Lɛɛ gbɔwɔ ɓa 1 - Yálá laawoo hɛɓɛ

Yálá ə Israɛl kulɔ Eziptə lɔi hu Israɛlə lonnii di kɛ luwɔlaa hu Eziptə

¹ Israɛlə lonnii pa Eziptə, di laa ka; diɛi lɛɛ di nąn Ɉakɔbə pɔ diɛ pa, gəlee da di yəi bɛlɛ́n nuą:

² Rubɛn, Simeɔn, Levi da Ɉuda;

³ Isakarə, Zabulɔn da Bɛnɉamɛn;

⁴ Dan, Nɛftali, Gadə da Asɛrə.

⁵ Ɉakɔbə lonnii pɛlɛɛ di wɔɔ lonnii diɛ, di kɛ a nu pow mɛ̨ihveelɛ. Yii ɓaa, Ɉosɛfə nwɛi ə gbɛa kɛ Eziptə.

⁶ Ɉu kwɛa kɛa, Ɉosɛfə da nąn nonnii di haa, da di muhəɠəyɔwɔɠaa kəlee.

⁷ Israɛlə lonnii di ɓuɠuɓo, di yee ə walawala, di nɔi kəlee yee kulɔ.

⁸ Nąąlɔwai, tɔɔmun nįnɛ̨ ta ə hee Eziptə nwun na, yii hvo kɛ Ɉosɛfə kɔ́lɔn.

⁹ Dɔɔmun tii yɛ nwɔ nuą diɛ: «Ka káá gaai, Israɛlə nuą kpulu aa kɛnɛ̨, di yee aa walawala aa tɛɛ guɔ.

¹⁰ Ka gu kpaalə ta kwɛli, gu tɛɛ la, di kpulu ta hvo kɛa pɛlɛ mą, ə gɛ, kɔ́ a tee, di hvo pa too gu yowoɠaa pɔ, di hvo kɔ́ pɛlɛ guɔ, di hvo kulɔ ɓɛ nɔi.»

¹¹ Eziptə nuą di nɛɛmą di pɔlɔtɛ nwun nąmįnąą hee Israɛlə lonnii nwun na, əgɛ diɛ kóló walawalaɠaa laa diɛ. Bələ ɓə di tɛɛ la, Israɛlə nuą diɛ Pitomə taa da Ramsɛsə tɔɔ, ɓɛi tɔɔmun gɔ̨nɔ̨n a həɠə laa.

¹² Kɛlaa, bələi lɔ di kɛi di laanɔ̨nwɔ̨ ɓo la, bələ lɔ ɓə di kpulu hu ə kɛi kɛnɛ̨ la, diɛ tamą, bələ lɔ ɓə di wɛli ə kɛi kpɛɛ la Eziptə nuą diɛ.

¹³ Eziptə nuą di Israɛlə lonnii hon gbɔ a nwąnąlɔ pələ.

¹⁴ Di yii kpəlin di la, a kóló walawalaɠaai di kɛi naa diɛ; diɛ ləɠi-pɔlɔ kulɔ diɛ gɛ a pɔlɔkɔw, diɛ ɓə kɛi di yəi ɲɛa kɛ, diɛ kóló huwu lɔpee laa di mɛ̨i a nwąnąlɔ pələ.

Tɔɔmun ə ɓɛlɛ kpɛɛ Israɛlə lonnii ɓa

¹⁵ Hvɛlɛlee kɛ nɛ̨ąą hveelɛ ɓə kɛ Hebreu nɛ̨ąą nwun na, diɛ ɓaa kɛ a: Sifra da Pua. Tɔɔmun yɛ diɛ:

¹⁶ «Ka lɛɛ Hebreu nɛ̨ąą tii ta kwɛlɛ, yɛ kwəinwąną kɛ, non a kɛ a hulɔnu, 'ka baa. Akɛ a nɛ̨ɛ̨nu, 'ka nɛɛ a vulú.»

¹⁷ Kɛlaa, vɛlɛɛlee kɛ nɛ̨ąą tii, di ɲɔw Yálá ɓa, di hvo gɛ, di hvo lɛɛ dɔɔmun nwoo ɲą. Di hvo kɛi ɉinąą paa.

¹⁸ Tɔɔmun ə di təli, yɛ diɛ: «Lə mɛ̨nį ɓa, ka kɛ ɉinąą lɛɛi a di hvulú?»

¹⁹ Vɛlɛlee kɛ nɛ̨ąą diɛ mą: «Hebreu nɛ̨ąą di hvo yɛ Eziptə nɛ̨ąą, di hu walawalaai, da gbɛa di laayɛɛ, gɛɛ vɛlɛlee kɛ nɛ̨ą hvo pa.»

²⁰ Yálá ə vɛlɛlee kɛ nɛ̨ąą tii mąąɲįnɛ̨n gɛ diɛ. Bələ ɓə Israɛlə lonnii kpulu hu ə kɛi kɛnɛ̨ la, di yee yɛ walawala.

²¹ Ɲɔwi vɛlɛlee kɛ nɛ̨ąą di mo Yálá ɓa, ya ɓə gɛ, Yálá yɛ di yəi bɛlɛ́n nuą kwəi nwun.

²² Tɔɔmun yɛ nwɔ lɔi hu nuą kəlee diɛ: «Hebreuɠaa da lon ɉinąą hɔlɔɓo, 'ka Nilə kɔ́ la, a kɛ a nɛ̨ɛ̨nu, 'ka nɛɛ a vulú.»