Ɛstɛrə 3 - Yálá laawoo hɛɓɛ

Hvaa ə too Mardose da Haman di lɔwai

¹ Mɛ̨nįɠaa tii tɛɛ pulu, tɔɔmun Asuerusə ə tɔɔi kɛnɛ̨ tɛɛ Hamedata lon ɉulɔnu Haman pɔ yai a Agagə huwuta. Tɔɔmun ə Haman hee ɲɛ̨itɔwɔ nuą ŋɛ̨i kɛ gwɛlɛ di nwun na.

² Nuą kpɔ kɛi tɔɔmun nwɔ pɛ́lɛ́i mąąkpɛ, da Haman kaa kɛ, gəlee da kwɛli hvilɛn mą. Mąąhɔlɔɓo, pələ ɓə tɔɔmun ə mo la, Haman mąą mɛ̨nį hu. Kɛlaa, Mardose hvo kɛi gɛ, hvo gbəlin vilɛn, hvo kwɛli hvilɛn Haman ɓa.

³ Nuą ŋɛ̨i kɛi dɔɔ pɛlɛ́ mąąkpɛ, diɛ Mardose ɓa: lə mɛ̨nį ɓa ə́ kaa tɔɔmun nwoo teei ŋą?

⁴ Yii kɛa di kɛi mo mą a hvolo kəlee, hvo kɛi di woo hon, di di woo hu kulɔ Haman ɓa; ə gɛ, di gaa akɛ gaa pai lɛɛi ɲee yili ɓa. Mąąhɔlɔɓo, Mardose ə kɛi kɛ di gaa a Ɉuifə.

⁵ Haman yaan ə gaa, Mardose hvo kɛi gbəlin vilɛn, hvo kwɛli hvilɛn ma, Haman lii ə kələn gbɔ gwəi kɛnɛ̨.

⁶ Kɛlaa, Haman hvo kɛ bɔ hvo Mardose yaa tɔ̨nɔ̨ baa. Yii kɛa di kɛ mą: Ɉuifə ɓaa Mardose, Haman ə kɛ bɔ ə Mardose huwu kəlee paa ə gbɛɛ, ɓɛi kpɔ di kɛ laa Asuerusə nwɔ tɔɔlaai hu.

⁷ Ɲąnįn dɔlɔɔ ŋɛ̨i da kɛ mą Hebreu woo hu Nisan, tɔɔmun Asuerusə nwɔ tɔɔlaa gwɛlan bow kɔ́w hveelɛ lɔwai, Haman ə nwoo tɛɛ kɛɛnąą kəlee, ə gɛ, di hvolo tɛi tɛi kəlee mąą tɔlu kpɛ ɲąnįn dɛi tɛi kəlee yee mu, dɔli ə too ɲąnįn ŋɛ̨i da kɛ mą Hebreu woo hu Adarə mɛ̨i. Ə gɛ, voló yii bɛliɛi nwɔ mɛ̨nįi tii kɛ hvolo ɓa, di nɛ mą.

Haman ə Ɉuifəɠaa paa mɛ̨nį kili tee gwəi

⁸ Haman yɛ tɔɔmun Asuerusə ɓa: «Nwɔ́ tɔɔmun! Nu huwu ta kaa ɓɛ ə́ wɔ lɔi ŋɛ̨i hu, di taɠa taɠaai nɔi nąą kəlee, di kpɔɔ tɔ́nŋąą ɓə di yəi, di hvo ə́ wɛi pulu; di hva ə́ wɛi hon. Mąą hvo nɛ̨ɛ̨li di hvo kɛ ɓɛ, yili dɔ̨nɔ̨ hvo mą yɛ́.

⁹ Akɛ yá hvaa mą, 'mo, ə́ bɛ̨ɛ̨ a hɛɓɛ́, di di kəlee di paa. Yá yili kɛ tii, ŋį́, wali kwələ waa pow tɛɛ ɲɛ̨itɔwɔ nuą pɔ di bu tɔɔmun nwɔ hɛn gɔw kəhii hu.»

¹⁰ Tɔɔmun ə ɲee ɓa gbono kulɔ ə dɛɛ Hamedata lon Haman pɔ, yai a Agagə huwuta, yaa ŋɛ̨i a Ɉuifəɠaa di yowoi, yɛ mą:

¹¹ «Ə́ wɔ walii lɛɛ ə́ yəi, yii ɓaa nu huwui tii, yii yɛ́ ə gɛ a diɛ, 'gɛ.»

¹² Ɲąnįn nwɔ hvolo pow kɔ́w haaɓa yələ, di ɉɛɓɛ́ kɛ nuą təli, di pa. Pələi kpɔ Haman ə di tí la, di ɉɛɓɛ́ kɛ tii di dɛɛ ɲɛ̨itɔwɔ nuą diɛ, gbahanamaɠaa kɛ goɓitaaɠaa hu diɛ, da hį́i tɛi tɛi kəlee nwɔ nwun nąmu. Di ɉɛɓɛ́i tii pɛ̨ɛ̨ a hį́i woo tamąą, gəlee da nwɔ hɛɓɛ́ kɔ́w. Di tɔɔmun gɔlɔn ɉɛn kɛ mą a nwɔ yee ɓa gbonoi pɔɔ.

¹³ Di nɛɛ mą di ɉɛɓɛ́ɠaa tii tɛɛ nɔi nąą kəlee; ə gɛ, di Ɉuifəɠaa kəlee paa, di di yəi hɛnŋąą kala a hvolo tɔ̨nɔ̨, ə həɠə nu kpɛa kpɛaa diɛ ə həli la non gaa nįnɛ̨ɠaa diɛ, a ɲąnįn ŋɛ̨i da kɛ mą Hebreu woo Adarə, nwɔ hvolo pow kɔ́w haaɓa yələ; ə gɛ, nɔi nuą di too Ɉuifəɠaa yəi hɛnŋąą hu.

¹⁴ Ɉɛɓɛ́ɠaa tii kəlee mąą hvilɛnŋąą kɛ a tɔɔmun ɲee pɔɔ, ə gɛ, di kwəi mɛ̨nį hukulɔ mun goɓitaaɠaa kəlee hu, nu kəlee kili ə kɛ ɉu, di di kɛ pələ pɛli a volói tii.

¹⁵ Ɉɛɓɛ́ɠaa tii də li kpɔ a mąąhulaa yɛ bələi tɔɔmun ə mo la. Di kwəi mɛ̨nį hukulɔ mun Susə daa lee hu. Nąąlɔwai tɔɔmun da Haman di kɛ heeni diɛ di kpələ, daa nuą kəlee di wəli tɔɔ ɉɛɓɛ́ hu woo ɓa, di kwəi piliɛ diɛ.