Danîa 1 - Yálá laawoo hɛɓɛ

Daniɛlə da mɛlaa di li mɛ̨nį Babilonə

¹ Yoyakimə ŋɛ̨i kɛ a Ɉuda nɔi tɔɔmun, nwɔ tɔɔlaa gwɛlan ɉaaɓa lɔwai, Nabukodonosorə Babilonə tɔɔmun, ə kɔ́ pɛlɛ Ɉerusalɛmə ɓa, ə mąątinɛ̨n.

² Ną́mu Yálá ə hvaa mą, Babilonə tɔɔmun, Nabukodonosorə ɲee ə tɛɛ Yoyakimə ɓa, yai kɛ a Ɉuda tɔɔmun. Yili pulu, ɉɛnŋaai ŋɛ̨i kɛ Yálá hee pɛlɛ́ mu, ə bələ tɔ̨nɔ̨ həɠə, ə li a diɛ Sinearə lɔi hu, ə di pu nwɔ haliɠaai yəi bɛlɛ́n, ə ɉɛnŋaai tii pu nwɔ haliɠaai di wɔ hɛn gɔw kɛɛnąą.

³ Tɔɔmun Nabukodonosorə ə mo nwɔ gbɛtɛgbuwuluɠaa nwun nąmu Aspenazə ɓa, yɛ mą: Hilɛlea həɠə Israɛlə nu huwu lɔwai, diɛi di kaa a tɔɔ-pɛlɛ́ mu nuą, diɛ ɓo a nu walawalaɠaa lonnii.

⁴ Mąąnɛ̨ɛ̨ di kɛ a hilɛlɛai kiliin ɉii ɲɔ̨nwɔ̨ɔ̨ hvo diɛ, di lɛlɛɛ, kili yɛ ɓo diɛ, diɛ ɓo a mɛ̨nį kɔ́lɔn nuą, di nwun ə ɓo di hu. Di kɛ a nuąi da pɛli di kɛ ɲə́i dɔɔ-pɛlɛ́ mu. Diɛ ɓə di kaa pai di kalan ɉi a Kalde woo, da ɉɛɓɛ́ kɔ́w.

⁵ Tɔɔmun ə mo yɛ diɛ: Hvóló kəlee, kɔ̨nɔ̨n yaai tii gaa pai kɛi mįi, da nwɔ lɔɔi gaa pai kɛi gbələi, di yili ɲɔ̨nwɔ̨mąn dɛɛ nuą tii pɔ. Bələ ɓə mąąnɛ̨ɛ̨ kɛ diɛ di kɔ̨nɔ̨n gɛ la, diɛ di kalan, kwɛlan ɉaaɓa kuu mu. Gwɛlan ɉaaɓai tii tɛɛ pulu ɓə da lɔ la tɔɔmun nwɔ kóló hu.

⁶ Nuąi tii lɔwai, Ɉuda huwuhu hilɛlɛa nąąn di kɛ laa, diɛ kɛ di laa ɓaa: Daniɛlə, Hanania, Misaɛlə da Azaria.

⁷ Gbɛtɛgbuwuluɠaa nwun nąmu, ə laaɠaa hee diɛ, yɛ Daniɛlə ɓa: Bɛltsasarə. Yɛ Hanania nwɛi ɓa: Sadrakə. Yɛ Misaɛlə nwɛi ɓa: Mesakə. Yɛ Azaria nwɛi ɓa: Abɛdə-Nego.

⁸ Daniɛlə ə giliŋąhiɛ, yɛ diɛ: «Mąą hvo nɛ̨ɛ̨li hvo gbɔwɔ kɔ́hɔɓo a tɔɔmun nwɔ laa mį́i hɛn, da nwɔ lɔɔi a kɛ gbələi.» Yili bə gɛ ə li, ə ɉu hvɛli gbɛtɛgbuwulu nwun nąmu ɓa, yɛ mą: «Və́ bɔ və́ gɔ́hɔɓo a gɔ̨nɔ̨nŋaai tii.»

⁹ Yálá ə hvaa mą Daniɛlə wooi tii ə laa a gbɛtɛɠaai tii nwun nąmu lii.

