Dutɛrɔnome 18 - Yálá laawoo hɛɓɛ

Levi huwu hu nuą mąą mɛ̨nį

¹ Ɉaláá laa həli nuą ŋɛ̨i a Levi huwu hu nuą, da di nąn nonnii, diɛi a Levi huwu hu nuą, di hvo pai lɔi hɔlɔɓoi yɛ bələi di kaayɔwɔɠaa Israɛlə lonnii di ɉɔlɔɓo la. Ɉɛn di pai kɛi mįi a di kɔ̨nɔ̨n ya ɓaa: haláá hɛn da gwɛlan mo Yai-Laa ɓa, da hɛn gaa a Yai-Laa kɔ́ hɛn, yili ɓə a di wɔɔ.

² Lɔi hvo pai kɛi Levi yəi nąn nonnii lɔwai. Yai-Laa ɓə pai kɛi a gwɛlin, yɛ bələi ə naa kwɛlan mo la mą.

³ Hɛn pai kɛi a di wɔɔ, ya ɓaa pai kɛi a: Nįŋɛ̨ɠaa da mɛlaaɠaai Israɛlə lonnii da paa la a kɔ́ɓo hɛn, da da paai, ɲee, naakpaɠa, da gwəi hɛnŋąą; yili ɓə a di wɛi.

⁴ Hɛn nwɔ̨nɔ̨ ka dɛɛ di pɔ, ya ɓaa: ka wɔ hihɛn dɔlɔɔɠaa, yɛ bələi, mɔ̨nun gaa la, da ka wɔ lɔɔ nįnɛ̨, ka wɔ wulɔ nįnɛ̨, ə mą kɛ, ka wɔ ɓɛlaaɠaa, nəɠa dɔlɔɔɠaa ka mɛ̨i tee, ka nəɠa tɛɛ di pɔ.

⁵ Mąąhɔlɔɓo, Levi ɓə Yai-Laa ka wɔ Yálá ə ɉəɠə ɉu da nonnii ka huwu kəlee lɔwai, diɛ ɓo la Yai-Laa lííla a yələ kəlee, diɛ haláá kulɔ Yai-Laa laa hu.

⁶ Akɛ Levi ta a naa gwəi, ə həɠə ɉee taa hu, ɓɛi ə kɛ laa heeni Israɛlə lɔi hu, yɛ li ɓɛi Yai-Laa ə ɲeekpiɛ lɛ laa,

⁷ a pɛli gɛ kóló kɛ laa Yai-Laa nwɔ Yálái ɓa, lɔ yɛ bələi Leviɠaa di kaa laa da gɛ la.

⁸ Da Levi yiiɠaa tii ə di kaa laa, di kɔ̨nɔ̨n a kɛ a bɛliɛ a gee. Kɛlaa, ɉɛnŋąą nui tii ə nɔwɔtɔɔ a nąn bulu hɛn, yili laa kulaa ɉu.

Yálá kwəi mɛ̨nį hu kulɔ mun neelee da lɛɛ kɛ mun

⁹ Nɔi Yai-Laa ka wɔ Yálái kaa pai dɛɛi ka pɔ, ka pa həlii ɉu, nu huwui tii laa, ka hvo di wɔ kɛɛ kala túwɔ́i tii mąąkwɛli, ka hvo di pɔɔ kɔ́ɔn.

¹⁰ Mąą hvo nɛ̨ɛ̨li, nu ta hvo kɛ ka lɔwai, yɛ kɛ gaa non gulɔi a haláá, yɛ gələn; nu ta hvo kɛ a tɔlikpɛmun; a wala kɛ tii, yɛ ɲɛ̨ąkpɛ, yɛ kɛ gaa hįį woo mukulɔi,

¹¹ yɛ wulɔ kpani, yɛ ɲąmuątaa tɔlukpɛ; a wala kɛ tii, yɛ nu tɔɔ ɲąmuątaa.

¹² Nui lɔpee a mɛ̨nįɠaa tii ta kɛ, gaa a mąąliɓi túwɔ́ ɓomun Yai-Laa ɲɛ̨i ɓa. Dúwɔ́ pələ ɲɔ̨n taaləi tii ɓə gɛ, Yai-Laa yɛ nu huwuɠaa tii di wɔ lɔi kulɔ di yəi, yɛ dɛɛ ka pɔ.

¹³ Mąąnɛ̨ɛ̨ ka pa kanąn Yai-Laa ka wɔ Yálái ɓa kpɔ a ka nwąnąi.

¹⁴ Nu huwuɠaa tii ka káá pai di wɔ lɔi hɔlɔɓoi, tɔlukpɛ nuą woo ɓə da hiɛ la, da nuąi da haliɠaa mąąnikɛ. Kɛlaa, ka wɛi! Yai-Laa ka wɔ Yálái aa tɔ́n dɔɔ kaa, mɛ̨nį huwui tii mąą mɛ̨nį ɓa.

¹⁵ Nąąlɔwai kɛa, Moisə yɛ Israɛlə lonnii diɛ: Yai-Laa ka wɔ Yálái kaa pai gwəi mɛ̨nį hukulɔ mun da kulɔi ka lɔwai yɛ ɲą́ą́, ka kaayɔwɔɠaa lɔwai, yaa ɓə mąąnɛ̨ɛ̨ ka ka wəli tɔɔ nwoo ɓa.

¹⁶ Kɛlɛi, yii kaa kpinįi ka vɛli Yai-Laa ka wɔ Yálái ɓa Horɛbə yee ɓa, a gee kaa hvóló kɛnɛ̨i, yaa li, a yaai ka kɛ mą: «Ku hvo kɛa bɔ Yai-Laa ku wɔ Yálái woo hvo too ku wəlii, ku hvo kɛa bɔ ku hvo nwɔ̨n nən gɛnɛ̨ kaa, ku hvo pa haa!»

¹⁷ Yili ɓə gɛ, Yai-Laa yɛ mą́ą́: «Tɛ̨ą kaa di pɔ.

¹⁸ Gáá pai gwə́i mɛ̨nį hukulɔ mun da kulɔi di kaayɔwɔɠaa lɔwai, ə kɛ yɛ bələi ə́ kaa la. Gáá pai nwóóɠaa pui na, ɛlɛɛ, yii lɔpee ŋą́ dí la, yɛ mo diɛ.

¹⁹ Mɛ̨nįɠaai nui tii kaa pai kɛi moi diɛ náá hu, nui a wala gɛ hvo nwəli tɔɔ mą, ɲą́ą́ gbinįi ɓə ŋą́ mąą nu hutɔɔ.

²⁰ Kɛlaa, nu ta a niikpələ, yɛ kɛ yɛ gaa mɛ̨nį ta ɓoi a náá, yii və́ dí li la, a wala kɛ tii, yɛ hvaa haliɠaa laa hu, mąą nu a haa.»

²¹ Ka káá kiɛ pai kɛi ka kpɔɔ mąąnin gɛi, kaa kɛ mą: ku kaa pai gbaɠala kaai ləi, kuɔ kɛ, Yai-Laa hvə nwoo tii ɓo li!

²² Mɛ̨nįi Yai-Laa kwəi mɛ̨nį hu kulɔ mun tii a mo a Yai-Laa laa, mąą mɛ̨nį a wala kɛ, a wala həli, a kɛ tii, Yai-Laa hvəi mąą nu tí la, a kɛ tii, mąą nui ə mo lɔ tii a gbɔwɔ ɲąąkɛnɛ pələ, ka hvo ɲɔw mą.