Hanwon 20 - Yálá laawoo hɛɓɛ

¹ Lɔɔ a nu kɛ a yɛlɛkulɔɉumun, lɔɔ kpəɠiɛ yɛ hvaa too. Nui a gbɔwɔ lɛɛ a lɔɔ ŋą hon, hva pɛli kɛi a kilimąą mun.

² Tɔɔmun nwɔ liikələn gwəi kaa yɛ yala a kɛi kpəɠi. Nui a tɔɔmu níiholi, a kɔ́ pɛlɛ gbɔwɔ nwɔ yɛnɛ̨ɛ̨ ɓa.

³ Nui a ɲee kulɔ hvaa mɛ̨nį hu, ɲɛ̨i a pɔ̨nɔ̨. Kɛlaa, kilikpɛɛgwəi nuą líiholi laa nɛ̨ɛ̨i.

⁴ Hviɲɛ̨mun a ɲɔw kwɛlɛ ɓa, hva kɛɛ hvala, mɔ̨nun dee yələ, yɛ mɔ̨nun gwɛli, hva ɉɔlɔɓo.

⁵ Liɛwoo kaa nu lii hu yɛ palə, kilimąą mun mə nwɛlɛɛ ɲái tii haɠa.

⁶ Nu tamąą da di kpɔwɔ kɛ a nu lɛlɛɛ, Kɛlaa, gbɛɛ ɓə tələnmomun gɔlɔn?

⁷ Tələnmomun a nwɔ yɛnɛ̨ɛ̨ kɛ a ɉaŋąą, nonnii da lɛɛ bulu, di kaa a nwun na nɛ̨ɛ̨ nuą.

⁸ Tɔɔmun a kɛ heeni nwɔ kiti tee kpəlin hu, a mɛ̨nį ɲɔ̨n gəlee kulɔ ɉu kɛ a ɲɛ̨ikɔw.

⁹ Gbɛɛ ɓə a pɛli kɛi diɛ: «Ŋą́ą́ nii hu mąąhəɠə, nɛ̨ŋɛ̨n və mą́ą́?»

¹⁰ Hɛnŋąą kɔ́ɔn ɉɛn gɛɛ gee pulu hveelɛ, yili wɛli hvo Yai-Laa ɓa.

¹¹ Lokolo túwɔ́ pələ a nɛ, akɛ gaa pai kɛi a nu lɛlɛɛ, ɉaŋąą.

¹² Wəlii a mɛ̨nį mɛ̨n, ɲɛ̨ikɔw a kɛɛ kaa, Yai-Laa ɓə gəlee hveelɛi pɛli.

¹³ 'Hvó yíi wɛli la kɛ, əgɛ, hvó pa kɛ a yeehvowolomun, 'humo ə́ ə́ ɲįnąą ɓo ə́ kɛ koló ɓa, ya yili kɛ tii, ya kɔ̨nɔ̨n ɉɔlɔɓo.

¹⁴ Lɔ́wɔ tiɛ̨ yamun a kɛ diɛ: ɲɔ̨nwɔ̨ɔ̨i, ɲɔ̨nwɔ̨ɔ̨i, a kɛli mąą kwɛa nąą ɓa, yɛ gbɔwɔ mąątɛ̨nɛ̨.

¹⁵ Hɛni da Kúwɔ́-kwɛniɠaa di laa tooɔi, Kɛlaa, yii ɓaa kili pələ ɓoɔ, yili hɔlɔɓo laa walaai.

¹⁶ 'Ka nwɔ həɠəi kulɔ mą, mąąhɔlɔɓo, ə gbɔwɔ kɛ a nwɛ̨ą nwɔ kwələ-nąn. 'Ka dolaa hon ɲəi, mąąhɔlɔɓo, nui hvo gɔlɔn, ə nwoo kwɛlɛ bulu.

¹⁷ Nwuɔ̨ kɔ̨nɔ̨n nɛ̨ɛ̨i a gɔwɔ tɔɔ yələ, Kɛlaa, yili pulu nu ya nɔ kɛa ə́ la, gaa a kwɛni wɛan.

¹⁸ Ə́ kɛ kolóɠaa mąą kiliŋąlaa kɛ kpɔ a nɛlɛɛ, ə́ kaa pai kɛa lɛɛi ə́ kpɔwɔ ɓa, ɛlɛɛ, ə́ ə́ wɔ kɔ́i kɔ́ a ə́ kili.

¹⁹ Nui a loo mɛ̨nįɠaa hukulɔ, nu pulu kulɔmun ni, nui a howon a mɔlɔ, ka yaa ka hvo hiɛ gee pululaa kɛ.

²⁰ Nui a nąn da nee di nɛ̨ŋɛ̨n naa, nwɔ nwɔ̨n kaa pai luwun ɉii kwii hąą ton-ton.

²¹ Hɛn nu a ɉɔlɔɓo a gwɛlin a hvulu, lúwɔ́ hva kɛ mą nąą pulu.

²² 'Hvó kɛ diɛ: «Mɛ̨ni ɲɔ̨n di naa mą́ą́, gáá gwələ kulɔi.» Ə́ kilitɔɔ lɔ Yai-Laa ɓa, gaa pai ə́ ɓaloi.

²³ Hɛn gɔwɔn ɉɛnɲąɲąi gɛɛ hveelɛ, nwɛli hvo Yai-Laa ɓa, hɛn gɔwɔn ɉɛn a kɛ a galaa, hvo lɛlɛ li.

²⁴ Yai-Laa ɓə a nu hiɛ pələ tənən dɔɔ, Kɛlaa haa mun ni pələ kɔ́lɔn bələ kɛ ləi?

²⁵ Nui a kɛ diɛ: «Gáá nwóó kwɛlɛi Yálá ɓa.» Hva ɉu kpɛɛ, aa hɛlɛn dɛ gbɔwɔ tɔwɔ, gaa yɛ nui a gbɛa nwoo kwɛlɛ, yɛ təɠa giliŋąhiɛ.

²⁶ Kilimąą tɔɔmun a nwąnąlɔ nuą hu taɠa di kee ɓa, yili pulu, ə di hutɔɔ ɉa.

²⁷ Nu nɔ̨ɔ̨ kaa a Yai-Laa nwɔ wulɔ nwɔ̨n, a nu kɔ́wɠaa kəlee hu kaa.

²⁸ Kulɔ nwoo ɓa laa da tələnmolaa da di ɲɛ̨i kɛ tɔɔmun ma, nwɔ tɔɔlaai a lamun, tələnmolaa haalai.

²⁹ Hilɛlɛa mąą hon ɉɛn mąą kpakololaa, hulɔgoloɠaa di wɛi ɓaa, di nwun ɓɔwa.

³⁰ Nu haɠa pɔɔ kaa a mɛ̨nį ɲɔ̨n ɉali, kɛlɛ ɓo ə ɓo lɔ tii, nu kwəi mɛ̨nįɠaa diɛ.