Dutɛrɔnome 2 - Yálá laawoo hɛɓɛ

¹ Yili pulu, gu ɉon a veen gbɔ̨nɔ̨ gboloyá pɔ pələ, bələi Yai-Laa ə dí la; guɔ Seirə yee mąą laa.

Edɔmə lɔi, Moabə lɔi da Amɔn lɔi di hu ɓɔ mɛ̨nį

² Yili pulu, Yai-Laa yɛ́ mą́ą́:

³ Kaa lamun ɲee ŋɛ̨i mąą tínɛ̨n ɉii, ka ɉaŋą a ɲánwuɔ̨ pələ.

⁴ 'Mo nuą diɛ, yɛ́ diɛ: «Ka kaa pai tɛɛi ka kaayɔwɔɠaa di wɔ lɔi hu, diɛi ɓaa Esau lonnii diɛi heeni Seirə yeeɠaa diɛ. Di kaa pai ɲɔwi kaa, kɛlaa ka gɛ a nɛlɛɛ;

⁵ Ka hvo kɔ́ pɛlɛ diɛ. Mąąhɔlɔɓo, və́ pai hɛn da lɔpee tɛɛi ka pɔ di wɔ lɔi hu a ka wɔɔ, ə mą kɛ ka kɔ́wɔ hvilɛn ɉii tɔ̨nɔ̨ ɓə. Mąąhɔlɔɓo, Esau ɓə ŋį́ Seirə yeeɠaa tɛɛ bɔ a nwɔɔ.

⁶ Kɔ̨nɔ̨n ka káá lii kɛi mįi laa, ka ɲá di yəi a wali; Ə mą kɛ ka kpələ yá, mąąnɛ̨ɛ̨ ka ɲa di yəi a wali.»

⁷ Mąąhɔlɔɓo, Yai-Laa aa lúwɔ́ too yɛ́ ə́ kɛ mɛ̨nįɠaa kəlee hu. Ɉiɛi yáá gulɔ nɔi pun gɛnɛ̨i hu, gbaɠala kaa mą. Gwɛlan bow nąn ga, Yai-Laa ə wɔ Yálái kaa lɔ ə́ pɔ hɛn da mąąkpaan və ta hee li yɛ́.

⁸ Kɛi ə mo tii, gu tɛɛ gu kaayɔwɔɠaa pɔɔli pələ Seirə lɔi hu, ɓɛ pələi tii Esau huwuhu nuą kaa la heeni; gu tɛɛ Ɉurdɛn ɲá-ɓoloon bɔ pələ, bələi tii a tɛɛ Eilatə da Esiɔn-Gɛvɛrə; gu tinɛ̨n gu ɉon a Moabə nɔi pun ɉu pələ.

⁹ Yai-Laa yɛ guɔ: «Ka hvo kɔ́ pɛlɛ Moabə ɓa, ka hvo hvaa tee mą, və́ nwɔ lɔi hu hɛn da tɛɛ li ka pɔ a ka wɔɔ. Mąąhɔlɔɓo, Lɔtə lonnii ɓə ŋį́ Arə lɔi tɛɛ di pɔ a di kwɛlin.

¹⁰ Emi nuą ɓə gbɛa kɛ heeni Seirə, di kɛ a nu kpulu kɛnɛ̨ di yee muhəɠɛɛ yɛ Anakə nuą.

¹¹ Di kɛi di kaa yɛ Refaitə nuą, yɛ Anakə nuą; kɛlaa Moabə nuą di kɛi kɛ diɛ: Emi nuą.

¹² Bələ lɔ ɓə Hori nuą di gbɛa kɛ la heeni Seirə lɔi hu toloo toloo Esau lonnii diɛ nɔi kulɔ di yəi, di gəlee paa di hee nuą tii heei. Yɛ bələi lɔ Israɛlə ə gɛ la a nwɔ lɔi ŋɛ̨i gaa heeni ɉu yiihu; Yaai Yai-Laa ə dɛɛ bɔi.

¹³ «Ka bələ hon kani yiihu, ka Ɉerɛdə yá teen.»

¹⁴ Ə həɠə Kadɛsə-Barnea ə həli la ɓɛlɔwai gu Ɉerɛdə yá teen na, gu lamun ɉiɛ hu a kwɛlan bow haaɓa gɔw mɛ̨ihaaɓa. Nuą kpɔ kɛ da pɛli kɔ́ kɔ́i, di kəlee di haa, yɛ bələi Yai-Laa ə mo la yɛ gwɛla ɉu.

¹⁵ Yai-Laa yee ə wiɛ di mɛ̨i, ə lɛɛ ɉu di kpɛɛ kpɔ tɛ̨ɛ̨ tɛ̨ɛ̨.

¹⁶ Nuąi kɛ da pɛli kɔ́ kɔ́i yii kɛa haa ə di kpɛɛ nąąlɔwai,

¹⁷ Yai-Laa ə mɛ̨nįi ŋɛ̨i ɓo mą́ą́, yɛ mą́ą́:

¹⁸ «Arə ka ŋɛ̨i ə́ kaa laa Moabə lɔi hu.

¹⁹ Ə́ həli hiɛ li Amɔn lonnii di wɔ lɔi hu. Hvó kɔ́ pɛlɛ diɛ, hvó hvaa kwɛli diɛ. Mąąhɔlɔɓo, Amɔn lonnii di wɔ lɔi hu, və́ pai hɛn da tɛɛi ə́ pɔ nąą. Lɔtə lonnii ɓə ŋį́ nɔi tii tɛɛ di pɔ a di hee lɔi.»

²⁰ Di kɛi nɔi tii kaa yɛ Refaitə nuą di wɔ lɔi. Tɛ̨ą li kpɔ, Refaitə nuą di gbɛa kɛ laa toloo toloo, Amɔn nuą di kɛi kɛ di laa ɓaa: Zamzumə nuą.

