Zɔ̂ŋ Veerɛi 1 - Yálá laawoo hɛɓɛ

Túwɔ́-woo

¹ Ɲą́ą́i a nu pɔlɔ-pɔlɔ, ɲą́ą́ ɓə ɉɛɓɛ́i ŋɛ̨i tɛɛi Bɛlɛ́-lee-nɛ̨ą tii di ɉəɠə ɉu mą, da nonnii, a yai nwɛli kaa mą́ą́ tɛ̨ą kɛɛ pono hu, ɲą́ą́ danɔ̨n nɔ hvəə, nwɛli kaa mą́ą́, kɛlaa yiiɠaai kpɔ tɛ̨ą kɔlɔnŋąą kaa di yəi diɛ kpɛlimąn;

² dɛ̨ąi gaa gu hu ɉáálai, ɛlɛɛ, yai pai lɛɛi gu pɔ ɲɛ̨n deei hvo mą;

³ Ną́n Yálá da Non Jesus Kristə di nɛ̨ɛ̨laa, ɲɛ̨imąąwɛli kaa da liilaa tɛɛ ka gu pɔ, tɛ̨ą da wɛlikɛmąąlaa hu.

⁴ Ə́ lonnii taɠaa kaai ŋį́ mo, diɛ hiɛ tɛ̨ą kpaalə mɛ̨i, yɛ bələi gu díɓo hɔlɔɓo la Nąn ɲəi, yili ə gwəinɛ̨ɛ̨ kpɔ kɛnɛ̨ɛ̨.

⁵ Yiihu kɛa, Bɛlɛ́-lee-nɛ̨ą, və́ tíɓo nįnɛ̨ mąą mɛ̨nį pɛ̨ɛ̨i, gɛ́ dɛɛ yɛ́, kɛlaa yii gaa kɛ gu yəi a gɔwɔ tɔɔ yələ, yaa lɔ ɓə, gáá ɉu vɛlii yɛ́, 'ká gu gu keeni wɛlila kɛ,

⁶ ɛlɛɛ, wɛlikɛmąą ɓaa: Gu hiɛ yɛ bələi nwɔ tíɓoɠaa kaa la. Díɓoi tii ɓə ká mąą mɛ̨nį mɛ̨n, a gɔwɔ tɔɔ yələ, əgɛ, ká hiɛ gbaaləi tii hu.

⁷ Mąąhɔlɔɓo, nu ɲąąhɛn nuą tamąą daa taɠa-taɠa yɛnɛ̨ɛ̨, Di hvo laa li Jesus Kristə kɛ mɛ̨nį a nu, na. Ya ka tii, a ɲąąhɛn kɛmun tii, a Kristə ɲowoi tii!

⁸ 'Ká ká kpɔwɔ mɛ̨i kaa káá kpinįi, ə gɛ, ká hvo pa hvɛɠɛ a ká kɛ kólo dɔlɔ, kɛlaa yaamun, ká ká hvɛla hɔlɔɓo kpɔ kɛnɛ̨.

⁹ Nui lɔpee a mąą kwea mą ɛlɛɛ, hvo lɛɛ li Kristə ŋą laa na pələi mɛ̨i, akɛ tii, Yálá nwɛi ta hvə li. Nui a lɛɛ laa na pələ mɛ̨i, kɛ tii aa, Nąn da Non di hɔlɔɓo.

¹⁰ Nu ta a pa ká pɔ, hvo pa li a laa na pələ yili, 'ká hvo ká yee hee mu, ɛlɛɛ, 'ká hvo kpɛli balúwɔ́ɲɛ̨n.

¹¹ Nui a balúwɔ́ɲɛ̨n, kɛ tii aa ɲee lɔ nwɔ tuwɔ pələ ɲɔ̨n hu.

¹² Mɛ̨ni tamąą kaa kɛ gwə́i, gɛ́ ŋį́ mo káá, kɛlaa, və́ bɔ, və́ gəlee kɛ hɛɓɛ́ laa ɲą a hɛɓɛ́-yá. Gbala ə tɔɔ, gáá bɔ ɲą́ą́ gbini ŋą́ pa ká pɔɔli, ŋą́ mo káá a nááləi, ə gɛ, gu wɔ kwəinɛ̨ɛ̨i laa ə kulɔ.

¹³ Ə́ mąąhalai di ɉəɠə ɉu, nonnii diɛ ə́ túwɔ́ɓo.