Ɛstɛrə 1 - Yálá laawoo hɛɓɛ

Asuerusə nwɔ kwəinɛ̨ɛ̨ hɛli

¹ Mɛ̨nįi ŋɛ̨i ə kɛ ɓɛlɔwai Asuerusə ə kɛ la a tɔɔmun. Asuerusə ə kɛi tɔɔlaa kɛ koɓi taa nwundɔ̨nɔ̨ ɲeehveelɛ kɔ́w mɛ̨ihveelɛ mɛ̨i, ə həɠə Ɛndə lɔi ɓa, ə həli Nubi lɔi ɓa.

² Nąąlɔwai tii hu, tɔɔmun Asuerusə ə hee nwɔ tɔɔ kpəlin hu Susə daai, yai kɛ a dɔɔ hee taa.

³ Asuerusə nwɔ tɔɔlaa gwɛlan ɉaaɓa lɔwai, ə ɲeemu nuą da di wɔ káláɉonŋąą kəlee təli; ə di ɓɛlɛhee, ə Pɛrsə da Medi kɔ́kuláá nwun nąmįną təli, da nɔi nwun nąmįną, ɛlɛɛ, gbahanąmąɠaai kɛ goɓitaa nwun na.

⁴ Ə nɛ̨ɛ̨ mą, ə nwɔ tɔɔlaai hu hɛn gɔw da ɉɛn nɛlɛɛɠaai gaa laa, ə nɛ diɛ, nwɔ kɛnɛ̨ laa mąąwiɛ lɛ mɛ̨nį ɓa. Di gwəinɛ̨ɛ̨i tii kulɔ hvóló nwundɔ̨nɔ̨, hvóló pow mɛ̨ihaaɓa yee mu.

⁵ Gwəinɛ̨ɛ̨ tii kpɛɛ lɔwai, tɔɔmun ə nu kəlee ɓɛlɛ hee; mąą nu ə kɛ a hɛn gɔw nąmu, ə kɛ a yee hvowolo mun, diɛi kɛ Susə daai nąą kəlee. Di di wɔ ɓɛlɛ hee kɛ lɔ́wɔ́ tɔ̨nɔ̨ yee mu, tɔɔmun ɲəi gwəlii.

⁶ Di hɛ́ayeekali kɛ a yɛli, di wali gbonoɠaa hɛlɛn mą, di həɠə ɓɛla kpɔluɔ mu tɛɠiɛ da gwɛlɛɛ hɛlɛn mą, ɉɛnŋąą tii hɛlɛn ŋąą kɛ kwɛni tɛɠi haɠaa tɔɔɠaa lɔwai. Di hɛni gbono da wali gbono kpɛa kpɛaa hɛlɛn di lɔwai, di ka wulu pɛlɛ nɔi ɓa, daɠaa kwɛlɛɛ, daɠaa tɛɠiɛ, gbɔluɔ, gwɛlɛɛ mu yɛ lən.

⁷ Kpələkɔɔ huwu ɲɛ̨i tamąą ɓə di kɛi di kpələ ɉu, gəlee di ɓo a hɛni. Lɔɔ ə kɛ laa kpɔ kɛnɛ̨, diɛ dɛɛ nu kəlee pɔ yɛ tɔɔmun a kɛi nu kɔ́.

⁸ Nu kəlee ə kɛi gbələ a niiɓa pələ. Mąąhɔlɔɓo, tɔɔmun ə mo nɔɔ ŋąąkwɛlɛ nuą diɛ, yɛ diɛ: «Nui nąą wɛli kaa mą, ə gbələ a niiɓa pələ.»

⁹ Tɔɔmun Asuerusə nɛ̨ą Vasti yaa kpɛli ə ɓo dɔɔ pɛlɛ́ mu pələ, yɛ nɛ̨ąą ɓɛlɛ hee.

Tɔɔmun Asuerusə nɛ̨ą ə nwunmɛ̨ tɛ la

¹⁰ Voló mɛ̨ihveelɛ yələ, nɔɔ ə tɔɔmun ɉon, gwəinɛ̨ɛ̨, ə nɛ̨ɛ̨ mą, ə nwɔ gbɛtɛkpuwulu mɛ̨ihveelɛi təli, diɛi kɛ nwɔ tí nuą diɛ ɓaa: Mehuman, Bizta, Harbona, Bigta, Avagta, Ɉetarə, da Karkasə.

¹¹ Yɛ diɛ: «'Ka li, ka mo Vasti ɓa, ə pa, mąąyiliɛ, nwɔ tɔɔ ɓɔlɔi yɛ ɓo nwuɔ̨.» Tɔɔmun ə kɛ bɔ, bələi kɛ nɛ̨ą lɛlɛɛ la, ə nɛ nwɔ tɔɔɓɛlaa diɛ, da nɔi nuą kəlee. Yaan, nɛ̨ɛ̨nui tii lɛlɛɛ kpɔ kɛ a neelee.

