Lɛɛ gbɔwɔ ɓa 18 - Yálá laawoo hɛɓɛɈetro ə pa mɔlɔ́ Moisə nąą kaai 1 Mɛ̨nįɠaa kpɔ Yálá ə gɛ Moisə da Israɛlə nuą diɛ, Madian haláá laa həli mun Ɉetro yai kɛ a Moisə mɔlɔ́, ə bələ mɛ̨n, diɛ mą: Yai-Laa aa Israɛlə nuą kulɔ Eziptə lɔi hu! 2 Moisə kɛɛ lii, ə pənə ə nɛ̨ą Sipora tɛɛ mɔlɔ́ Ɉetro pɔ, yili ə ɲee hee mu; 3 da Moisə lonnii hveelɛ. Dɔ̨nɔ̨ laa ɓaa: Gɛrsɔmə. Mąąhɔlɔɓo, Moisə ə kɛ diɛ: «Ŋą́ą́ mą́ą́kilɛ nwɛ̨ą lɔi hu.» 4 Veelɛnąą laa ɓaa: Eliezɛrə. Mąąhɔlɔɓo, Moisə ə kɛ diɛ: «Ną́n nwɔ Yálá ɓə mą́ą́ kpɔnmąą ɓo, yɛ gulɔ Eziptə lɔi hu tɔɔmun nwɔ kɔ́ kɔ́ ɓɔwa yəi.» 5 Moisə mɔlɔ́ Ɉetro ə Moisə lonnii həɠə ə bɛlɛɛ Moisə nɛ̨ą ɓa, diɛ li Moisə pɔ nɔi pun ɉu; ɓɛi di muwu pɛlɛ laa, Yálá nwɔ yeei ɓa. 6 Ɉetro ə wɛlɛɛ tɔɔ, diɛ li moi Moisə ɓa, diɛ kɛ mą: «Ə́ ɓɔlɔ́ Ɉetro kaa pai a ə́ nɛ̨ą da ə́ lonnii hveelɛi.» 7 Moisə ə li ə mɔlɔ́ laakwiɛn, ə nɛ̨nɛ̨ɓo, ə mąą yɛɛ gɔwɔ mu; di di kee túwɔ́ɓo, di di kee yiikpɛli ɓo, di lɔ gələ mu. 8 Mɛ̨nįɠaai kpɔ Yai-Laa ə gɛ a Eziptə tɔɔmun da nwɔ nuąi diɛ, Israɛlə nuą mąą mɛ̨nį ɓa, Moisə ə gəlee hukulɔ mɔlɔ́ ɓa. Mɔ̨nɔ̨ɠaai laa diɛ bələ pɔ, da bələi Yai-Laa ə di kulɔ la ɉu, ə gəlee hukulɔ. 9 Mɛ̨inɛ̨ɛ̨ kpɔ Yai-Laa ə gɛ Israɛlə nuą diɛ, yɛ di kulɔ Eziptə luwɔlaa hu, Ɉetro kwəi ə nɛ̨ɛ̨, mąą mɛ̨nį ɓa. 10 Ɉetro yɛ kɛ mą: «Mąąwiɛ ə kɛ Yai-Laa ɓa, yai ka kulɔ Eziptə tɔɔmun da nwɔ nuąi di yəi, ə ka huwu kəlee kulɔ Eziptə nuą yəi! 11 Ŋą́ą́ laa na kɛa, gɛ́ diɛ: Yai-Laa kɛnɛ̨i dɛɛ haliɠaa kəlee diɛ, ə nwɔ kɛnɛ̨ laa lɛ Eziptə nuąi kɛi Israɛlə nuą mɔ̨nɔ̨ ɓo diɛ.» 12 Moisə mɔlɔ́ Ɉetro ə haláá kulɔ Yálá ɓa a haláái da gəlee kələn, da haláá takpɛliɠaa. Aarɔn da Israɛlə kalanɉonŋąą kəlee di pa da Moisə mɔlɔ́ Ɉetro ni di ɉaláá kɔ̨nɔ̨n mįi. Moisə ə kiti tee nuą hee 13 Yələɓɔɔ, Moisə ə hee yɛ nuą lɔwai mɛ̨nįɠaa ɓo, nuą di lɛɛ tɔɔni nííla, ə həɠə yələwala pɔ ɓa, ə lɛɛ ɉu, yələ ə wulu. 14 Gólói Moisə ə kɛi gɛ nuą diɛ, mɔlɔ́ ə nąą kaa, yɛ mą: «Lə ɓə ŋɛ̨i ə́ ə́ kpɔɠɔ tooi ɉu nuą ŋɛ̨i mąą mɛ̨nį ɓai? Lə mɛ̨nį ɓa yɛ́ tɔ̨nɔ̨ ə́ kaa gólói ŋɛ̨i kɛi, yɛ́ nuą kpaan diɛ lɛɛ la tɔɔni ə́ lííla, ə lɛɛ ɉu, yələ yɛ wulu?» 15 Moisə yɛ mɔlɔ́ ɓa: «Yálá mąąni gɛ mɛ̨nį ɓə nuą ŋɛ̨i da paa la bɔ́. 