Galatə 5 - Yálá laawoo hɛɓɛ'Nui ká lɛɛ ká gbɔwɔ yee kɔnma, ká kanąn mą 1 Gu lɛɛ mɛ̨nį gu kpɔwɔ yee kɔnma mɛ̨nį ɓə, Kristə ə gu nwun mąąɓo la. 'Ká tɔɔ kani a ká nwąnąi, ká hvo ká kpɔwɔ lɛɛ laa, di hvo ká too luwɔlaa ŋą kpɔnɔ̨ nįnɛ̨ ɲą. 2 Ɲą́ą́ Polə, gáá moi káá, akɛ ka nɛɛlaa da ká hee kɛ́nɛ̨ ɓa, a kɛ ti, Kristə mąą mɛ̨nį aa lɛɛ a kpɛli. 3 Gáá pənəi ŋį́ mo nwɔ̨nɔ̨ káá, gɛ́ káá, nui a gbɔwɔ lɔ kɛ́nɛ̨ mɛ̨nį hu; mąąnɛ̨ɛ̨ mąą nu ə dɔ́n gəlee pɔ yíiɓo. 4 Káái ka káá bɔ ká kɛ, a tələnmo nuą Yálá ɲɛ̨i ɓa, dɔ́n ɉáálai, a kɛ ti ka Kristə ni kaa ka ɓɛla ɓo, ká wɔɔ nąą hvo Yálá nwɔ mɛ̨inɛ̨ɛ̨ hu. 5 Yii ɓaa ku wɛi, Nįį-Mąąhəɠɛɛ háálai, laa na laa hu, ku kaa ku tələnmo mɛ̨nį mąąkpɔn ɉii la, yai a ku mąąhəɠə mɛ̨nį, ku kilitɔɔmą. 6 Gbala ə tɔɔ, nui gaa Jesus Kristə hu, yɛ ə kɛ a kɛ́nɛ̨-lon, yɛ ə kɛ a kɛ́nɛ̨-kpolaa, yili hvo neelee, kɛlaa, yii a neelee, ya ɓaa: laa na laai bɔ túwɔ́ kaa mą. 7 'Ká gɔwɔ tɔɔ kani a nɛlɛɛ-ee, gbɛɛ ɓə bələ too ká tɔwɔ, yɛ kpɛ̨ąn ká tɔwɔ tɛ̨ą woo pɔ mɛ̨nį kɛɛ hu? 8 Mɛ̨nį yili hvə həɠə li, nui ká təli, bɔ. 9 «Lɛɠɛ dɛ hɛn nogolo a pɛli ə lɛɠɛ kpɔlɔ kɛnɛ̨ tɛ!» 10 Nwɛ́i, gílitɔɔ gu Ną́mu ɓa, ká mąą mɛ̨nį hu; ká hvo pai ɉon ɉii a pələ takpɛli. Kɛlaa, nui tii ká nwun ɉu kɛi vuwú-vuwú, gaa pai vɛla hɔlɔɓoi, a pələ lɔpee. 11 Yii ɓaa nwɛ́i, ną́n nonnii, akɛ kɛ́nɛ̨ mɛ̨nį ɓə nii gáá mąą kalan gɛi, nɛlɛ ŋą mɔ̨nɔ̨ ɓə kani gáá mįi? Yili a kɛ tii, Kristə ŋą kolowai hvo a nu kɔwɔ túwɔ kwɛnį! 