¹² Kɛlaa, nwɛlɛɛ ŋɛ̨i tɔɔmun ə dɔɔ, a gbɛtɛkpuwuluɠaai, Vasti hvo gɛ hvo li. Yili ə tɔɔmun níikələn gwəi kpɔ kɛnɛ̨.

¹³ Tɔɔmun ə nwun dɔɔ a nwɔ kilimąą nuą. Mąąhɔlɔɓo, pələ ɓə di kɛi dɔɔ kwəlii mɛ̨nį ɓo la. Da ɉu lɛ kɛ kilimąą nuą da mɛ̨nį kɔ́lɔn nuą diɛ, da nuąi kɛ di mąą lɛɠɛɛ tɔɔmun ma. Nuą tii ɓa:

¹⁴ Karsena, Setarə, Admata, Tarsisə, Mɛrɛsə, Marsena, da Memukan. Diɛ ɓə kɛ a Medi da Pɛrsə ɲɛ̨itɔwɔ nuą mɛ̨ihveelɛ, diɛi kɛ di mąą lɛɠɛɛ tɔɔmun ma.

¹⁵ Tɔɔmun yɛ diɛ: «Ə həli kaa! Ŋą́ nwɔ́ gbɛtɛkpuwuluɠaai tɔɔ, ə gɛ, di mo nɛ̨́ą Vasti ɓa ə pa! Hvo gɛ li; lə mɛ̨nį ɓə da pɛli naai mą yɛ tɔ́n?»

¹⁶ Tɔɔmun da nwɔ ɲɛ̨itɔwɔ nuą kəlee di ɲɛ̨i ɓa, Memukan ə bələ ɓo həɠə, yɛ tɔɔmun ma: «Tɔɔmun nɛ̨ą Vasti aa gɛ a ɲɔ̨nwɔ̨ɔ̨ a tɔɔmun, ə mą kɛ da nwɔ ɲɛ̨itɔwɔ nuąi kəlee, ə mą kɛ a ɓɛi kpɔ nwɔ tɔɔlaai a həli laai.

¹⁷ Mąąhɔlɔɓo, mɛ̨nįi ŋɛ̨i tɔɔmun nɛ̨ą ə gɛ, nɛ̨ąą kaa pai bələ mɛ̨n ɉii, diɛ ɓɛlɛkpɛɛ la di hilɛni diɛ, diɛ kɛ mo woo ɓa: ‹Tɔɔmun nɛ̨ą Vasti ɓə ɉilɛ ə dəli, hvo gɛ!›

¹⁸ Háákələi ŋɛ̨i, Medi da Pɛrsə ɲɛ̨itɔwɔ nuąi di kaa ɓɛ, di nɛ̨ąni kaa pai bələ mɛ̨n ɉii, diɛ di hilɛni woo tee ŋą. Yili yaan, gaa pai lii kələn gwəi hvəi ɉinąą diɛ.

¹⁹ Yili ɓa, nwɔ́ mɛ̨nį nąmu, hvo kɛli yá hɛɓɛ́ kɛ, yii a tɔ́n dɔɔ Vasti ɓa, mąąhɔlɔɓo, aa lənə ə́ wɔ təli ɓa. Hvo kɛa kɛ a tɔɔmun nɛ̨ą. Ə́ nɛ̨ɛ̨nu takpɛli kwɛli, yii viɛlaɓoɔi Vasti ɓa. Mɛ̨nįi ə́ kaa pai bɛ̨ɛ̨i, gaa tooi Medi nuą da Pɛrsə nuą di wɔ tɔ́n ɉɛɓɛ́i hu, yii hva həɠə mą.

²⁰ Mɛ̨nį ŋɛ̨i ə́ kaa pai bɛ̨ɛ̨i, ɓɛlɔwai nu kəlee kaa pai gɔlɔn ɉii la, ə́ wɔ lɔi kɛnɛ̨i ŋɛ̨i hu, nɛ̨ąą kəlee kaa pai di hilɛni woo hon ɉii; ə kɛ a kalanɉon, ə kɛ a nui lɔpee.»

²¹ Nwoo tii ə nɛ̨ɛ̨ tɔɔmun ma da ɲeemu nuą kəlee. Tɔɔmun ə hvilɛn Memukan nwɔ liɛwoo tii pulu.

²² Tɔɔmun ə hɛɓɛ́ kɛ ə dɛɛ ɓɛi kpɔ nwɔ tɔɔlaa ə həli laa, goɓitaaɠaa kəlee hu. Ə koɓi taa kəlee nwɔ hɛɓɛ́ kɛ a ɉį́i woo yii da mo ɉu. Ɉɛɓɛ́i tii hu woo ɓa kɛ: Hinąą kəlee di kɛ di yəi bɛlɛ́n a pɛlɛ́ nąmįną, ɛlɛɛ, di di laawooɠaa ɓo di ɲəi bɛlɛ́n.