²¹ Di kɛ a nu huwu hvaŋą kɛnɛ̨, di kpulu hu kɛnɛ̨, di yee muhəɠɛɛ lɔ yɛ Anakə nuą. Kɛlaa, Yai-Laa ə di kpɛ Amɔn nuą ɲɛ̨i tɔwɔ yiliɠaa di nɔi kulɔ di yəi, di hee di heei.

²² Bələ lɔ ɓə Yai-Laa ə gɛ la a Esau lonnii diɛi tii heeni Seirə lɔi hu. Yai-Laa ə Hori nuą paa di ɲɛ̨i tɔwɔ. Esau lonnii di nɔi kulɔ Hori nuą yəi di hee laa, aa lɛɛ ɉu háákələi yələ aa həli la.

²³ Bələ lɔ ɓə ə naa la Avi nuą diɛ, diɛi tii kɛ di taɠa taɠaa daa pɛlɛɛɠaa hu, ə lɛɛ ɉu ə həli Gaza, Kaftɔrə nuą diɛi həɠə Kaftɔrə di di paa, di hee di heei.

Sihɔn nwɔ lɔi hon mɛ̨nį

²⁴ Yili pulu Yai-Laa yɛ diɛ: «Ka ka muhəɠə, ka bələ həɠə, ka Arnɔn yá teen; Ŋą́ą́ Hɛsbɔn, yii gaa a Amɔrə tɔɔmun da nwɔ lɔi lɔ ka yee ŋą; gbala ə tɔɔ, ə kɔ́ pɛlɛ mą, ə wóló mą a kɔ́.

²⁵ Ə həɠə háákələi ɓa, nu huwui kpɔ yələkɔlɔn mu, gáá ɲɔw lɔi di hu, di mąą yɛ kpɛlin ka ɲɛ̨itɔwɔ. Da kɛi pa ə́ laa pələ mɛ̨n ɉii, di kaa pai kɛi kpɛlin ɉi, di lii yɛ kpɛlin di kwəi.»

²⁶ Nąąlɔwai gu lɛɛ Kedemotə nɔi pun ɉu, ŋį́ nuą tɔɔ Hɛsbɔn tɔɔmun Sihɔn pɔɔli; a liilaa wooɠaa, gɛ́ kɛ mą:

²⁷ «Gɛ́ ə́ hvaa mą ŋį́ tɛɛ ə́ wɔ lɔi hu pələ, gáá pai lɛɛi lɔ bələ ɓa, vá li ŋɛ̨i, və́ li ŋɛ̨i.

²⁸ Kɔ̨nɔ̨n gáá pai kɛi mį́i gáá pai kɛi ɲai ə́ yəi a wali, ə mą kɛ kpɛli kɛ kpələ yá ɓə, ŋą́ ɲa. Gáá lɔ bɔ ŋį́ tɛɛ a gɔ́wɔ ə́ wɔ lɔi hu; hvaa nwóó ɓa.

²⁹ Esau lonnii di kaa heeni Seirə, da Moabə nuą heeni Arə di hvaa mą ku di wɔ lɔi hu ɓɔ. Yɛ́ kpɛli, hvaa mą, ku tɛɛ ə́ pɔɔli, ku Ɉurdɛn teen, nɔi Yai-Laa aa naakwɛlanmo kuɔ, ku ɉɔlɔ ɓo.»

³⁰ Kɛlaa, Hɛsbɔn tɔɔmun Sihɔn hvo hvaa mą ku hvo tɛɛ nwɔ lɔi hu. Yai-Laa aa kɛ gili walawala, bələ ɓə ə tɛɛ la yɛ doo gu yee ŋą a nąąlɔwai.

³¹ Yai-Laa yɛ mą́ą́: «Yaa nąą kaa, ŋą́ą́ gɔwɔ tɔɔ gɛ Sihɔn da nwɔ lɔi tɛɛ ə́ pɔ. Gbala tɔɔ yɛ́ nɔi hon.»

³² Sihɔn ə kulɔ ə gu laakwiɛn a kɔ́; yaa da nwɔ lɔi hu nuą kəlee, Yasa.

³³ Yai-Laa gu wɔ Yálái ə doo gu yee ŋą. Gu yee ə tɛɛ mą, yaa da nonnii da nwɔ nuą kəlee.

³⁴ Gu lɔ nwɔ taaɠaai hu, guɔ daaɠaai kəlee kɛ a haláá hɛn Yai-Laa ɓa. Ɉinąą, nɛ̨ąą da nɛapɛlɛɛ, gu hvo da lɔpee lɛɛ a vulú.

³⁵ Daatɛlɛɛɠaa lɔ ɓə gu di həɠə a kɔ́ honŋąą, da ɉɛngɔwɠaai kɛ daaɠaa gu di hon di hu.

³⁶ Ə həɠə Aroɛrə ɓa, yaai tii Arnɔn yá kwɛlɛ, ə həɠə nwɔ̨nɔ̨ daai tii ɲee lɔwai lɔi hu mą, ə həli Galaadə lɔi ɓa; taa ta hvo kɛ laa, yii gu hvo ɉon. Yai-Laa gu wɔ Yálái aa kɛ gəlee tɛɛ gu pɔ.

³⁷ Amɔn lonnii di wɔ lɔi lɔ ɓə gu hvo lɛɠɛ mą, da Yabɔkə kwɛlɛ lɔi kəlee, da ɲee hu taaɠaa, da gɛɛnąąɠaai kpɔ Yai-Laa gu wɔ Yálái ə tɔ́n dɔɔ diɛ, yɛ kɛ gu hvo tunwɔ̨n mą.