16 Mɛ̨nį ta a həli diɛ, da pa bɔ́, gɛ́ di lɔwai mɛ̨nį ɓo, ɛlɛɛ, gɛ́ Yálá lííɓa mɛ̨nį da nwɔ tɔ́n nwooɠaa lɛ diɛ.» 17 Moisə mɔlɔ́ yɛ mą: «Bələi ŋɛ̨i ə́ kaa gɛi la, gɛ pələ lɛlɛɛ hvə li. 18 Ə́ hvii kaa pai kpɛɛi, ə mą kɛ nuą ŋɛ̨i ə́ pɔi. Góló kɛnɛ̨i dɛɛ yɛ́, yɛ́ tɔ̨nɔ̨ hva pɛli mu. 19 Ə́ wəli tɔɔ nwóó ɓa, gáá gɛ pələ lɛi yɛ́, ɛlɛɛ, Yálá ə tɔɔ ə́ pulu! Kɛ́ lɔ Yálá da nuą ŋɛ̨i di lɔwai, yɛ́ ɓə mąąnɛ̨ɛ̨ yɛ́ di mąą mɛ̨nįɠaa laa həli Yálá ɓa. 20 Yɛ́ di kalan a Dɔ́n nwooɠaa da díɓoɠaa, yɛ́ di hiɛ pələ lɛ diɛ, da di túwɔ́ pələ. 21 Ɛlɛɛ, ə́ ɲɛ̨i laa nuą lɔwai, ə́ nu ɓɛlɛmąąɠaa həɠə, diɛ ɲɔw Yálá ɓa; nuą diɛ pɛli laai di la, di hvo kɛ a nɔ gwəi hɛn ɉon nuą, ə́ di hee nuą nwun na. Ə́ daɠaa hee nu waa tɛitɛi nwun na, ə́ daɠaa hee nunwun dɛitɛi nwun na, ə́ daɠaa hee nu pow lɔɔli lɔɔli nwun na, ɛlɛɛ, ə́ daɠaa hee nu pow pow nwun na. 22 Diɛ ɓə pai kɛi nuą kiti teei a yələ kəlee. Yii a kɛ a mɛ̨nį walawala, di paa la ə́ lííla. Kɛlaa, mɛ̨nį pɛlɛɛ pɛlɛɛɠaa di wɛi, nuą tii ɓə da yili ɲɛ̨i kulɔ diɛ kpinįi. Gɛ tii, ə gɛ, diɲɛ ta ə kulɔ mą ə́ yəi, ka diɛni ka kpɔnmą. 23 Ya yili kɛ tii, Yálá kaa pai kɛi gwəi mɛ̨nįɠaa hukulɔi yɛ́, ə́ yee kaa pai pɛlii góló ɓa, yili pulu, nuą da pɛli di li di pulu liilaa hu.» 24 Moisə ə nwəli tɔɔ mɔlɔ́ woo ɓa, mɛ̨nįɠaai yili ə mo mą, ə gəlee kɛ. 25 Moisə ə nuą həɠə Israɛlə lonnii kəlee lɔwai a nu ɓɛlɛmąąɠaa, ə di hee nuą nwun na, nu waa tɛitɛi nwun na, nu nwun dɛitɛi nwun na, nu pow lɔɔli lɔɔli nwun na, da nu pow pow nwun na. 26 Di wɔɔ kólói ɓaa diɛ nuą lɔwai mɛ̨nį ɓo; mɛ̨nį ɓo a walawala, di paa la Moisə pɔ. Yii hvo walawala li, diɛ mo diɛ kpinįi. 27 Moisə ə yələwala too mɔlɔ́ ɓa, yili yɛ li bɔ lɔi. |