Hanwon 21 - Yálá laawoo hɛɓɛ1 Tɔɔmun gili kaa yɛ tɛɛyá Yai-Laa yee ŋą, a dənən dɔɔ ɓɛi lɔpee a kɛ bɔ. 2 Nu a ɉiɛ pələ kəlee kaa a ɉaŋąą gbɔwɔ ɲɛ̨i ɓa, Kɛlaa, Yai-Laa ɓə a nuą lii hu kaa. 3 Tələnmolaa da tɛ̨ą mɛ̨nį kɛɛ, hviɛlaɓoɔ ɓə Yai-Laa ɲɛ̨i ɓa haláá kulaa ɓa. 4 Ɲɛitɛmun, huɲąɲą kɛnɛ̨mun, nwąnąlɔ nuą da di wɔ mąąwiɛ, gəlee kaa a nɛ̨ŋɛ̨n. 5 Nu walaa a koló kɛ a gili, a dɔ̨nɔ̨ hɔlɔɓo, Kɛlaa, nui a nii mąą kpɛlin, a too kanąn ɉu. 6 Hɛn gɔw kɛnɛ̨ hɔlɔɓoɔ a nu ɓowo wooɠaa, gaa a nuąi haa kwɛlii di ɓowo hɛn. 7 Nwąnąlɔ nuą di wɔ wea mɛ̨nį a di nwun na pili, mąąhɔlɔɓo, mɛ̨nį haŋąą kɛɛ wɛli hvo diɛ. 8 Lɔi kalamun ɉiɛ pələ kpəlaan ŋąąi, Kɛlaa, kwəi kwələmun gɛ mɛ̨nįɠaa haŋąą lɔ. 9 Nu kɛɛ pɛlɛ́ hvaŋąn mu, ə́ ɓo hoŋon ma, yili hviɛlaɓoɔ dɛɛ ka hvaa kɛ nɛ̨ɛ̨nu ka kɛɛ pɛlɛ́ tɔ̨nɔ̨ mu ɓa. 10 Nwąnąlɔmun gwəi kili kəlee hvilɛn ŋąą lɔ mɛ̨nį ɲɔ̨n ma, ə mą kɛ mɛlanmun mə, hva mąą hvaalɛɛ. 11 Nui gili hva li kwɛa la, a yɛlɛ mąąkɛmun ɉu tɔɔi kaa, a kili hɔlɔɓo. Ɛlɛɛ, gaa pai kɛi a kili nąmu, ɓɛlɔwai da kɛi kilimąą mun niɛwoo kɛ la. 12 Tələnmomun a nwąnąlɔ nuą di wɔ pɛ́lɛ́i mąą kpɛɛ, yɛ di pili mɛ̨nį ɲąąnwąnąą hu. 13 Nui a nwəli laa kpulu mąąwɛlimun domą woo tɔwɔ, gaa pai təliɓo kɛi yaa kpɛli, di hva nwoo mu hon. 14 Mɛ̨inɛ̨ɛ̨ nu a gɛ loo pələi, a líiholi kɔ́lɔ haa mą, yá nɔgwəi hɛn nɔ yuɓo hu, a líiholi kɛnɛ̨ ɲąą yɛɛ. 15 Mɛ̨nį kɛɛ a tɛ̨ą kaa a tələnmomun gwəinɛ̨ɛ̨ mɛ̨nį, Kɛlaa, a nwąnąlɔmun mąą ɲɔw. 16 Nui a həɠə kili pələ mɛ̨i, gaa pai lii vįitɔɔi haa nuą lɔwai. 17 Nui pə́lə́ wɛli kaa mą, a lɛɛ a yeehvowolomun, nui lɔɔ wɛli kaa mą da kɔ̨nɔ̨n gɛnɛ̨, hvo pai kɛi a hɛn nąmu. 18 Tələnmomun nwun mąą a ɓo a nwąnąlɔmun, kwəi kwələ nuą nwun mąą a ɓo a woo kala nuą. 19 Nu kɛɛ heeni lɔi pun ɉu, viɛlaɓoɔi, ka hvaa kɛ nɛ̨ɛ̨nu ka kɛɛ yɛnɛ̨ɛ̨ hu ɓa, yai mɛ̨nį ta hva gwəinɛ̨ɛ̨. 20 Hɛn gɔwi yɛnɛ̨ɛ̨, da yɛnɛ̨ɛ̨ ɲąąnɛ̨ɛ̨, di kaa a kilimąą mun nwɔɔ, kilikpɛɛgwəi mun a gəlee hu kala. 21 Nui a hvilɛn tələnmolaa pulu da kulɔ nwoo ɓalaa, a yɛnɛ̨ɛ̨, tələnmoaa, da mąąwiɛ hɔlɔɓo. 22 Kilimąą mun a pɛli taa hon ɉii, yii da mąąkpɛɛ kpɔ a nwalawalaa, yɛ taa mąąkpɛ hįi nuą kilitɔɔ mą, yɛ bu. 23 Nui ɲee a pɛli naaləi da nɛn diɛ, a gbɔwɔ mąąkɔ̨nwɔ̨ liihɛlɛn dɔwɔ. 24 Nui ɲɛ̨i tɛɛ, dɛɠɛɓo ɉuɔ, naa ɓaa: yɛlɛ kulɔɉumun. A pələ ɓo kpɔwɔ ŋąą kɛnɛ̨ laa hu. 25 Mɛ̨nįɠaa hviɲɛnun a ɲɛ̨i kulɔ bo diɛ ɓə pai baai, mąąhɔlɔɓo ɲeeɠaa di hvo koló kɛ. 26 A kɛ lɔ ɲɛ̨i kulɔi hɛnŋąą pɔ a yələ kəlee. Tələnmomun a kɔ́ɓo kɛ hva bulu kaa. 27 Nwąnąlɔ nuą di wɔ haláá wɛli kpɛɛi Yai-Laa ɓa kpɔ tɛ-tɛ, mąąhɔlɔɓo, da gulɔ a líiɲɔ̨nwɔ̨ɔ̨. 28 Lɛɛ kɛla hvaa ɓomun nwun a lɛɛ ɉu, Kɛlaa nui a nwəli tɔɔ, a pɛli pələ ɓoi a yələ kəlee. 29 Nwąnąlɔmun ɲɛ̨i kaa gamąn, nui ɉaŋąą, a dúwɔ́ pələ mąą kpala a nwala-walaa. 30 Kili mɛ̨nį ta hvo laa, da nwun gɛ ɉu ta, ə mą kɛ nwun dɔɔ ta yii ɲee a pɛli tɛɛi Yai-Laa ɓa. 31 Nu ya pɛli ə́ ə́ hąą yili kpąąn yɛ́ li kɔ́ ɓa, Kɛlaa, Yai-Laa ɓə yee tɛɛ mąą kaa ɲəi. |