Dutɛrɔnome 14 - Yálá laawoo hɛɓɛ

Haa mɛ̨nį nwɔ tɔ́n

¹ Ka káá a Yai-Laa ka wɔ Yálá lonnii. Nu ta a haa, mąą hvo nɛ̨ɛ̨li ka ka kɔ́lɔ ɓɛla ɓɛla, kaa ka tonna nwun galaan.

² Ka káá a nu huwui gaa a Yai-Laa ka wɔ Yálái nwɔɔ. Kaa ɓə Yai-Laa ə ɲeekpiɛ lɛ kaa, kaa kɛ a gbinį ɓa nu huwu. Nu huwuɠaai kpɔ lɔi mɛ̨i, gəlee lɔwai.

Huwɔɠaai tɔ́n gaa mą

³ Ka hvə hɛn mąąliɓiɛ ta mįi.

⁴ Ɉuwɔɠaai ka pɛli di mįi, diɛ ka: Nįŋɛ̨, ɓɛlaa, ɓolu,

⁵ lómą huwui lɔpee, tɛɛ́, ɓɛɛla, kpələɠa, hɔ́ɔ́, toa;

⁶ huwɔɠaai kpɔ di kɔ́wɔ ɲąnin mɛlaɓoɔ ɉu hveelɛ, a hɛn mįi yɛ pənə yɛ dɛ na, yɛ dɛɠɛ-tɛɠɛ mįi, ka pɛli yiliɠaai mįi.

⁷ Ɉuwɔɠaai di kɔ́wɔ taŋąi ɓɛlaa, diɛ kɔ̨nɔ̨n bənə diɛ dɛ di la, yiiɠaai ka hva di mįi diɛ ka: ɲɔɔmɛɛ, hɔu da yiiɠaai kpɔ da kɔ̨nɔ̨n bənə diɛ dɛ di la, kɛlaa di kɔ́wɔ kalin və diɛi.

⁸ Ɓoi kɔ́wɔ ɲąnin mɛlaai, kɛlaa hva kɔ̨nɔ̨n dɛ na; ka hvo di huwɔ mįi, ka hvo tunwɔ̨n di powa ɓa.

⁹ Yai huwɔɠaa kəlee lɔwai, yiiɠaai ka pɛli di mįi diɛ ka: Yii kpɔ naa ləŋąn gaa mą gala ə ɓo mą, ka pɛli di mįi.

¹⁰ Kɛlaa yii kpɔ naa ləŋąn və mą, gala hvo mą, ka hva pɛli di mįi, tɔ́n gaa mą.

¹¹ Nwɛ̨niɠaai kpɔ tɔ́n və diɛ, ka pɛli ka di mįi.

¹² Kɛlaa nwɛ̨niɠaai ka hva pɛli di mįi diɛ ka: geelə huwui lɔpee, kuwɔ kpaan, kuwɔ, da yá pɔ kuwɔɠaa,

¹³ kɔ́ɔwɔ, kowolon gala hukulɔ-kulɔ, da duwaa huwui lɔpee gəlee.

¹⁴ Goą-goą huwu kəlee,

¹⁵ hɔ̨nwɔ̨nɔ̨gɔlɔn, kpaan, kpaangwəlehəɠə, da kpaan ɉuwui lɔpee gəlee.

¹⁶ Muú da muú huwui lɔpee gəlee.

¹⁷ Kwɛli-muú, yá-kan, yá-nwɛ̨ni huwui lɔpee gəlee,

¹⁸ wɔɓɛ da kələnɔw.

¹⁹ Ka koon ɉɛn lɔpee gəlee kaa a hɛn tɔ́n gaa mą, ka hvo da mįi.

²⁰ Koon ɉɛn yiiɠaai tɔ́n və diɛ, ka pɛli di mįi.

²¹ Huwɔi lɔpee a haa gbɔwɔ ɓa, ka hvo mįi. Nwɛ̨ą a kɛ ka kɔ́wɔ mɛ̨i, ka dɛɛ bɔ, nwɛi a pɛli mįi; a wala kɛ tii nɔwɔtɔɔ tɛɛ nwɛ̨ą ɓa, mąąhɔlɔɓo, ka káá a nu huwui gaa a Yai-Laa ka wɔ Yálái nwɔ hɛn. Ka hvə ɓolu yili nee ɲįnįya hu.

Hɛn bow nąą kulɔ mɛ̨nį nuą kóló hɛn ɉu

²² Hɛn lɔpee ka káá pai ɉin ɉii ka pɔ yɛa kwɛlan dɛi tɛi yee mu, ka bow nąą tɛɛ Yai-Laa ka wɔ Yálái pɔ.

²³ Ɛlɛɛ kaa naa Yai-Laa ka wɔ Yálá lííla, ɓɛi gaa pai ɲeekpiɛ lɛi laa, naa ə ɓo laa. Nąą ɓə ka káá pai kɛi ka wɔ mɔ̨nun gɔn bow nąą, ka wɔ lɔɔ nįnɛ̨i nwɛi, da ka wɔ wulɔ nįnɛ̨i nwɛi, ka wɔ taatɛlɛɛɠaa lon dɔlɔɔɠaa mįi laa, bələ ɓə ka káá pai kɛi ɲɔwmąąlaa mąą kwɛlii la, yɛ hvilɛn na Yai-Laa ka wɔ Yálái ɓa a yələ kəlee.

²⁴ Kɛlaa, akɛ, ɓɛi ka káá laa, nąą kwɛai, ka hva pɛli pai a ka wɔ hihɛnŋąąi má bow nąą, gɛɛnąą ŋɛ̨i Yai-Laa ka wɔ Yálá ə ɲeekpiɛ lɛ laa, yɛ naa hee mą, ɛlɛɛ, yaan Yai-Laa ka wɔ Yálá aa lúwɔ́ too ka kɛ kólóɠaa diɛ,

²⁵ a kɛ tii, ka ka wɔ hihɛnŋąą má bow nąąɠaa lɔwɔ too, ka ka yee kanąn nwali ɓa, ka li la ɓɛi tii Yai-Laa ka wɔ Yálá ə ɲeekpiɛ lɛ laa.

²⁶ Ka həli laa, yii lɔpee ka kɛ bɔ, ka ɲá a ka yəi wali, yɛi kɛ a nįŋɛ̨, yɛi kɛ a taatɛlɛɛ pɛlɛɛ, lɔɔ ɓə, kpələ hɛn a nu kɛlɛ, hɛn lɔpee nwɛli kaa pai kɛi kaa, ɛlɛɛ, ka ka laa mįi laa Yai-Laa lííla. Kaa kwəinɛ̨ɛ̨ kulɔ ka ka yəi bɛlɛ́n nuą.

²⁷ Levi nu huwuɠaai ka wɔ taaɠaai hu, diɛi lɔi hvo di yəi, di kwɛlin və di yəi, ka hvo ka kili kulɔ di hu.

²⁸ Kwɛlan ɉaaɓa tɛɛ pələ tɛitɛi, ka ka wɔ tíiɠaai di ɓá kəlee bow nąą həɠə; ka ɉəɠə ka naa ka pɔ taai.

²⁹ Levi nu huwui tii lɔi hvo di yəi, di kwɛlin və di yəi, nwɛ̨ą, təliɠaa da kalaninŋąą, diɛi tii ka wɔ taaɠaai hui, da pa di di laa mįi, di pilɛ ɉu. Yai-Laa ka wɔ Yálái yɛ pɛli lúwɔ́ tooi kaa ka kɛ mɛ̨nįɠaa kəlee hu.