12 Akɛ yili kaa tii, nuąi ká nwun ɉu kɛi vuwú-vuwú, di hvo kpɛla lɔ di kpɔwɔ kɛ́nɛ̨ kɛɛ ɓa, kɛlaa di gəlee tee laa kpɔ tɛ̨ɛ̨tɛ̨ɛ̨?. Kɔlɔ da Nįį 13 Ka wɛi, ną́n nonnii, ká lɛɛ mɛ̨nį ka kpɔwɔ yee kɔnma mɛ̨nį ɓə, Kristə ə ka təli la, kɛlaa, ká hvo nɛɛ gbɔwɔ yee kɔnma laai ti kaa yɛ, mɛ̨nį ká laa ɉu, káá kɔ́lɔ liiɓa kɛ. Kɛlaa wɛlikɛmąą laa hu, 'ká kɛ a ká keeni di wɔɔ tínuą 14 Gbala ə tɔɔ, dɔ́n nwoo laa kulaa kaa lɔ a woo tɔ̨nɔ̨ gbən; ya ɓaa: Ə́ ə́ ɓɛlan gaalon nwɛlilakɛ yɛ ə́ kpinį. 15 Kɛlaa, akɛ, kɛi ká keeni ɲin, káá ká keeni huwɔ hu hvala-hvala, 'ká gɛ a nɛlɛɛ, ká hvo pa ká keeni mąą mɛ̨nį pili ɉu. 16 'Ká ká wəli tɔɔ nwóó ɓa: 'Ká hiɛ Nįį-Mąąhəɠɛɛ yee kɔnma, akɛtii, ká hva kɛa lɛɛ nu kiliŋąhiɛ woo mu. 17 Gbala ə tɔɔ, kɔlɔ a tɔɔ Nįį la, Nįį yɛ tɔɔ kɔlɔ la, kɔ heɛi di lɔwai, yili ɓa, 'ká hvo mɛ̨nį ta kɛ lɔ a ká liiɓa. 18 Kɛlɛɛ akɛ ká ká kpɔwɔ lɛɛ Nįį yee kɔnma, ká hvo kɛa dɔ́n ɲee mu. 19 Kɔlɔ liiɓa mɛ̨nįɠaa di wɛi, gu di kɔlɔn, diɛ ɓaa: Wɛli kɛɛ, mąąliɓi túwɔ́ ɓoɔ, túwɔ́ pələ ɲɔ̨n gulaa, 20 hali kɔ mɛ̨nį, kááhɛn ɉəɠɛɛ, yowolaa, woo taɠa mąą, tolo, liikələ gwəi, wɛa túwɔ́, ɓɛlaɓolaa da kpɔn daɠa mɛ̨nį, 21 hɛn nwɛlilaa, lɔɔ kpələ kpɔn, yɛlɛkulɔ ɉu da yiiɠaa kpɔ da diɛni da li di kee pɔ, ɛlɛɛ, mɛ̨nįɠaa tii kɛ nuą; gáá kpɔ nąą kili tooi ká ɲą, yɛ bələi ŋį́ mo la káá, dɔ̨nɔ̨ kpɛli hvo pai nwɔɔ nąą hɔlɔɓoi Yálá ŋą tɔɔlaai hu. 22 Kɛlaa, Nįį-Mąąhəɠɛɛ yee pɔ mɛ̨nį ɓaa a: Wɛlikɛmąąlaa, kwəinɛ̨ɛ̨, liilaa, liikpələ, túwɔ́ pələ lɛlɛ, kilikɛɲəi mɛ̨nį, laa na laa, 23 lii nɛ̨ɛ̨ gwəilaa, nu yee pɛliɛɛ gbɔwɔ ɓa, mɛ̨nįɠaai ti nwɛi, tɔ́n və tɔɔ li da ɓa. 24 Nuąi a Kristə nwɛiɠaa, daa kɔlɔ da ɲee pɔ mɛ̨nįɠaa da niiɓa mɛ̨nįɠaa kəlee kpanwo kolɔwa ɓa. 25 Akɛ gu kaa yɛnɛ̨ɛ̨ kɛi Nįį-Mąąhəɠɛɛ yee kɔnma, 'ká gu nɛɛ laa, ə gu tənən dɔɔ. Kristə ŋą tɔn 26 Mąą hvo nɛ̨ɛ̨li 'gu hvo gu kpɔwɔ ɲąąkɛnɛ̨, gu hvo gu liiŋąnwąną gu kee pɔ, gu hvo gu keeni ɲɛ̨ikɔw kpɔlu. |