Egaa 1 - Yálá laawoo hɛɓɛYálá hee pɛlɛ́ tɔɔ mɛ̨nį a nįnɛ̨ 1 Dariusə nwɔ tɔɔlaa gwɛlan veelɛ hu, ɲąnin mɛ̨ida nwɔ hvóló dɔlɔɔ yələ, Yai-Laa ə mɛ̨nį ɓo gwəi mɛ̨nį hukulɔ mun Aze ɓa, yɛ mą: Nwɛlɛɛ ŋɛ̨i ɓo Saltiɛlə lon ɉulɔnu Zorobabɛlə ɓa, yii gaa a gbahalanąmą Ɉuda lɔi hu, ə mą kɛ, Yehosadakə lon ɉulɔnu Ɉosue ɓa, yii gaa a haláá laa həli mun gɛnɛ̨, yɛ diɛ: 2 «Yai-Laa Mɛ̨nį Kəlee ŋą Hééɓomun, yɛ diɛ: Nuą ŋɛ̨i kaa kɛi diɛ: Yai-Laa hee pɛlɛ́ tɔɔi lɔwai hvo ni həli li.» 3 Kɛlaa yaan, Yai-Laa aa mɛ̨nį ɓo gwəi mɛ̨nį hukulɔ mun Aze laaləi, yɛ diɛ: 4 «Akɛtii, mɛ̨nį lɛlɛɛ ɓə tii ka káá gɛi, ka laa pɛlɛ́ lɛlɛɛɠaa mu, ɉéé pɛlɛ́ aa pu? 5 Ɲą́ą́ Yai-Laa Mɛ̨nį Kəlee ŋą Hééɓomun, gɛ́ ka ka kiliŋąhiɛ, mɛ̨nįɠaai daa həli kaa diɛ. 6 Kaa hihɛn ɉi kɛnɛ̨, kɛlaa, ka hvo má hɔlɔɓo li tii kɛnɛ̨. Kɔ̨nɔ̨n gɛnɛ̨ hvo ka yəi, ka hvo pilɛ ɉu. Lɔɔ kɛnɛ̨ hvo ka yəi, ka hvo gbələ a ka liiɓa. Həɠə kaa ka yəi, kwɛlɛ yɛ pa kaa. Ɛlɛɛ, da kólo kɛ mun vɛla kulɔ, a naaikɛ ɓíi kpon dəɠɛɛ hu. 7 Ɲą́ą́ Yai-Laa Mɛ̨nį Kəlee ŋą Hééɓomun, gáá pənəi ŋį́ mo kaa, gɛ́ ka ka kiliŋąhiɛ mɛ̨nįɠaai tii di kaa həli kaa diɛ. 8 Ka tɛ ɲeeɠaa tona, ka wulu tee, ka pa ka bɛlɛ́i ŋɛ̨i muhəɠə la, yili ɓə a gwə́inɛ̨ɛ̨, ŋą́ mąąwiɛ hɔlɔɓo, ɲą́ą́ Yai-Laa, nwóó li. 9 Ə kɛ ka kwəi, ka káá pai hɛn gɛnɛ̨ hɔlɔɓoi ka yəi ɲɛa, kɛlaa, diikpə lɔ ɓə ka ɉɔlɔɓo, kaa paa la ka yəi bɛlɛ́n. Yii woloi nwɔ̨nɔ̨ ka paa la, ŋį́ hvaŋą hee ɉu, ɉu ə taɠa taɠa. Lə mɛ̨nį ɓa yili a kɛ tii? Ɲą́ą́ Yai-Laa Mɛ̨nį Kəlee ŋą Hééɓomun, gɛ́ kaa: Nwɔ́ pɛlɛ́i ŋɛ̨i aa pu, mąą mɛ̨nį ɓə gɛi. Kɛlaa, kaa ka kpɔwɔ pɛlɛ́ɠaa pɛli a nɛlɛɛ. 10 Ka túwɔ́ pələi tii mąą mɛ̨nį ɓə gɛi, tulɔ tɔ̨nɔ̨ kpɛli hvo pu li la lɔi ɓa, ka wɔ hihɛnŋąąi di hvo lɛlɛ. 11 Yili ɓə gɛ, ŋį́ hvóló laa tee ka pɔ lɔi, ɲee kpu kpuɠaa diɛ, tíiɠaa da viɲə yɛaɠaa ɓa, ə mą kɛ olivə ɲɛaɠaa da yii kpɔ ka ɲɛa laa. Hvóló laa ə tee gəlee diɛ. Huwɔɠaa diɛ ɉu mɔ̨nɔ̨ mįi, ka kɛ kóloɠaa hu ə kala.» 12 Saltiɛlə lon Zorobabɛlə da Yehosadakə lon ɉulɔnu Ɉosue yai gaa a haláá laa həli mun gɛnɛ̨, da nuąi kpɔ kulɔ luwɔlaa hu diɛ pa gəlee, di Yai-Laa ŋɛ̨i da kwɛli hvilɛn mą, nwoo tii kaa a mɛ̨nį walawala, yai gwəi mɛ̨nį hukulɔ mun Aze ə mo diɛ. Diɓoi ŋɛ̨i, Yai-Laa ŋɛ̨i da kwɛli hvilɛn mą, ə dɛɛ Aze pɔ, ə naa həli nuą diɛ, nuą di Yai-Laa nwɔ kɛnɛ̨ laa kaa. 13 Aze yii gaa a Yai-Laa kwəi mɛ̨nį hu kulɔ mun, nwɛlɛɛ ŋɛ̨i Yai-Laa ə dɔɔ la, yii ə mo nuą diɛ, ə pənə nwɔ̨nɔ̨ yɛ diɛ: «Yai-Laa, yɛ diɛ: Gáá pai kɛi ka pɔ.» 14 Saltiɛlə lon Zorobabɛlə ŋɛ̨i kɛ a gbahanąmą Ɉuda lɔi hu, da Ɉosue yai kɛ a haláá laa həli mun gɛnɛ̨, ə mą kɛ, nuąi kpɔ kulɔ luwɔlaa hu di pa, Yai-Laa ə di lii muhəɠə. Di nɛɛmą, di di yee pɛlɛ Yai-Laa hee pɛlɛ́ tɔɔ mɛ̨nį ɓa, yai a di wɔ Yálá. 15 Gwɛlan dɔ̨nɔ̨i tii nwɔ ɲąnin mɛ̨ida lɔwai, voló pow hveelɛ kɔ́w nąąn ɲələ, ya ɓə di góloi tii kɔ́wɔ tɔɔ la. |