Habakukə 1 - Yálá laawoo hɛɓɛ

¹ Mɛ̨nį Yálá ə ɓo gwəi mɛ̨nį hu kulɔ mun Habakukə ɓa hį́i pələ, yɛ mo a lolo ya ka:

Habakukə da Yálá di lono woo Habakukə nwɔ woo laawoo dɔlɔɔ: Mɛ̨nį haŋąą aa həɠə bələ ɓa, Yálá kpɔmąą tɛɛ ku pɔ

² Yái-Laa! Gáá pai lɛɛi ə́ təlii, ə lɛɛ ɉu, mįnɛ̨ lɔwai, Yɛ́ pa kpɔmąą tɛɛi ku pɔ, yáán, hvə ə́ wəli tɔɔi nwóó ɓa? Gáá tomąi nwąnąlɔ mɛ̨nįɠaa mɛ̨i a ə́ laa, hvo ku kulɔi ɉu?

³ Lə mɛ̨nį ɓa, mɛ̨nį kpəlaan ŋąą ɓə ə́ kaa gaai? Ɛlɛɛ, yɛ́ hvaa mą, yɛ́ mɛ̨nį ɲɔ̨n gɛ nuą kɛi kaa? Ŋą́ ɲɛ̨́i hee gwɛ́lɛ, nwąnąlɔ da mɛ̨nį ɲɔ̨n nɔ ɓə ŋą́ gaa; hvaa kɛɛ, da kiti mɛ̨nį lɔ ɓə gaa kɛɛnąą kəlee.

⁴ Nuą di hva tɔ́n mąąwiɛ, nuą di hva kiti tee a ɉaŋąą. Nwąnąlɔɔ nuą ɓə da tɛ̨ą hɔlɔɓo nu haŋąąɠaa mɛ̨i; kiti tee a hvulu.

Yálá yɛ Babilonə kaa pai heei Israɛlə mɛ̨i

⁵ Yálá yɛ mą: Ka ka ɲɛ̨i hee hį́i takpɛliɠaa diɛ, ka di kaa. Ka kwəi a pili kaa, ka laa ə kpala kaa; Ka káá lɛɛi a ka hvulú, ŋį́ mɛ̨nį ta kɛ ka lɔwai, gaa pai kɛi a mɛ̨nįi, da ɉukulɔ kaa, ka hva pɛli laai na.

⁶ Kalde nuą nwąnąlɔɔ tii, ɲɛ̨imąąwɛli kaa hvo di hui, gáá pai moi diɛ, di pa. Di kaa lɔi mɛ̨i diɛ tɛɛ, da di ɓɛlaa di wɔ lɔi kaa, di ɉəɠə di yəi.

⁷ Di ɲɛ̨i mąą ɲɔwuɔi, di hvaŋą kɛnɛ̨. Di wɔ huɲąŋą kɛnɛ̨ laa hu, di wɔ tɔ́n mąą a di wɔ huwalawala.

⁸ Di wɔ hvooɠaai gilɛ həɠə yee tɛɛi kwɛliɠaa diɛ. Di hukələn-gələn ɲee tɛɛi kwɛli nwɔ yələwulii kɔ̨nɔ̨n gwɛlii lɔwai ɓa. Da kulɔ kwɛaa la, di wɔ hvoo mɛ̨i nuą da laŋin, diɛ koon yɛ kuwɔ a gɔ̨nɔ̨n gaa, yɛ li ɉon ɉi.

⁹ Di kaa pai too mɛ̨i kɛ mɛ̨nį ɓa; di ɲɛ̨i kpanwoɔi lɔ di tɔwɔ, diɛ pa yɛ tulɔ hvaŋą. Da luwɔɠaai kpɔn gee ɓa yɛ ɲɛ̨ą kɔ́w.

¹⁰ Di ɲɛ̨i tɛɠɛ ɓoɔi tɔɔɓɛlaa hu, diɛ yɛlɛ kulɔ ɲąąwooɓo kɛ nuą hu. Da taa mąąkpɛ híí taɠa, di bɔlɔ kpɔn gee ɓa, di ɉəɠə.

¹¹ Di wɔ kiliŋąhiɛ mąą a hvalən. Diɛ li pələ takpɛli a kɛɛ kalaa. Di hvaŋą ɓə ɓaa a di wɔ Yálá.

Habakukə ə nwoo tɛ nwɔ̨nɔ̨ Yálá ɓa

¹² Yai-Laa ə həɠə kpɔ yɛnɛ̨ɛ̨ pɛli yələ ɓa, ə həli la yiihu ɓa, kɛlaa yɛ́ lɔ ɓə a nwɔ́ Yálá? Nwɔ Yálá mąąhəɠɛɛ, yili ɓa ku hvo pai haai! Yai-Laa, yɛ́ ɓə a ku mą́ą́kpɛ kwɛni. Yɛ́ ɓə nuą tii həɠə ɉu, ə́ di kɛ a ku hutɔɔ hvaɠa, di ə́ nwąną kulɔ kuɔ.

¹³ Kɛlaa, ə́ wɔ Yálá ɲɛ̨ikɔw hva pɛli mɛ̨nį ɲɔ̨n gɛi kaai, hvá pɛli hvaai mą, hvo kɛ a mɛ̨nį ɲɔ̨n gɛi kaa mun. Akɛtii, lə mɛ̨nį ɓa, ə́ ɲɛ̨i kaa nu ɲɔ̨nŋąą ŋɛ̨i diɛ, hvó da ɓoi? Lə mɛ̨nį ɓa, ə́ ə́ laa pilɛ, nuąi di haŋąą, diɛ mɔ̨nɔ̨ mįi nwąnąlɔ nuą yəi?

¹⁴ Lə mɛ̨nį ɓa, yá nuą kaa yɛ hɔ̨nwɔ̨leeɠaa, yɛ tala huwɔɠaai nu hvo di yəi, yɛ di tənən dɔɔ?

¹⁵ Babilonə nuą da nuą hon, yɛ nu a hɔ̨nwɔ̨lee kulɔ a kwɛli. Da too di yəi ɲa tuluun dumɔ̨ hu, di kwəi a nɛ̨ɛ̨ kpɔ kɛnɛ̨;

¹⁶ Da kɛ haláá kulɔi di wɔ ya tuluun dumɔ̨ɠaai diɛ, diɛ lansan kələn diɛ. Mąąhɔlɔɓo, ɲa tuluun dumɔ̨ɠaa tii haalai ɓə da kɔ̨nɔ̨n ɉɔlɔɓo la, a kɔ̨nɔ̨n gɛnɛ̨, nɛ̨ɛ̨.

¹⁷ Akɛtii, di hvo kɛa pai di wɔ ɓɔwaɠaai lɔi daai, di kaa pai kɛi hį́i taakpɛliɠaa nwun deei lɔ ɲɛ̨imąąwɛli hvo ɉu?