¹⁰ Kɛlaa, yili ə Daniɛlə woo ŋąąpənə yɛ mą: Nwɔ́ mɛ̨nį nąmu tɔɔmun nwoo ɓə gáá ɲɔwi mą, yaai ŋɛ̨i ka kɔ̨nɔ̨n mɛ̨nį, mąą mɛ̨nį gbən dee. Yili ɓə gaa mą, akɛ ŋį́ hvaa mą, kaa lənə gɔ̨nɔ̨n tii ɓa, ka kɔ́lɔ lɛlɛɛ a wala laa kaa, tɔɔmun a ka káá, ka ɓɛlaa yolaa, ka mąą yalaa, nwun nɛɛ ɉu mɛ̨nį li.

¹¹ Nui ŋɛ̨i gbɛtɛgbuwuluɠaa nwun nąmu ə ɉee Daniɛlə ni nwun na, da mɛlaa ni haaɓai, Hanania, Misaɛlə da Azaria. Daniɛlə ə mo yili ɓa yɛ mą:

¹² «Gáá bɔ ə́ ə́ wɔ kóló kɛ nuąi ŋɛ̨i a kuɔ, ə́ ku hu kɔ́ɔn bələ kɛ tii, hvóló pow kuu mu, yɛ nɔw da wulu ɓaɠaa da ya kpɛli-kpɛli tɛɛ ku pɔ.

¹³ Voló pow tii a tɛɛ, ə́ ku kɛ pələ kaa, gwa ɉilɛlɛa yiiɠaai tii di kaa tɔɔmun ɲəi kɔ̨nɔ̨n mįi, pələi kɛa ya gaa la, pələ ɓə kɛa ya ku hon na.»

¹⁴ Moi tii di mo mą, ə hvaa mą, ə di mąąkpɛɛ hvóló pow kuu mu.

¹⁵ Voló pow tii tɛɛ pulu, diɛ mun di yola di tɛɛ nuąi kɛi tɔɔmun ɲəi kɔ̨nɔ̨n mįi diɛ.

¹⁶ Yili ɓə gɛ, nui ŋɛ̨i kɛ Daniɛlə da mɛlaa di nwun na hvo kɛa kɛi pa a tɔɔmun nwɔ kɔ̨nɔ̨n da nɔɔ di pɔ, yii lɔ ə kɛi dɛɛ di pɔ ya ɓa a nɔw da wulu ɓaɠaa.

¹⁷ Ɉilɛlea nąąn tii, Yálá ə hvaa mą ə mɛ̨nį kɔ́lɔn ŋąą da hɛɓɛ́ kɔ́w gulɔ ɉu kɔ́lɔn ŋąą tɛɛ di pɔ, da kíli. Yálá ə hvaa mą Daniɛlə yɛ hįi wooɠaa hukulɔ.

¹⁸ Guu tii tɔɔmun ə dɔɔ ɉəliɛ kɛa, gbɛtɛgbuwuluɠaa nwun nąmu ə pa a ɉilɛlɛai tii tɔɔmun nííla.

¹⁹ Tɔɔmun ə di kəlee di mąąkpɛɛ, nu kpului tii lɔwai, nui lɔpee ta hvo hɔlɔɓo ɉu hvo kɛ yɛ: Daniɛlə, Hanania, Misaɛlə da Azaria. Nu nąąn tii ɓə tɔɔmun ə di yɛɠɛ ɉu, ə di hee gwɛlɛ.

²⁰ Yii kpɔ hvilɛn na kili mɛ̨nį, da nwun gɛ ɉu mɛ̨nį ɓa, tɔɔmun ə nwɔ tɔlikpɛ nuąi kpɔ di kaa laa, da nuąi da kɛ kwɛli hvilɛn ɉi pɛmɛ̨nɛ̨n gɔwɠaa diɛ, ə gəlee mąąnin gɛ, kɛlaa, ə Daniɛlə da mɛlaa di wɔ woo ŋąąpənə kaa, viɛlaɓoɔ gee mɛ̨i pow, ə tɛɛ nuąi tii kəlee diɛ.

²¹ Daniɛlə ə kɛ tɔɔmu bɔ, ə lɛɛ la ɉu, ɓɛlɔwai Sirusə ə kɛ la a nɔi nwun nąmu nąąlɔwai ə ɉəli.