį kəlee nwɔ yələ kaa mą, yələ kəlee nwɔ mɛ̨nį yɛ ɓo mą ɓɛ lɔi mɛ̨i.

² Nu kaai yələ kaa mą, nu haa yələ yɛ ɓo mą. Hihɛn ɉin ɲələ kaa mą, gulɔi yələ yɛ ɓo mą.

³ Paa ɓo kɛ yələ kaa mą, pala hali kɛ yələ yɛ ɓo mą. Pɛlɛ́ woloi yələ kaa mą, pɛlɛ tɔɔi yələ yɛ ɓo mą.

⁴ Nu wɔlɔ yələ kaa mą, nu yɛlɛ yələ yɛ ɓo mą. Woolaa kɛi yələ kaa mą, mąnąkaa yələ yɛ ɓo mą.

⁵ Nu da nɛ̨ą di laai lɔwai kaa mą, di ɓɛlaɓoi yələ yɛ ɓo mą. Nu nɛ̨nɛ̨ɓo yələ kaa mą, yələ ta a həli, ə́ lənə nu nɛ̨nɛ̨ɓoɔ ɓa.

⁶ Hɛn gwɛli yələ kaa mą, ɉɛn tii lan ɲələ yɛ ɓo mą. Hɛn naaikɛ yələ kaa mą, bili yələ yɛ ɓo mą.

⁷ Hɛn ɉu ɓɛla yələ kaa mą, ɉɔlɔn ɲələ yɛ ɓo mą. Nu laapilɛ yələ kaa mą, nu hvaa yələ yɛ ɓo mą.

⁸ Wɛlikɛmąą kɛ yələ kaa mą, wɛlikpɛɛmąą kulɔ yələ yɛ ɓo mą. Kɔ kɔ́ yələ kaa mą, liilaa yələ yɛ ɓo mą.

⁹ Tɔlɔ lə kɛɛ kpɔ ɓə kóló kɛmun a ɉɔlɔɓo nwɔ mɔ̨nɔ̨ mįi hu?

¹⁰ Kólói Yálá ə naa nu lonnii nwuɔ̨, ŋą́ą́ mąąkpɛɛ.

¹¹ Yálá ə mɛ̨nį kəlee lɛlɛ ə bɛli nwɔ yələ ɓa. Mɛ̨nįɠaai Yálá ə gɛ, di lɛlɛɛi lɔ a di wɔ yələ. Ɛlɛɛ, Yálá ə Yálá-taa kili too nu hu. Kɛlaa, ə mą kɛ tii, nu hva pɛli Yálá kɛ mɛ̨nįɠaa kɔ́lɔn ɉi, ə həɠə kpɔ gɔwɔ tɔɔi yələ ɓa, ə həli la naa kulɔi ɓa.

¹² Ŋą́ą́ gɔlɔn, gɛ́ diɛ: Tɔlɔ takpɛli hvo nu lonnii yəi, hvo kɛli lɔ di di ɲąąnɛ̨ɛ̨ kulɔ di kɛ kóló dɔlɔ hu; di wɔɔ yɛnɛ̨ɛ̨ hu.

¹³ Nu a kɔ̨nɔ̨n ɉɔlɔɓo yɛ mįi, yɛ gbələ, yɛ ɲąąnɛ̨ɛ̨ kulɔ gɛ kóló hu, yili kaa a Yálá yəi mɛ̨inɛ̨ɛ̨.

¹⁴ Ŋą́ą́ gɔlɔn gɛ́ diɛ: Yálá kɛ mɛ̨nįɠaa da lamun yɛnɛ̨ɛ̨ wɔ-da-wɔ. Nu hva pɛli da pɛlɛi mą, a wala kɛ tii, da kulɔi mą. Ɛlɛɛ, Yálá ə yili kɛ tii, əgɛ, di nwɔ Heeɓolaa kɔ́lɔn.

¹⁵ Mɛ̨nįi kɛi yiihu, da yii pai kɛi, yiliɠaa daa gbɛa wɔlɔ kɛ. Mɛ̨nįɠaai daa tɛɛ, Yálá a hvaa mą ə pənə yɛ kɛ.

Nɔ̨ɔ̨-nɔ̨ɔ̨ hɛn gəlee ŋąąkpɛɛi ɓa a haa

¹⁶ Mɛ̨nįi ŋą́ą́ gaa ɓɛ lɔi mɛ̨i, ya ka, ya ɓaa: Ɓɛi Mąąnɛ̨ɛ̨ tələnmolaa da mɛ̨nį haŋąą di hee laa, nąą ɓə nwąnąlɔ a tɔɔlaa kɛ laa.

¹⁷ Yili ɓə gɛ, gɛ́ gbɔ́wɔ́ ɓa: Yálá kaa pai nu haŋąą da nwąnąlɔmun di kiti teei. Mąąhɔlɔɓo, mɛ̨nį kəlee da nwɔ yələ ɓə, ɛlɛɛ, Yálá kaa pai nu kɛ mɛ̨nįɠaa kəlee kiti teei.

¹⁸ Yii hvilɛn na nu lonnii mąą mɛ̨nį ɓa, ŋą́ mo gwə́i pələ, gɛ́ mą: Yálá kaa nu lonnii hukɔɔn ɉi, əgɛ, ə nɛ diɛ, yɛ diɛ: Di hvo hviɛlaɓo li di hvo tɛɛ huwɔɠaa diɛ.

¹⁹ Mąąhɔlɔɓo, bələi lɔ nu ɲąą a kpɛɛ la, bələ lɔ ɓə huwɔɠaa ɲąą a kpɛɛ la. Nɔ̨ɔ̨ tanɔ̨n nu hu, ya lɔ ɓə gaa huwɔ hu; gəlee hveelɛi da haa. Yili ɓa, nu hvo hviɛlaɓo li hvo tɛɛ huwɔ ɓa, mąąhɔlɔɓo, gəlee ŋąąkpɛɛi kaa a kpɛli-kpɛli mɛ̨nį.

²⁰ Nɔ̨ɔ̨-nɔ̨ɔ̨ hɛnŋaa kəlee ŋąąkpɛɛ pələ kaa tanɔ̨n. Nɔ̨ɔ̨-nɔ̨ɔ̨ hɛn gəlee da pənə di pu pɔlɔ hu ɓɛi di həɠə laa.

²¹ Nu ta hvo gɔlɔn, akɛ nu lonnii nɔ̨ɔ̨ a kulɔ di hu a tɛ yələi pələ, ɛlɛɛ, huwɔɠaa di wɛi yɛ yɛɛ lɔi mu pələ.

²² Yili ɓa, yii ŋą́ gaa ya ka: Yii lɔ nɛlɛɛ nu lonnii diɛ, ya ɓaa: Di di ɲąąnɛ̨ɛ̨ kulɔ di kɛ kóló hu. Yii lɔ mąąnɛ̨ɛ̨ ə gwəinɛ̨ɛ̨ ɉu, yaa lɔ li. Mąąhɔlɔɓo, mɛ̨nįi pai tɛɛi nu haa pulu, hva lɛɛ heeni hvo gaa!